DrugTrafficking : নিশা বিজনীৰ শিয়ালমাৰীত আৰক্ষীৰ অভিযানত বুজন পৰিমাণৰ সন্দেহযুক্ত হেৰ’ইনসহ গ্ৰেপ্তাৰ কৰে দুটা ড্ৰাগছ সৰবৰাহকাৰীক।
ড্ৰাগছ সৰবৰাহকাৰী ক্ৰমে মাকমাদুল হাছান(২৫) আৰু আবু ছুফিয়ানে(২৮) AS 01EG 1499 নম্বৰৰ মাৰুতি ছুইফট ডিজে’আৰ বাহনেৰে বৰপেটাৰ পৰা বিজনী অভিমুখে আহি থকা অৱস্থাত আৰক্ষীৰ জালত পৰে।
বিজনী মহকুমা আৰক্ষী বিষয়া ৰূপজ্যোতি দত্ত আৰু বিজনী থানাৰ ভাৰপ্ৰাপ্ত বিষয়া জিতুমণি দাসৰ নেতৃত্বত যোৱা এটা আৰক্ষীৰ দলে চলোৱা অভিযানত ধৃত সৰবৰাহকাৰী দুটাৰ পৰা ৩ পেকেট চাবোনৰ বাকচভৰ্তি সন্দেহযুক্ত হেৰ’ইন তিনিটা মোবাইল ফোন লগতে গাড়ীখন জব্দ কৰে।
তথ্য অনুসৰি,সন্দেহযুক্ত হেৰ’ইন সমূহৰ ওজন সৰ্বমুঠ ৩৫.১৯ গ্ৰাম হোৱাৰ বিপৰীতে ইয়াৰ বজাৰ মূল্য ২.৫ লাখ টকা ।
সম্প্ৰতি ড্ৰাগছ সৰবৰাহকাৰী দুটাক বিজনী থানাত ৰাখি অধিক তথ্যৰ বাবে তদন্ত অব্যাহত ৰাখিছে আৰক্ষীয়ে।
ধৃত সৰবৰাহকাৰী দুয়োটাৰে ঘৰ বঙাইগাঁও জিলাৰ মাণিকপুৰ থানাৰ অন্তৰ্গত গেৰুকাবাৰীত।
