NHAI Road Accident
সোণাপুৰ ৪ ছেপ্টেম্বৰ :অৱশেষত যোৱা ৩০ আগষ্টত ক্ষেত্ৰীৰ নলগেডেৰাৰ ৰাষ্ট্ৰীয় ঘাইপথত হোৱা শোকাবহ পথ দূৰ্ঘটনাৰ বাবে ৰাষ্ট্ৰীয় ঘাইপথ প্ৰাধিকৰণ আৰু ঠিকাদাৰী প্ৰতিষ্ঠানক জগৰীয়া কৰি ডিমৰীয়াৰ বিভিন্ন দল- সংগঠনসমূহে আজি ক্ষেত্ৰী থানাত এজাহাৰ দাখিল কৰে।আজি সন্ধ্যা ডিমৰীয়া জিলা জনজাতি সংঘ, সোণাপুৰ আঞ্চলিক ছাত্ৰ সন্থা, কোচ ৰাজবংশী ছাত্ৰ সন্থা মহানগৰ জিলা সমিতি, চাহ জনজাতি ছাত্ৰ সন্থা ডিমৰীয়া সমিত, বৃহত্তৰ ডিমৰীয়া নাগৰিক সুৰক্ষা সমিতি, ডিমৰীয়া জিলা গাৰো ইউনিয়ন, সদৌ অসম গৰীয়া জাতীয় পৰিষদ ডিমৰীয়া সমিতি, ডিমৰীয়া চাহ জনজাতি ভূমি সুৰক্ষা সমিতি, ইউ বি পি এফ মহানগৰ সমিতি, ক্ষেত্ৰী আঞ্চলিক ছাত্ৰ সন্থা, কাৰ্বি ছাত্ৰ সন্থা আৰু সোণাপুৰ আঞ্চলিক উন্নতি সভাই ঘাইপথ প্ৰাধীকৰণ তথা ঠিকাদাৰী প্ৰতিষ্ঠান, অভিযন্তাৰ অদূৰদৰ্শিতা তথা চূড়ান্ত হেমাহিৰ বাবে উক্ত দূৰ্ঘটনা হোৱা বুলি আৰু তেওঁলোকৰ বিৰুদ্ধে কঠোৰ ব্যৱস্থা গ্ৰহণৰ দাবীৰে এজাহাৰ দাখিল কৰে।
এজাহাৰত খানাপাৰাৰ পৰা বৃহত্তৰ ডিমৰীয়াৰ টোপাতলীলৈ আহ- যাহ কৰা ২৭নং চাৰিপথযুক্ত ৰাষ্ট্ৰীয় ঘাইপথৰ প্ৰায় ৩০ কিলোমিটিৰ পথ বহু ক্ৰতিপূৰ্ণ ভাবে নিৰ্মান কৰা বুলি অভিযোগ দাখিল কৰা হৈছে।ঘাইপথ প্ৰাধীকৰণৰ আওঁকণীয়া মনোভাবৰ বাবেই পথচোৱা সম্প্ৰতি যঠেষ্ট জৰাজীৰ্ণ হৈ পৰা বুলি উল্লেখ কৰি পথচোৱা যঠেষ্ট খলা-বমা,অবৈজ্ঞানিকভাবে কেঁকুৰী নিৰ্মান, মূল পথতকৈ ঠায়ে ঠায়ে দলং ঠেক, দ’ দ’ গাতৰ সৃষ্টি হৈ যাতায়তী ক্ষেত্ৰত ভীষন অসুবিধা সন্মুখীন হব লগা হৈছে বুলি কোৱা হৈছে।