HimantaBiswaSarma : দৈনিক অগ্ৰদূত ডিজিটেল ডেস্ক: আৰক্ষী থানাৰ পৰা আৰম্ভ কৰি চৰকাৰী বিভাগৰ কাৰ্যালয়লৈকে পিয়াপি দি ফুৰা দালালৰ তথ্য সাধাৰণ নাগৰিকে নিজেই চৰকাৰক দাখিল কৰিব পাৰিব। ইয়াৰ বাবে অসম আৰক্ষীৰ বিশেষ শাখাই এটা প’ৰ্টেল আৰম্ভ কৰিব বুলি সোমবাৰে দিছপুৰত এক সংবাদমেলত সদৰী কৰে মুখ্যমন্ত্রী হিমন্ত বিশ্ব বিশ্ব শর্মাই। তেওঁ এই বুলিও কয় যে আৰক্ষী থানাবোৰত থকা দালালৰ বিৰুদ্ধে ২০২২ত অভিযান চলোৱা হৈছিল।
সেই অভিযানত থানাবোৰত থকা দালালৰ বিৰুদ্ধে ২০২২ত অভিযান প্ৰায় দুশজন দালাল গ্ৰেপ্তাৰ হৈছিল। তাৰ পাছত থানাবোৰত দালাল নোহোৱা হৈছিল যদিও লাহে লাহে পুনৰ গা কৰি উঠে। মুখ্যমন্ত্রীয়ে কয়, ‘সেই কাৰণে শেহতীয়াকৈ পুনৰ দালালৰ বিৰুদ্ধে অভিযান চলোৱা হয়। ইয়াৰ বাবে যোৱা এবছৰ ধৰি তথ্য সংগ্ৰহ কৰি থকা হৈছিল। সংবাদ মাধ্যমকে ধৰি বিভিন্ন উৎসৰ জৰিয়তে প্রায় ৪১০ জন দালালৰ নাম সংগ্ৰহ কৰা হয়। তাৰে ভিতৰৰ ৩৮০ জনক এইবাৰ গ্ৰেপ্তাৰ কৰা হৈছে। কিন্তু কেৱল থানাতেই দালাল নহয়, চৰকাৰৰ বিভিন্ন কার্যালয়তো দালাল আছে। জিলা পৰিবহণ বিষয়াৰ কার্যালয়, পেন্সন কার্যালয়, অসম সচিবালয়, বিভিন্ন বিভাগৰ সঞ্চালকালয়, খণ্ড উন্নয়ন বিষয়াৰ কাৰ্যালয় আদি ওপৰৰ পৰা তললৈ বিভিন্ন কার্যালয়ত দালালবোৰ আছে। এইবাৰ আমাৰ ইয়াৰ বিৰুদ্ধে অভিযান চলিব। একে সময়তে আমি ৰাইজৰ পৰাও দালালৰ তথ্য বিচাৰিম। চৰকাৰী কাৰ্যালয়ত থকা দালালৰ তথ্য ৰাইজে নিজে প’র্টেলত সন্নিবিষ্ট কৰিব পাৰিব। দালাল বিৰোধী অভিযান আমাৰ চলিব। আমাৰ স্পষ্ট কথা প্রত্যক্ষ আৰু পৰোক্ষভাৱে আৰক্ষী থানাত মধ্যভোগী থাকিব নোৱাৰিব।
এই সংবাদমেলতে মুখ্যমন্ত্রীয়ে সমাগত নগাঁও লোকসভাৰ উপ-নির্বাচন বিজেপিৰ বাবে সহজ নহয় বুলি পুনৰ মন্তব্য কৰে। বিশেষকৈ চাৰে তিনি লাখ ধর্মীয় সংখ্যালঘু ভোটাৰ সমষ্টিটোত অধিক হোৱাৰ ফলত বিজেপিৰ বাবে বিজয় দৃঢ়তাৰে পাব পৰা অৱস্থাত নাই বুলি মুখ্যমন্ত্ৰীয়ে উল্লেখ কৰে।
শিশুৰ বাবে খেল মহাৰণ
