NepalFlood : দৈনিক অগ্ৰদূত ডিজিটেল ডেস্ক : নেপালৰ শেহতীয়া জলপ্ৰলয়ৰ বাবে ভাৰত, চীন আৰু আমেৰিকা যুক্তৰাষ্ট্ৰক জগৰীয়া কৰিছে কাঠমান্ডুৱে। এই তিনি দেশৰ উদ্যোগ-প্রতিষ্ঠানসমূহৰ পৰা নিৰ্গত পৰিৱেশ প্ৰদূষণকাৰী সেউজগৃহ গেছক এই ভয়াবহ প্রাকৃতিক দুর্যোগৰ বাবে দায়ী কৰি ৰাষ্ট্ৰসংঘৰ দ্বাৰস্থ হোৱাৰ চিন্তা-চর্চা কৰিছে দেশখনে।
মূলতঃ এই তিনি বৃহৎ ৰাষ্ট্ৰৰ পৰা ক্ষতিপূৰণ বিচাৰি চলিত মাহতে নেপালৰ প্রধানমন্ত্রীয়ে বিষয়টো ৰাষ্ট্ৰসংঘৰ সাধাৰণ সভাত উত্থাপনৰ গুণাগঁথা কৰিছে। উল্লেখ্য যে ক্ষুদ্র দেশখনৰ এই জলপ্রলয়ত মৃত্যুমুখত পৰা ১,২০৪জনৰ মৃতদেহ আজি পর্যন্ত উদ্ধাৰ কৰা হৈছে।
যোৱা ২৬ আগষ্টত অহা এই বিধ্বংসী বানৰ ধ্বংস লীলাৰ ক্ষতিপূৰণৰ বাবে ৪৭ হেজাৰৰো অধিক কোটি টকা (পাঁচশ কোটি ডলাৰ) ৰ প্ৰয়োজন হ’ব বুলি নেপাল চৰকাৰে ঠাৱৰ কৰিছে। এই ক্ষতিপূৰণৰ ধন ভাৰত, চীন আৰু আমেৰিকা যুক্তৰাষ্ট্ৰৰ পৰা বিচাৰি দেশখন ৰাষ্ট্ৰসংঘৰ দ্বাৰস্থ হোৱাৰ পৰিকল্পনা কৰিছে।
কালি এই কথা সদৰী কৰি নেপালৰ বৈদেশিক মন্ত্রী শিশিৰ খনালে সংবাদ মাধ্যমৰ আগত কয়, ‘ভাৰত, চীন আৰু আমেৰিকা যুক্তৰাষ্ট্ৰই বিশ্বৰ ভিতৰত সর্বাধিক সেউজগৃহ গেছ নিৰ্গত কৰে। ইয়াৰ প্ৰভাৱ সমগ্ৰ বিশ্বত পৰে। গতিকে আমাৰ দেশৰ পৰৱৰ্তী পৰিস্থিতি মোকাবিলাৰ বাবে আমি এই তিনি দেশৰ পৰা ক্ষতিপূৰণ বিচৰাৰ সিদ্ধান্ত লৈছো।’
এই সম্পৰ্কত খনালে আৰু কয়, ‘আমি সাহায্য নহয়, ন্যায় বিচাৰ আৰু ক্ষতিপূৰণ বিচাৰিছো। সেই অনুসৰি আমি কূটনৈতিক পদক্ষেপ গ্ৰহণৰ সিদ্ধান্ত লৈছো। এয়া দান-দক্ষিণাৰ বেপাৰ নহয়। এয়া হৈছে নৈতিক আৰু আইনগত দায়বদ্ধতা।’
উল্লেখ্য, দুদিন পূর্বেও নেপালৰ বৈদেশিক মন্ত্রীজনে দেশখনৰ এই ভয়াৱহ প্রাকৃতিক দুৰ্যোগৰ বাবে জলবায়ু পৰিৱৰ্তনক দোষাৰোপ কৰিছিল। গতিকে বিস্তৰ ক্ষতিসাধন কৰা এই জলপ্ৰলয়ৰ কাৰণ নিৰ্ণয়ৰ বিষয়টো দেশখনৰ চৰকাৰে কিমান গুৰুত্বসহকাৰে লৈছে সেয়াও স্পষ্ট হৈছে। ইয়াৰ অংশৰূপে বিষয়টো সমগ্ৰ বিশ্বৰ দৃষ্টি আকৰ্ষণৰ উদ্দেশ্যে ৰাষ্ট্ৰসংঘৰ সাধাৰণ সভাত উত্থাপনৰ যো-জা চলাইছে ক্ষুদ্র দেশখনে।
উল্লেখ্য যে অহা আঠ ছেপ্টেম্বৰৰ পৰা নিউয়কস্থিত ৰাষ্ট্ৰসংঘৰ মুখ্য কাৰ্যালয়ত সংস্থাটোৰ সাধাৰণ সভাৰ ৮১ সংখ্যক সভা অনুষ্ঠিত হ’ব। এই বৈঠকত নেপালৰ প্ৰতিনিধিৰূপে প্রধানমন্ত্রী বলেন্দ্র শ্বাহে বক্তব্য আগবঢ়োৱাৰ সম্ভাৱনা প্রবল হৈছে। লক্ষ্যণীয়ভাবে দেশখনে প্রথম অৱস্থাত ৰাষ্ট্ৰসংঘৰ এই সভালৈ বৈদেশিক মন্ত্রী খনালক প্ৰেৰণৰ কথা আছিল। কিন্তু পৰিস্থিতিৰ গুৰুত্ব অনুধাৱন কৰি দেশখনে স্বয়ং প্রধানমন্ত্রীকে সভাখনলৈ প্ৰেৰণৰ সিদ্ধান্ত লৈছে।
