ChineseEntrepreneur: দৈনিক অগ্ৰদূত ডিজিটেল ডেস্ক : কেতিয়াবা দেহৰ কোনো অংশ খজুৱালে আপুনি আনক খজুৱাই দিবলৈ অনুৰোধ কৰে নেকি? সম্ভৱতঃ সমাজত এনে লোক থকাৰো ধাৰণা কৰি চীনৰ এজন যুৱকে আনৰ গা খজুৱাই দিয়া দুখন বিপণী খোলে।
আশ্চর্যজনক যে এই বিপণী দুখনৰ পৰা তেওঁ মাহিলি এক লাখ ইউৱান অৰ্থাৎ ভাৰতীয় মুদ্রাৰ হিচাপত মাহিলি দুই লাখ টকাকৈ আয় কৰিবলৈ সক্ষম হৈছে। এই অভিনৱ ব্যৱসায়িক ধাৰণাৰে প্ৰতিষ্ঠা অৰ্জন কৰা এই যুৱকজন হ’ল শ্বেনজেনৰ জাং ক্সিআকিয়াও।
সম্প্রতি ৩২ বছৰীয়া জাঙে তেওঁৰ গা খজুৱাই দিয়া বিপণী দুখনত প্রশিক্ষিত কৰ্মচাৰীও ৰাখিছে। মাছাজ পাৰ্লাৰৰ দৰে তেওঁৰ বিপণীত গ্রাহকক বিছনাত শুৱাই কৰ্মচাৰীয়ে গা খজুৱাই দিয়ে। যোৱা মে’ত জাঙে শেনজেনৰ বাওৱান জিলাত এনে প্রথমখন বিপণী খোলে।
গ্রাহক বৃদ্ধি পোৱাত তেওঁ কিছুদিনৰ ভিতৰতে দ্বিতীয়খন বিপণী মুকলি কৰে। তেওঁৰ দ্বিতীয় বিপণীখন ফুচিয়ান জিলাত অৱস্থিত। তেওঁৰ এই বিপণী ছুমা বেও নামেৰে জনাজাত। তেওঁৰ বিপণীত গা খজুৱাবলৈ হ’লে এজন গ্রাহকে ঘণ্টাত তিনিশ ইউৱান অর্থাৎ ৪২শ টকা পৰিশোধ কৰিব লাগে।
বিপণীৰ কৰ্মচাৰীয়ে বিশেষভাৱে তৈয়াৰী নখ লৈ মিহি মিহিকৈ গ্রাহকজনৰ গা খজুৱাই দিয়ে। ইয়াৰ দ্বাৰা গ্ৰাহকে আৰাম অনুভৱ কৰি টোপনিত ঢলিও পৰে। আনকি বহু সময়ত গ্ৰাহকৰ মুখৰ পৰা প্ৰাণখোলা হাঁহিও নির্গত হয়। গতিকে বহুতে জাঙৰ বিপণীত গা খজুৱাবলৈ ইচ্ছা প্রকাশ কৰে।
ফলত তেওঁৰ দুই বিপণীত পুৱাৰে পৰা গ্ৰাহকৰ লানি নিছিগা শাৰীৰ সৃষ্টি হয়। ইয়াৰ সুবাদত তেওঁৰ মাহিলি আয় ১৪ লাখ টকা পর্যন্ত হৈছে। স্বাভাৱিকতে চীনত পূর্বে এনে অভিনৱ ধাৰণাৰ ব্যবসায় নাছিল।
গতিকে এই বিপণী খোলাৰ সময়ত জাঙে উদাহৰণৰূপে কাকো অনুকৰণ কৰিব পৰা নাছিল। গতিকে তেওঁ নিজা ধাৰণাৰে ব্যৱসায়ত আগবাঢ়িবলগীয়া হয়। আনকি তেওঁ কৰ্মচাৰীসকলকো নিজৰ মনত খেলোৱা ধাৰণাৰে প্ৰশিক্ষণ প্রদান কৰিবলগীয়া হয়।
গতিকে তেওঁ কেনেদৰে খজুৱালে আনে ভাল পায় তাৰ কৌশল উদ্ভাৱনৰ বাবে গৱেষণাও কৰিবলগীয়া হয়। এনে গৱেষণাৰ জৰিয়তে উদ্ভাৱন কৰা পদ্ধতি তেওঁ কৰ্মচাৰীসকলক শিকায়। স্বাভাৱিকতে প্ৰথম অৱস্থাত এই অগতানুগতিক সফলতাৰ মুখ দেখিবলৈ সক্ষম হয় নে নহয় তাক লৈ জাং সন্দিহান আছিল।
এই সম্পর্কত তেওঁ সাংবাদিকৰ আগত কয়, ‘দেখা যায় যে বৃহৎ মহানগৰসমূহৰ মানুহ সাধাৰণতে উচ্চ মানসিক চাপত থাকে। গতিকে আনে গা খজুৱাই দিলে এনে লোকে মনত প্রশান্তি অনুভৱ কৰে বুলি ধাৰণা হয়।’
গ্রাহকেও এনে কথা কয় বুলি উল্লেখ কৰি যুৱকজনে লগতে কয়, ‘কিছু সংখ্যক গ্রাহকে কয় যে আমি আগবঢ়োৱা সেৱাই মাছাজতকৈ মনত অধিক প্রশান্তি দিয়ে।’ গতিকে তেওঁৰ দুয়োখন বিপণীত গ্ৰাহকৰ নিতৌ ভিৰ লাগে বুলি যুৱকজনে অনুভৱ ব্যক্ত কৰিছে। অৱশ্যে জাঙে পূৰ্বৰে পৰা উদ্যমিতা খণ্ডৰ স’তে জড়িত। ৩০ বছৰ বয়সত ভৰি দিয়াৰ পূৰ্বেই তেওঁ ই-কমার্চ খণ্ডত সফলতা অর্জন কৰে।
