NepalFlood : দৈনিক অগ্ৰদূত ডিজিটেল ডেস্ক :বিগত ২৪ ঘণ্টাত আৰু তিনিজন ভাৰতীয়ক উদ্ধাৰ কৰা সম্ভৱ হৈছে। শুকুৰবাৰে নিশা এক্স হেণ্ডেলত পোষ্ট কৰি এই কথা জনায় ভাৰতৰ বৈদেশিক মন্ত্ৰালয়ৰ মুখপাত্ৰ ৰণধীৰ জয়ছৱালে। এতিয়ালৈকে কিমানজন ভাৰতীয়ক উদ্ধাৰ কৰা হৈছে, সেই পৰিসংখ্যাও তেওঁ প্ৰকাশ কৰে।
যোৱা ২৪ আগষ্টত আকস্মিক বানৰ পাছৰে পৰা বিপৰ্যস্ত নেপাল। দেশখনত বহু ভাৰতীয়ও আবদ্ধ হৈ পৰিছে। তেওঁলোকৰ অধিকাংশই পৰ্যটক। আনহাতে, কোনো কোনোৱে নেপালত কাম কৰিবলৈ গৈও আবদ্ধ হৈ পৰিছে।
তেওঁলোকৰ বহুতৰে সন্ধান পোৱা গৈছে যদিও এতিয়াও বহু ভাৰতীয় সন্ধানহীন হৈ আছে। শুকুৰবাৰে তিনিজন ভাৰতীয়ক উদ্ধাৰ কৰাৰ খবৰ জনায় ভাৰতৰ বৈদেশিক মন্ত্ৰালয়ে।
ৰণধীৰ জয়ছৱালে জনোৱা মতে, ত্ৰিশূলী বজাৰ অঞ্চলৰ পৰা এই তিনিজন ভাৰতীয়ক উদ্ধাৰ কৰা সম্ভৱ হৈছে। উদ্ধাৰ হোৱা তিনিজন ভাৰতীয়ৰ পৰিচয়ো প্ৰকাশ কৰিছে তেওঁ। তেওঁলোকৰ মাজত পাঁচ বছৰীয়া এটি শিশুও আছে। উদ্ধাৰ হোৱা ভাৰতীয়কেইজন হৈছে অভিজিৎ সুৰেশ পাৱাৰ, দীপিকা অভিজিৎ পাৱাৰ আৰু সমৰ্থ অভিজিৎ পাৱাৰ। প্ৰাথমিকভাৱে অনুমান কৰা হৈছে যে তিনিওজন একেটা পৰিয়ালৰ সদস্য—পিতৃ, মাতৃ আৰু সন্তান।
ৰণধীৰে জনোৱা মতে, নেপালত থকা ভাৰতীয় দূতাবাসে উদ্ধাৰ হোৱা ভাৰতীয়সকলৰ সৈতে যোগাযোগ ৰাখিছে। তেওঁলোকক আকাশপথে ভাৰতলৈ ঘূৰাই অনা হ’ব।
শুকুৰবাৰে বৈদেশিক মন্ত্ৰালয়ৰ তৰফৰ পৰা জনোৱা হৈছে যে নেপাল-তিব্বত সীমান্তত আকস্মিক বানৰ ফলত এতিয়ালৈকে ২৭৫ জন ভাৰতীয় সন্ধানহীন হৈ আছে। অৱশ্যে ১৬৯ জন ভাৰতীয়ক জীৱিত অৱস্থাত উদ্ধাৰ কৰা সম্ভৱ হৈছে। তেওঁলোকৰ ভিতৰত ত্ৰিশূলী বজাৰ অঞ্চলৰ পৰা উদ্ধাৰ হোৱা এই তিনিজন ভাৰতীয়ও আছে।
প্ৰথমৰে পৰাই নেপালৰ ফালে সহায়ৰ হাত আগবঢ়াই আহিছে ভাৰতে। ভাৰতৰ পৰা বিমানযোগে বিপৰ্যস্ত নেপাললৈ প্ৰেৰণ কৰা হৈছে সাহায্য সামগ্ৰী। শুকুৰবাৰলৈকে নেপাললৈ ৯৫ টন সাহায্য সামগ্ৰী পঠিওৱা হৈছে।
ৰণধীৰে জনোৱা মতে, ভাৰত চৰকাৰে নিৰন্তৰ নেপাল চৰকাৰৰ স’তে যোগাযোগ ৰাখিছে। নেপালৰ প্ৰয়োজন অনুসৰি ভাৰতে তেওঁলোকক সহায় আগবঢ়াই যাব। কেৱল সাহায্য সামগ্ৰীয়েই নহয়, ভাৰতৰ পৰা উদ্ধাৰকাৰী দলো নেপাললৈ পঠিওৱা হৈছে। ইয়াৰ উপৰি ফৰেনছিক দলো নেপাললৈ গৈছে।
নেপাল চৰকাৰে প্ৰদান কৰা তথ্য অনুসৰি, শুকুৰবাৰে নিশালৈকে দেশখনৰ ক্ষতিগ্ৰস্ত অঞ্চলৰ পৰা মুঠ ১,২৯৫টা মৃতদেহ উদ্ধাৰ কৰা হৈছে। অৱশ্যে ১২ হাজাৰৰো অধিক লোকক নিৰাপদ স্থানলৈ স্থানান্তৰ কৰা সম্ভৱ হৈছে।
তথাপিও উৎকণ্ঠা এতিয়াও আঁতৰা নাই। সন্ধানহীন লোকৰ সংখ্যা এতিয়াও পাঁচ হেজাৰ।