Batadova Protest::তেজ দিম কিন্তু বটদ্ৰৱা থানা নিদিওঁ। এই হুংকাৰৰে শ্ৰীকৃষ্ণৰ জন্মাষ্টমীৰ দিনটোতে প্ৰতিবাদত বহিল গুৰুজনাৰ ওপজাভূমি বটদ্ৰৱা থানৰ কীৰ্তনঘৰৰ সন্মুখত সমবেত হ’ল ভকত বৈষ্ণৱ আৰু আইমাতৃ সকল৷
শেহতীয়াকৈ ৰাজ্য চৰকাৰে বটদ্ৰৱা থানকে আদি কৰি শলগুৰি, নৰোৱা সত্র এলেকা জাজৰি থানাৰ অন্তৰ্গত হোৱাৰ নিৰ্দেশনা জাৰি কৰে৷ যাৰ পৰিপ্ৰেক্ষিতত চৰকাৰী নিৰ্দেশনাৰ বিৰুদ্ধে শুকুৰবাৰে গৰজি উঠে বটদ্ৰৱা থানৰ ভকত বৈষ্ণৱ, আইমাতৃ সকল৷
প্ৰতিবাদত অংশ লোৱা শলগুৰি, নৰোৱা সত্ৰৰ লগতে দাঁতি কাষৰীয়া ৰাইজে প্ৰতিবাদ সাব্যস্ত কৰি মুখ্যমন্ত্ৰীলৈ আকুল আহ্বানেৰে কয়,মুখ্যমন্ত্ৰী মহোদয়, আমাক আমাৰ অস্তিত্ব ঘুৰাই দিয়ক। মিঞাৰ সন্ত্ৰাসৰ পৰা ৰক্ষা পাবলৈ আমাক বটদ্ৰৱা থানা দিয়ক।
উল্লেখ্য যে পূৰ্বৰ বটদ্ৰৱা বিধানসভা সমষ্টি ইতিমধ্যেই সমষ্টি পুনৰ্নিদ্ধাৰণৰ পাছত নিজৰ অস্তিত্ব হেৰুৱাই নগাঁও সদৰ সমষ্টিৰ স’তে একত্ৰিত । ইয়াৰ লগে লগে
ক্ৰমান্বয়ে বটদ্ৰৱা উন্নয়ন খণ্ড, বটদ্ৰৱা জিলা পৰিষদ, বটদ্ৰৱা সত্ৰ গাঁও পঞ্চায়ত স্থানান্তৰ কৰা হয়৷ বৃহত্তৰ বটদ্ৰৱাৰ আইন শৃংখলা পৰিস্থিতি আৰু নিৰাপত্তাৰ বাবে বটদ্ৰৱা থানৰ সমীপতে বটদ্ৰৱা থানাখন এতিয়া জাজৰি থানাৰ অন্তৰ্গত কৰাৰ সমান্তৰালভাৱে শলগুৰি, নৰোৱা সত্র এলেকাকো জাজৰি থানাৰ পৰিসীমাত পেলোৱাক লৈ তীব্ৰ প্ৰতিক্ৰিয়া সৃষ্টি হয়৷ বটদ্ৰৱা থানা খন হঠাতে নোহোৱা কৰাৰ চৰকাৰী সিদ্ধান্ত অবিলম্বে বাতিল কৰাৰ দাবীত আজি প্ৰতিবাদত বহিবলৈ বাধ্য হ’ল বটদ্ৰৱা থানৰ ভকত বৈষ্ণৱ, আইমাতৃ সকল৷
