DhruvRathee : দৈনিক অগ্ৰদূত ডিজিটেল ডেস্ক : দিল্লীত ককৰ’চ জনতা পাৰ্টি (CJP)ৰ আহ্বানত অনুষ্ঠিত হ’বলগীয়া প্ৰতিবাদী কাৰ্যসূচীত অংশগ্ৰহণ কৰিব বুলি পূৰ্বেই ঘোষণা কৰিছিল ইউটিউবাৰ ধ্ৰুৱ ৰাঠীয়ে। শনিবাৰে পুৱা যন্তৰ মন্তৰ অভিমুখে ৰাওনা হোৱাৰ পূৰ্বে গুৰুগ্ৰামৰ বাসগৃহৰ পৰা তেওঁক আটক কৰা হয়। অভিযোগ অনুসৰি, আৰক্ষীৰ নিৰ্দেশ অমান্য কৰিছিল ধ্ৰুৱই।
CJPৰ প্ৰতিবাদী কাৰ্যসূচীক কেন্দ্ৰ কৰি দিল্লীক প্ৰায় দুৰ্গত পৰিণত কৰিছে কেন্দ্ৰীয় চৰকাৰে। শুকুৰবাৰে নিশাৰ পৰা চহৰখনৰ ৪৫টা মেট্ৰ’ ষ্টেচন বন্ধ কৰি ৰখা হৈছে। পুৱাৰ পৰা দুপৰীয়ালৈকে দিল্লী অভিমুখী সকলো মেইল আৰু এক্সপ্ৰেছ ৰে’ল বাতিল কৰা হৈছে। ইয়াৰ লগতে পুৱাৰে পৰা ৰাজধানীৰ ৰাজপথত ব্যাপক হাৰত আৰক্ষী নিয়োগ কৰা হৈছে।
কেন্দ্ৰীয় অৰ্ধসামৰিক বাহিনীও নিয়োগ কৰা হৈছে। সমাৱেশ আৰু প্ৰতিবাদী কাৰ্যসূচীৰ বিৰুদ্ধে মাইকযোগে ঘোষণা চলি আছে।
এনে পৰিস্থিতিতে শনিবাৰে পুৱাই গুৰুগ্ৰামৰ ছেক্টৰ ৫৬ৰ চেণ্ট্ৰেল বিহাৰ ছ’চাইটিত থকা ধ্ৰুৱৰ বাসগৃহত উপস্থিত হয় আৰক্ষী। সূত্ৰৰ খবৰ অনুসৰি, তেওঁক যন্তৰ মন্তৰলৈ নাযাবলৈ অনুৰোধ জনোৱা হৈছিল। কিন্তু তেওঁ সেই অনুৰোধ ৰক্ষা নকৰাত আৰক্ষীয়ে তেওঁক আটক কৰে।
ধ্ৰুৱৰ বিৰুদ্ধে আৰক্ষীৰ এই পদক্ষেপক গৰিহণা দি সামাজিক মাধ্যমত সৰৱ হৈ পৰিছে CJP। দলটোৱে লিখিছে, “ধ্ৰুৱ ৰাঠীক আটক কৰা হৈছে। একনায়কত্ববাদী শাসক সেইসকল যুৱক-যুৱতীক দেখি আতংকিত, যিসকলে তেওঁৰ অপকৰ্মক লৈ প্ৰশ্ন উত্থাপন কৰিছে আৰু মনে মনে বহি থাকিব বিচৰা নাই।”
উল্লেখ্য যে ধ্ৰুৱৰ লগতে শনিবাৰে আন কেবাগৰাকীও জনপ্ৰিয় কণ্টেন্ত ক্ৰীয়েটৰক আটক কৰা হৈছে। তেওঁলোক আটায়ে সমাজিক মাধ্যমত জনপ্ৰিয়।
ইফালে, CJPৰ প্ৰতিষ্ঠাপক তথা আহ্বায়ক অভিজিৎ দীপকে শনিবাৰে পুৱা মুম্বাইৰ পৰা দিল্লী অভিমুখে যাত্ৰা কৰিছে। শুকুৰবাৰে নিশাই তেওঁ জনাইছিল যে দিল্লীত উপস্থিত হোৱাৰ পাছত তেওঁক গ্ৰেপ্তাৰ কৰা হ’ব পাৰে।
তেওঁৰ বিৰুদ্ধে একাধিক ধাৰাত গোচৰ ৰুজু হ’ব পাৰে বুলিও তেওঁ আশংকা প্ৰকাশ কৰিছিল। অৱশ্যে কাৰাবাস খাটিবলৈ তেওঁ ভয় নকৰে বুলি স্পষ্ট কৰি দিয়ে। তেওঁক আটক কৰা হ’লেও যাতে আন্দোলন স্তব্ধ নহয়, সেই বাৰ্তাও দিছে দীপকে।
দিল্লীৰ বিস্তীৰ্ণ অঞ্চলত ১৬৩ ধাৰা জাৰি কৰিছে আৰক্ষীয়ে। CJPৰ প্ৰতিবাদী কাৰ্যসূচীৰ বাবে অনুমতি প্ৰদান কৰা হোৱা নাই। শুকুৰবাৰে নিশাৰ পৰা শনিবাৰে পুৱাৰ ভিতৰত বহু লোকক আটক কৰা হৈছে। আটকাধীনসকলৰ অধিকাংশই যুৱক-যুৱতী।
তথ্য অনুসৰি, জনপথ আৰু কৰ্তব্যপথৰ সংযোগস্থলৰ পৰা চাৰি কিলোমিটাৰ ব্যাসাৰ্ধৰ অঞ্চলত ইণ্টাৰনেট সেৱা বন্ধ কৰি দিয়া হৈছে।
দেশৰ মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত শনিবাৰে ৰাজপথলৈ ওলাই আহিছে CJP। ইয়াৰ লগতে ভোটাৰ তালিকাৰ বিশেষ নিবিড় সংশোধন (SIR) প্ৰত্যাহাৰ আৰু নিৰ্বাচন আয়ুক্তসকলৰ নিযুক্তি সম্পৰ্কীয় আইন সলনি কৰাৰ দাবীও উত্থাপন কৰিছে দলটোৱে।
এই দাবীসমূহক সন্মুখত ৰাখি শনিবাৰে ‘যন্তৰ মন্তৰ ২.০’ প্ৰতিবাদী কাৰ্যসূচীৰ আহ্বান জনোৱা হৈছে। এই কাৰ্যসূচী প্ৰতিহত কৰিবলৈ আৰক্ষীৰ তৎপৰতা তুংগত উঠিছে।
আৰক্ষীৰ পদক্ষেপক সমালোচনা কৰি দীপকে কয়, “নৰেন্দ্ৰ মোদী ভয় খাইছে। দেশৰ যুৱ প্ৰজন্মক ভয় কৰিলে তেওঁ এতিয়াও প্ৰধানমন্ত্ৰীৰ চকীত বহি আছে কিয়? মোদী-শ্বাহে দেশৰ নাগৰিকৰ বিৰুদ্ধে যুদ্ধ ঘোষণা কৰিবলৈ ওলাইছে নেকি?” মহাত্মা গান্ধীৰ আদৰ্শৰে শান্তিপূৰ্ণ আন্দোলনেই তেওঁলোকৰ মূল হাতিয়াৰ বুলি দাবী কৰে দীপকে।
