Japan : দৈনিক অগ্ৰদূত ডিজিটেল ডেস্ক : প্ৰযুক্তিৰ দেশ জাপানক শান্তিপ্রিয় লোকৰ দেশ বুলিও কোৱা হয়। আশ্চর্যজনক যে এনে এখন দেশতে হেজাৰ হেজাৰ নিৰ্বোধ ভালুকক গুলীয়াই হত্যা কৰা হৈছে। যোৱা বছৰৰ জানুৱাৰীৰ পৰা চলিত বৰ্ষৰ এপ্রিললৈ দেশখনত ১৪ হেজাৰৰো অধিক ভালুক বধ কৰা হৈছে। নিধন কৰা ভালুকবোৰৰ মাজত ১২ হেজাৰ বাদামী ভালুক আৰু দুহেজাৰ ক’লা ভালুক আছে।
তদুপৰি আগন্তুক দিনত আৰু ৮,৮০০ ভালুক বধৰ পৰিকল্পনা কৰিছে জাপান চৰকাৰে।স্বাভাৱিকতে প্রশ্ন হয় দেশখনে কিয় এনেদৰে নির্বোধ প্রাণীবোৰ বোধ কৰিছে? ইয়াৰ কাৰণ হৈছে দেশখনৰ বহু লোক ভালুকৰ অতর্কিত আক্ৰমণৰ সন্মুখীন হৈছে।
আনকি ভালুকৰ আক্ৰমণ দেশখনৰ মৃত্যুৰ অন্যতম প্রধান কাৰকত পৰিণত হৈছে। বিগত কিছু বছৰত দেশখনৰ বহু লোকে ভালুকৰ আক্রমণত প্রাণ হেৰুৱায়। ইয়াৰ পৰা পৰিত্ৰাণৰ উপায় ৰূপে চৰকাৰে ভালুক বধৰ সিদ্ধান্ত গ্রহণ কৰে।
সেই অনুসৰি মাথোঁ এবছৰতকৈ কম সময়তে সূর্যোদয়ৰ দেশত ১৪ হেজাৰতকৈ অধিক ভালুক হত্যা কৰা হয়। উল্লেখ্য যে জাপানীসকলে গৰমৰ দিনত ভ্ৰমণ কৰা কাৰুইজাওয়ায়তে ভালুকৰ সংখ্যা অধিক।
গতিকে এই স্থানত ভ্রমণলৈ গৈ বহু জাপানী লোকে ভালুকৰ আক্ৰমণত প্রাণ হেৰুৱায়। গতিকে মানুহৰ প্ৰাণ ৰক্ষাৰ উদ্দেশ্যে জাপান চৰকাৰে ভালুক নিধনৰ সিদ্ধান্ত লয়। ১৯৯০ৰ পৰা জাপানত ভালুকৰ উপদ্রব বৃদ্ধি পাবলৈ ধৰে। ভালুকৰ উপদ্ৰৱ নিয়ন্ত্ৰণৰ বাবে কেতবোৰ সংস্থাই কাম কৰি আছে।
এনে এটা সংস্থা হ’ল পিকিও। এই সংস্থাই ভালুক দেখা পালেই তিনিটা কুকুৰ ঘটনাস্থলীত হাজিৰ কৰে। এই কুকুৰবোৰক ভালুক খেদি পঠিওৱাৰ বাবে বিশেষ প্রশিক্ষণ দিয়া হয়। তদুপৰি সংস্থাটোরে বিশেষ চেতনানাশক প্রয়োগ কৰি ভালুক গভীৰ জংঘললৈ ওভতাই পঠোৱাৰ ব্যৱস্থা কৰে।
কিন্তু এই প্ৰতিৰোধমূলক ব্যৱস্থাই অৱশেষত কাম নিয়া হোৱাত চৰকাৰে ভালুক নিধনৰ আঁচনি গ্ৰহণ কৰে। সেই অনুসৰি ভালুক দেখা মাত্রেই গুলীয়াই হত্যা কৰাৰ দায়িত্ব দিয়া হয় একাংশক। উল্লেখ্য যে জাপানত ভালুকৰ উপদ্ৰব্যৰ বাবে ইংলণ্ডকে ধৰি বিভিন্ন দেশে জাপান ভ্রমণৰ সময়ত সতর্কতা অৱলম্বন কৰিবলৈ নাগৰিকসকলৰ প্রতি আহ্বানো জনাই থৈছে।
উল্লেখ্য যে যোৱা বছৰ জাপানৰ ভালুকৰ আক্ৰমণৰ বলি হয় ২৩০জন লোক। ইয়াৰে ১৩জনৰ মৃত্যু হয়। চৰকাৰী তথ্য অনুসৰি, যোৱা বছৰতকৈ এইবাৰ দেশখনত ভালুকৰ আক্রমণ ২০ শতাংশ বৃদ্ধি পায়। সেয়েহে চৰকাৰে অধিক ভালুক নিধনৰ আঁচনি লৈছে।
