Book Release in guwahati:দৈনিক অগ্ৰদূত ডিজিটেল ডেস্ক: জন্ম শতবাৰ্ষিকী বৰ্ষতে উন্মোচন হ’ল সুধাকন্ঠ সম্পৰ্কীয় আন এখন অতি গুৰুত্বপূৰ্ণ গ্ৰন্থ। গুৱাহাটী প্ৰেছ ক্লাবত শনিবাৰে অসম তথা উত্তৰ-পূব ভাৰতৰ প্রথিতযশা ইতিহাসবিদ প্ৰফেছাৰ শীলা বৰা আৰু প্ৰফেছাৰ সজল নাগে উন্মোচন কৰে উপনিৱেশোত্তৰ উত্তৰ-পূব ভাৰত আৰু ড° ভূপেন হাজৰিকা শীৰ্ষক গ্ৰন্থখন।
গুৱাহাটীৰ হাতীগাঁও নিবাসী তথা অসম ৰয়েল গ্লবেল ইউনিভাৰ্চিটিৰ বুৰঞ্জী বিভাগৰ সহযোগী অধ্যাপক ড° সুস্মিতা হাজৰিকা আৰু সহ লেখক কয়াকুছিৰ ড° তানিয়া বেগমে লিখি উলিওৱা গ্ৰন্থখনে সুধাকন্ঠৰ সমাজ জীৱনলৈ আগবঢ়োৱা অনবদ্য অৱদানক দাঙি ধৰিছে। সুধাকন্ঠৰ জীৱনৰ এছোৱা সময়ৰ বাস্তৱ দলিলস্বৰূপ গ্ৰন্থখনৰ উন্মোচনী সভাত সাহিত্যিক-গৱেষক তথা অসম সাহিত্য সভাৰ প্ৰাক্তন সভাপতি ড° সূৰ্য্য কান্ত হাজৰিকাই বিশিষ্ট অতিথি হিচাপে উপস্থিত থাকে। ইয়াৰোপৰি সমাজৰ ভিন্ন স্তৰৰ কেইবাগৰাকীও লোক উপস্থিত থাকে অনুষ্ঠানত। উপনিবেশোত্তৰ উত্তৰ-পূব ভাৰত আৰু ড° ভূপেন হাজৰিকা গ্রন্থখনৰ বিষয়ে বক্তব্য আগবঢ়াই উন্মোচকদ্বয়ে কয় যে উপনিৱেশোত্তৰ কালছোৱা দেশৰ ইতিহাসত অতিকে গুৰুত্বপূৰ্ণ সময়। গতিকে এই সময়ৰ উত্তৰ-পূব ভাৰতৰ ইতিহাসত উত্তৰ-পূৰ্বাঞ্চলৰ মহান গণশিল্পী ড° ভূপেন হাজৰিকাৰ দৃষ্টিৰে আলোকপাত কৰি ইতিহাসত তেখেতৰ স্থান নির্ধাৰণ কৰিবলৈ এই গ্ৰন্থখনৰ যোগেদি এক আন্তৰিক প্ৰচেষ্টা চলোৱা হৈছে। অনুষ্ঠানটিত বক্তাসকলে গ্ৰন্থখনৰ অগতানুগতিক বিষয়বস্তু, সাহিত্যিক মূল্য বিশেষকৈ ইতিহাস-সাহিত্যৰ গৱেষণা ক্ষেত্ৰখনলৈ ইয়াৰ অৱদানৰ বিষয়ে বিশদভাৱে আলোচনা কৰে। অনুষ্ঠানৰ আৰম্ভণিতে মণিদ্বীপ চুতীয়াই ড° ভূপেন হাজৰিকাৰ জনপ্ৰিয় গীত “হে’ হে’ হে’ ঢোলে ডগৰে হে’ হে’ হে’ হিয়াৰ উমেৰে” গীতটি ভায়োলিন বাদনেৰে পৰিৱেশন কৰে।