CJP : দৈনিক অগ্ৰদূত ডিজিটেল ডেস্ক : ককৰ’চ জনতা পাৰ্টি (CJP)ৰ প্ৰতিষ্ঠাপক তথা আহ্বায়ক অভিজিৎ দীপকেক আটক কৰিছে আৰক্ষীয়ে। শনিবাৰে পুৱা দিল্লী বিমানবন্দৰত তেওঁৰ বিমান অৱতৰণ কৰাৰ লগে লগে তাত উপস্থিত হয় আৰক্ষী। বিমানখনত সৌৰভ দাস আৰু আশুতোষ ৰাংকাও আছিল। আৰক্ষীয়ে বিমানত উঠি তেওঁলোকক আটক কৰে। সেই সময়ত বিমানখনৰ আন যাত্ৰীসকলক থিয় কৰাই ৰখা হৈছিল বুলি অভিযোগ উত্থাপন হৈছে। দীপকেসকলে মুম্বাইৰ পৰা দিল্লীলৈ আহিছিল। পুৱা ১০ বাজি ১৯ মিনিটত তেওঁলোকৰ বিমান দিল্লী বিমানবন্দৰত অৱতৰণ কৰে। তাৰ পাছতে তেওঁলোকক আটক কৰা হয়।
শনিবাৰে দীপকেসকলৰ বিমান দিল্লীত অৱতৰণ কৰাৰ লগে লগে তৎপৰ হৈ পৰে আৰক্ষী। আৰক্ষীৰ লোক পূৰ্বৰে পৰাই বিমানবন্দৰত অপেক্ষা কৰি আছিল। তেওঁলোকৰ মাজত বহু মহিলা আৰক্ষীকৰ্মীও আছিল। দীপকে, সৌৰভ আৰু আন নেতাসকলে বিমানৰ ভিতৰৰ পৰাই ইনষ্টাগ্ৰামত ‘লাইভ’ কৰে। পোনপটীয়া সম্প্ৰচাৰত তেওঁলোকৰ স’তে আৰক্ষীৰ বাক-বিতণ্ডা হোৱা দেখা যায়। দীপকে জনাই দিয়ে যে গ্ৰেপ্তাৰ হ’ব বুলি জানিও তেওঁ দিল্লীলৈ আহিছে। মহিলা আৰক্ষীকৰ্মীসকলক উদ্দেশ্যি তেওঁ কয়, “আমি বিমানৰ পৰা নামি নোযোৱালৈকে আপোনালোকে অপেক্ষা কৰিব পাৰিলেহেঁতেন! আহক, আমাক গ্ৰেপ্তাৰ কৰক। গ্ৰেপ্তাৰ হ’বলৈকে আহিছোঁ। আমি ভয় নকৰোঁ।”
দীপকে, ৰাংকা আৰু সৌৰভক আটক কৰাৰ বিষয়টো দিল্লী আৰক্ষীৰ এগৰাকী জ্যেষ্ঠ বিষয়াই নিশ্চিত কৰিছে। তেওঁ জনোৱা অনুসৰি, CJPৰ নেতাসকলক আটক কৰিবলৈ দিল্লীৰ দক্ষিণ-পশ্চিম জিলা আৰক্ষীক বিমানবন্দৰত নিয়োগ কৰা হৈছিল।
দীপকেসকলক আটক কৰাৰ পাছতে CJPয়ে এটা বিবৃতি প্ৰকাশ কৰে। বিবৃতিটোত কোৱা হৈছে, “শান্তিপূৰ্ণ প্ৰতিবাদী কাৰ্যসূচীৰ নেতৃত্বক প্ৰতিবাদস্থলীত উপস্থিত হোৱাৰ পূৰ্বেই বাধা দিয়াৰ বাবে এয়া দিল্লী আৰক্ষীৰ পূৰ্বপৰিকল্পিত পদক্ষেপ। সকলোৰে চলাচলৰ স্বাধীনতা আছে। এই অধিকাৰ খৰ্ব কৰাৰ ঘটনাক CJPয়ে তীব্ৰ গৰিহণা দিছে। দীপকে, দাস আৰু ৰাংকাক অবিলম্বে বিনাচৰ্তে মুকলি কৰি দিয়াৰ দাবী জনোৱা হৈছে।”
ইয়াৰ পূৰ্বে যন্তৰ মন্তৰ অভিমুখে ৰাওনা হোৱাৰ আগতে গুৰুগ্ৰামৰ বাসগৃহৰ পৰা ইউটিউবাৰ ধ্ৰুৱ ৰাঠীকো আটক কৰিছিল আৰক্ষীয়ে। তেওঁক দিল্লীলৈ নাযাবলৈ অনুৰোধ জনোৱা হৈছিল। কিন্তু তেওঁ সেই অনুৰোধ ৰক্ষা নকৰাৰ অভিযোগ উত্থাপন হৈছে। ইয়াৰ উপৰি ইণ্টাৰনেটত জনপ্ৰিয় কেবাগৰাকীও ব্যক্তি আৰু CJPৰ একাধিক নেতাক আৰক্ষীয়ে আটক কৰিছে।
সূত্ৰৰ খবৰ অনুসৰি, শুকুৰবাৰে নিশাৰ পৰা শনিবাৰে পুৱালৈকে ৫০০ৰো অধিক লোকক আটক কৰা হৈছে।
CJPৰ নেতা সৌৰভে জনোৱা অনুসৰি, দলটোৰ আইনী বিষয়সমূহ চোৱাচিতা কৰা ৰত্না সিংহকো শনিবাৰে পুৱা আৰক্ষীয়ে আটক কৰে। ৰত্না অধিবক্তাসকলৰ প্ৰতিবাদী কাৰ্যসূচীত অংশগ্ৰহণ কৰিবলৈ গৈ থকাৰ সময়তে আৰক্ষীয়ে তেওঁক বাধা দিয়ে।
CJPৰ প্ৰতিবাদী কাৰ্যসূচীক কেন্দ্ৰ কৰি শুকুৰবাৰে নিশাৰ পৰাই ধৰপাকড় আৰম্ভ কৰিছে আৰক্ষীয়ে। দিল্লীৰ ৪৫টা মেট্ৰ’ ষ্টেচন বন্ধ কৰি ৰখা হৈছে। কেবাটাও স্থানত ১৬৩ ধাৰা জাৰি কৰা হৈছে। ইণ্টাৰনেট সেৱা বন্ধ কৰি দিয়া হৈছে।
শনিবাৰে পুৱাৰ পৰা দুপৰীয়ালৈকে দিল্লী অভিমুখী সকলো মেইল আৰু এক্সপ্ৰেছ ৰে’ল বাতিল কৰা হৈছে। পুৱাৰে পৰা যন্তৰ মন্তৰৰ আশে-পাশে থকা অঞ্চলত মাইকযোগে আৰক্ষীয়ে ঘোষণা কৰি আছে।