তদুপৰি এজাক বৰষুণ দিলেই জোৰাবাট, নমাইল ,জুবিনক্ষেত্ৰ,তেতেলীয়া আদি অঞ্চলত কৃত্ৰিম বানৰ সৃষ্টি হৈ ৰাইজক দূৰ্বিসহ যাতনা ভুগাই আহিছে। স্থানীয় দল- সংগঠনসমূহে বিভিন্ন সময়ত ঘাইপথচোৱা পুনৰ মেৰামতি কৰিবলৈ দাবী উত্থাপন কৰি আহিছে যদিও এই ক্ষেত্ৰত ঘাইপথ প্ৰাধীকৰণে আওঁকনীয়া মনোভাৱ পোষন কৰাৰ বুলি অভিযোগ কৰা হৈছে। যাৰফলত অঞ্চলটোত সঘনাই দূৰ্ঘটনা সংঘটিত হৈ অকালতে বহুজনে মৃত্যু সাৱতি লব লগা হৈছে, বহু জনে অকাল পংগুত্বক আকোঁৱালি লব লগা হৈছে। ২০২৫- ২৬ বৰ্ষটোতে অঞ্চলটোত কমেও ৪০জন লোকে দূৰ্ঘটনাত প্ৰাণ হেৰুৱাব লগা হৈছে।একেদৰে যোৱা ৩০ আগষ্টত ক্ষেত্ৰীৰ নলগেডেৰাত ট্রেভেলাৰ আৰু ট্ৰাকৰ মাজত শোকাবহ পথ দূৰ্ঘটনা সংঘটিত হৈ কৰুণভাবে সাতজন ব্যক্তি মৃত্যু মুখত পৰাৰ লগতে দহজনৰো অধিক লোক গুৰুতৰভাবে আহত হৈ চিকিৎসাধীন হৈ থাকিব লগা হৈছে। একমাত্ৰ ৰাষ্ট্ৰীয় ঘাইপথ প্ৰাধিকৰণ নামৰ সংস্থাটোৰ ৰাষ্ট্ৰীয় ঘাইপথৰ ক্ৰতিপূৰ্ণ আন্তঃগাঁথনি ,অভিযন্তাৰ অকর্মণ্যতা, সংশ্লিষ্ট ঠিকাদাৰৰ গাফিলটিৰ বাবে অঞ্চলটোত এনেবোৰ দূৰ্ঘটনা সংঘটিত হৈ আছে বুলি অভিযোগ কৰা হৈছে। লক্ষ্যনীয় ভাবে ক্ষেত্ৰীৰ নডগেডেৰাৰ দূৰ্ঘটনাৰ পাছতে ৰাইজৰ দাবীত প্ৰশাসনে ৰাষ্ট্ৰীয় ঘাইপথ প্ৰাধিকৰণৰ দুই বিষয়াক আটক কৰিছিল যদিও ঘটনাৰ ২৪ ঘণ্টা নহওঁতেই আশ্বাৰ্যজনকভাবে মুকলি কৰি দিয়া বুলি এজাহাৰত ক্ষোভ ব্যক্ত কৰা হৈছে।কোনো পথ সুৰক্ষা ব্যৱস্থা নকৰকৈয়ে কেৱল টেটু চেপা দি টোল কৰ সংগ্ৰহতহে ঘাইপথ প্ৰাধীকৰণ ব্যস্ত হৈ পৰিছে।সেয়ে ক্ষেত্ৰীৰ নলগেডেৰাৰ শোকাবহ পথ দুৰ্ঘটনাৰ খলনায়ক ঘাইপথ প্ৰাধীকৰণৰ বিষয়া-কৰ্মচাৰী, ঠিকাদাৰী প্ৰতিষ্ঠানৰ ওপৰত তদন্ত কৰি অতি সোণকালে আইনী ব্যৱস্থা গ্ৰহণ কৰাৰ লগতে কঠোৰ শাস্তি বিহিবলৈ এজাহাৰত দাবী জনোৱা হৈছে। তদুপৰি যোৱা ৩০ আগষ্টৰ দূৰ্ঘটনাত নিহত সকলক ঘাইপথ প্ৰাধীকৰণৰ তৰফৰ পৰা২০ লাখ আৰু আহত সকললৈ ৫ লাখ টকাৰ ক্ষতি পূৰণ দিয়াৰ দাবী জনোৱা হৈছে।
