SoniaGandhi : দৈনিক অগ্ৰদূত ডিজিটেল ডেস্ক :ছোনিয়া গান্ধীৰ স্মৃতিকথা ‘বিলংগিং: এ জাৰ্নি অৱ লাভ’ নিৰ্ধাৰিত সময় অৰ্থাৎ অহা ১০ নৱেম্বৰতে প্ৰকাশ পাব। পেংগুইন ৰেণ্ডম হাউছ নামৰ প্ৰকাশন সংস্থাই কিতাপখন প্ৰকাশ কৰিবলৈ অস্বীকাৰ কৰাৰ পাছত নতুন প্ৰকাশক বিচাৰি উলিয়াইছে ছোনিয়াই।
এইবাৰ কিতাপখন প্ৰকাশ কৰিব হাৰ্পাৰ কলিন্স ইণ্ডিয়াই। সংস্থাটোৰ তৰফৰ পৰা ছ’চিয়েল মিডিয়াযোগে ছোনিয়াৰ কিতাপ প্ৰকাশৰ কথা ঘোষণা কৰা হৈছে।
প্ৰাথমিকভাৱে ছোনিয়া গান্ধীৰ স্মৃতিকথা প্ৰকাশ কৰাৰ কথা আছিল পেংগুইন ৰেণ্ডম হাউছ নামৰ প্ৰকাশন সংস্থাটোৰ। কিন্তু সূত্ৰৰ মতে, কিতাপখনত উল্লেখ কৰা কিছু তথ্যক লৈ আপত্তি থকাৰ বাবেই কিতাপখন প্ৰকাশ কৰিবলৈ অস্বীকাৰ কৰে পেংগুইনে।
সূত্ৰৰ খবৰ অনুসৰি, সংস্থাটোৰ তৰফৰ পৰা ছোনিয়াক কিতাপখনৰ পাণ্ডুলিপিত কিছু পৰিৱৰ্তন কৰাৰ প্ৰস্তাৱ দিয়া হৈছিল। কিন্তু সেই প্ৰস্তাৱ মানি ল’বলৈ সন্মত নাছিল ছোনিয়া। সেই কাৰণতে প্ৰকাশন সংস্থাটোৱে পিছুৱাই যায়।
যদিও কংগ্ৰেছে পোনপটীয়াকৈ অভিযোগ কৰিছে যে বিজেপিৰ হেঁচাতেই পেংগুইন পিছুৱাই গৈছে। দলটোৰ ছ’চিয়েল মিডিয়া হেণ্ডেলসমূহত পেংগুইনক লৈ তীব্ৰ সমালোচনাও আৰম্ভ হয়।
ইয়াৰ মাজতে নতুন প্ৰকাশক বিচৰাৰ কাম চলি আছিল। পেংগুইন আঁতৰি যোৱাৰ পাছত প্ৰথমে আগ্ৰহ প্ৰকাশ কৰে হাৰ্পাৰ কলিন্স ইণ্ডিয়াই। অৱশেষত তেওঁলোকৰ সৈতেই চুক্তি চূড়ান্ত হয় কংগ্ৰেছ সভানেত্ৰীগৰাকীৰ।
ছ’চিয়েল মিডিয়াত হাৰ্পাৰ কলিন্সে কয়, “ছোনিয়া গান্ধীৰ ‘বিলংগিং: এ জাৰ্নি অৱ লাভ’ আমি প্ৰকাশ কৰিম। ভাৰতত অহা ১০ নৱেম্বৰতে কিতাপখন প্ৰকাশ পাব। এই সময়ৰ আটাইতকৈ বহুল প্ৰতীক্ষিত ৰাজনৈতিক স্মৃতিকথাখন প্ৰকৃততে ভালপোৱা, কৰ্তব্য আৰু পৰিচয়ৰ কাহিনী। এই কিতাপখনত ভাৰতৰ এতিয়ালৈকে চলি অহা যাত্ৰাৰ এক বিৰল আভ্যন্তৰীণ দৃষ্টিভংগী পোৱা যাব।”
তাৎপৰ্যপূৰ্ণ বিষয়টো হৈছে, ভাৰতৰ বাহিৰত কিতাপখন প্ৰকাশ কৰিব আলফ্ৰেড এ. নফ নামৰ প্ৰকাশন সংস্থাই। এই সংস্থাটোৰ সৈতে পেংগুইন ৰেণ্ডম হাউছ ইণ্ডিয়াৰ পোনপটীয়া সম্পৰ্ক আছে। অথচ ভাৰতত কিতাপখন প্ৰকাশ কৰিবলৈ অস্বীকাৰ কৰে পেংগুইনে। অৱশেষত তেওঁলোকৰ স্থান ল’লে হাৰ্পাৰ কলিন্সে।
কিতাপখনত লণ্ডনৰ কেমব্ৰিজত ৰাজীৱ গান্ধীৰ স’তে ছোনিয়াৰ চিনাকি, প্ৰেম আৰু বিবাহৰ পৰা আৰম্ভ কৰি ইন্দিৰা গান্ধী আৰু ৰাজীৱ গান্ধীৰ হত্যাকাণ্ড, ভাৰতীয় ৰাজনীতিত তেওঁৰ প্ৰৱেশ, ২০০৪ চনত প্ৰধানমন্ত্ৰী হোৱাৰ প্ৰস্তাৱ প্ৰত্যাখ্যান কৰাৰ দৰে বিষয়সমূহ সন্নিৱিষ্ট কৰা হৈছে।
প্ৰকাশকৰ তৰফৰ পৰা জনোৱা অনুসৰি, কিতাপখনত নেহৰু-গান্ধী পৰিয়ালৰ সৈতে তেওঁৰ ব্যক্তিগত আৰু ৰাজনৈতিক জীৱনৰ বহু অজানা অধ্যায়ো উন্মোচিত হ’ব। ইটালীৰ এখন সৰু চহৰত কটোৱা শৈশৱ, কেমব্ৰিজত ৰাজীৱ গান্ধীৰ সৈতে পৰিচয় আৰু প্ৰেম তথা ভাৰতৰ ৰাজনৈতিক পৰিয়ালত প্ৰৱেশৰ অভিজ্ঞতাও কিতাপখনত তুলি ধৰা হৈছে।
১৯৮৪ চনত শাহু ইন্দিৰা গান্ধীৰ হত্যাকাণ্ড আৰু ১৯৯১ চনত স্বামী ৰাজীৱ গান্ধীৰ হত্যাৰ পাছত কেনেদৰে তেওঁ ৰাজনীতিৰ কেন্দ্ৰলৈ আহিছিল, সেই বেদনাদায়ক অধ্যায়ো কিতাপখনত স্থান লাভ কৰিছে।
তেওঁৰ ৰাজনৈতিক কেৰিয়াৰৰ সৰ্বোচ্চ পৰ্যায় অৰ্থাৎ ২০০৪ চনত প্ৰধানমন্ত্ৰী হোৱাৰ সুযোগ কিয় হাতৰ পৰা আঁতৰি গ’ল, সেই বিষয়েও কিতাপখনত বিস্তৃতভাৱে লিখা আছে বুলি সূত্ৰৰ খবৰ।