এয়া ক্ষতিপূৰণহে, দান নহয়: ভাৰত, চীন, আমেৰিকা যুক্তৰাষ্ট্ৰক উদ্দেশ্যি ক’লে নেপালে
আকস্মিকভাৱে সৃষ্ট ভয়াৱহ বানে তচনচ্ কৰা নেপাললৈ বিশ্বৰ বিভিন্ন দেশৰ লগতে ভাৰত, চীন আৰু আমেৰিকা যুক্তৰাষ্ট্ৰইও বিপুল পৰিমাণৰ সাহায্য সামগ্রী প্ৰেৰণ কৰিছে।
এনেদৰে সাহায্য সামগ্রী প্ৰেৰণ কৰাত ভাৰতকে ধৰি বিভিন্ন দেশক প্রধানমন্ত্রী শ্বাহসহ নেপাল চৰকাৰে প্ৰশংসা কৰিছিল। কিন্তু সময় অতিবাহিত হোৱাৰ লগে লগে নেপাল চৰকাৰে এই স্থিতি সলনি কৰিছে। সম্প্রতি নেপাল চৰকাৰে স্পষ্ট কৰি দিছে যে এই তিনি দেশৰ পৰা নেপালে সাহায্য বা দান-দক্ষিণা নহয় ক্ষতিপূৰণ পাবলৈ আছে।
নেপালৰ পৰা নগণ্য পৰিমাণৰহে সেউজগৃহ গেছ নির্গমন ঘটে বুলি উল্লেখ কৰি বৈদেশিক মন্ত্রী খনালে কয়, ‘আমি সৃষ্টি নকৰা এটা গোলকীয় সংকটৰ চৰম মূল্য ভৰিবলগা হৈছে। জলবায়ু পৰিৱৰ্তনৰ ফলত দ্রুততৰে হিমবাহ গলিছে আৰু পাৰ্বত্য ছুনামিৰ সৃষ্টি হৈছে। আমি আন্তর্জাতিক মঞ্চত পৰম দৃঢ়তা আৰু স্পষ্টতাৰে জলবায়ু পৰিৱৰ্তনৰ বিষয়টো উত্থাপন কৰিম। জলবায়ুজনিত কাৰণৰ বাবে অসুৰক্ষিত দেশসমূহে সম্মুখীন হোৱা লোকচানৰ ক্ষতিপূৰণ সেউজগৃহ গেছ সর্বাধিক নির্গত কৰা দেশসমূহৰ পৰা বিচাৰিম।’
উল্লেখ্য যে ভাৰতে ধাৰাবাহিকভাৱে জলবায়ু সমাংশক লৈ গুৰুত্ব আৰোপ কৰি আহিছে আৰু কম পৰিমাণৰ জনমুৰি নির্গমনৰ কথা দোহাৰি আহিছে। তৎসত্ত্বেও ভাৰতকো নেপালে সম্প্রতি বিশ্বৰ সৰ্বাধিক পৰিৱেশ প্রদূষণকাৰী দেশ আখ্যা দিছে। এই সম্পর্কত নেপালৰ বৈদেশিক মন্ত্রীজনে লগতে কয়, ‘যদি আমাৰ হিমালয়ৰ হিমবাহসমূহ নিঃশেষ হয় তেন্তে দক্ষিণ এছিয়াৰ দুশ কোটিৰ লোকৰ জল সুৰক্ষা স্থায়ীভাৱে আপোচ কৰিব লাগিব। আমি কেৱল নেপালৰ কথাটো উত্থাপন কৰিব বিচৰা নাই, সমগ্র দক্ষিণ এছিয়া সভ্যতাৰ বৰ্তি থকালৈ সক্রিয় হৈছো।’
পুনৰ নিৰ্মাণৰ বাবে ৪৭ হেজাৰ কোটিৰো অধিক টকাৰ প্ৰয়োজন
যোৱা ২৬ আগষ্টৰ পুৱা তিব্বতৰ পৰা বৈ অহা ভোটেকোশী নৈয়ে সৃষ্টি কৰা বিধ্বংসী বানে নেপালৰ এক বিস্তীর্ণ অঞ্চল ধ্বংসস্তুপত পৰিণত কৰে। এই জলপ্রলয়ত বহুসংখ্যক দলং, বাট-পথ, কমেও ১৩টা জলবিদ্যুৎ প্রকল্প, অনেক লোকৰ বাসগৃহ আদি চুৰমাৰ হয়। গতিকে এই অঞ্চলসমূহৰ পুনৰ নিৰ্মাণৰ বাবে কমেও পাঁচশ কোটি ডলাৰ (৪৭ হেজাৰ কোটিৰো অধিক টকা) ৰ প্ৰয়োজন হ’ব বুলি নেপাল চৰকাৰে ঠাৱৰ কৰিছে। সম্প্ৰতি নেপাল চৰকাৰে এই ধন ভাৰত, চীন আৰু আমেৰিকা যুক্তৰাষ্ট্ৰৰ পৰা আদায় কৰাৰ লক্ষ্য লৈছে।