ইপিনে, কালি দিছপুৰত অনুষ্ঠিত চৰকাৰৰ কেবিনেট বৈঠকত কে’বাটাও সিদ্ধান্ত গ্রহণ কৰা হয়। ক্রীড়া প্রতিভা চিনাক্তকৰণ, পদোন্নতিৰ ব্যৱস্থা ত্বৰান্বিত কৰা আদিকে ধৰি কে’বাটাও বিষয়ত এই সিদ্ধান্ত গ্রহণ কৰা হয়। কেবিনেট বৈঠকৰ পাছত আয়োজিত এক সংবাদমেলত মুখ্যমন্ত্রীয়ে ঘোষণা কৰে যে এইবাৰো ৰাজ্যত খেল মহাৰণ অনুষ্ঠিত হ’ব। এইবাৰ শিশুৰ বাবেও পৃথকে খেল মহাৰণ অনুষ্ঠিত হ’ব বুলি মুখ্যমন্ত্ৰীয়ে সদৰী কৰে।
তেওঁ কয় যে দুটা পর্যায়ত অহা পহিলা নৱেম্বৰৰ পৰা এইবাৰৰ খেল মহাৰণ অনুষ্ঠিত হ’ব। ইয়াৰে এটা পৰ্যায়ৰ খেল মহাৰণ ১২ বছৰ অনূর্ধ্বৰ খেলুৱৈৰ মাজত অনুষ্ঠিত হ’ব। আনটো পৰ্যায়ত ১২ বছৰ ঊর্ধ্বৰ খেলুৱৈৰ মাজত মহাৰণ অনুষ্ঠিত হ’ব। মুখ্যমন্ত্রীয়ে কয়, ‘শিশুৰ বাবে যি খেল মহাৰণ অনুষ্ঠিত হ’ব তাৰ পৰা তিনিশ প্রতিভাবান খেলুৱৈক চিনাক্ত কৰি তেওঁলোকক জলপানি দিয়া হ’ব। তেওঁলোকক ভাল কেন্দ্ৰত প্ৰশিক্ষণৰ ব্যৱস্থা লোৱা হ’ব। আনহাতে, পূৰ্বৰ দৰে এইবাৰো গাঁও পঞ্চায়ত পর্যায়ত, সমষ্টি পর্যায়ত, জিলা পৰ্যায়ত আৰু ৰাজ্যিক পৰ্যায়ত খেল মহাৰণ অনুষ্ঠিত হ’ব। ৰাজ্যিক পৰ্যায়ত খেল মহাৰণ ১৮ জানুৱাৰীৰ পৰা ২৩ জানুৱাৰীলৈ অনুষ্ঠিত হ’ব। এইবাৰৰ খেল মহাৰণ অনুষ্ঠিত হ’বলগীয়া প্রতিযোগিতাবোৰ হ’ল এথলেটিকছ, যোগাসন, দবা, বক্সিং, একুৱাথলন, ফুটবল, ভলীবল আৰু সাঁতোৰ।’
খেল মহাৰণ অনুষ্ঠিত কৰিবলৈ আজিৰ কেবিনেটে অনুমোদন দিয়ে। কেবিনেটে আজি কে’বাটাও খণ্ডত ‘সেউজ উপ-কৰ’ আৰোপৰ সিদ্ধান্ত গ্রহণ কৰে। মুখ্যমন্ত্ৰীয়ে উল্লেখ কৰে যে এইবাৰৰ বাজেটত এই উপ-কৰ আৰোপৰ বিষয়টো উল্লেখ কৰা হৈছে। সেই অনুসৰি সোমবাৰে যিকেইটা খণ্ডত উপকৰ আৰোপৰ সিদ্ধান্ত গ্রহণ কৰা হয় সেইবোৰৰ ভিতৰত আছে শিলভঙা গোট, ইটাভাটা, আমদানি কৰা কাঠ, ভূজল ব্যৱহাৰ কৰা উদ্যোগ আৰু প্ৰদূষণ সৃষ্টি কৰা উদ্যোগ। অৱশ্যে উপ-কৰৰ পৰিমাণ পৰৱৰ্তী সময়ত নিৰ্ধাৰণ কৰা হ’ব। সংগৃহীত উপ-কৰ মথাউৰিৰ নিৰ্মাণ, নবীকৰণ বিদ্যুৎ উৎপাদন ব্যৱস্থা আদি শিতানত ব্যয় কৰা হ’ব।
অসম চৰকাৰৰ কৰ্মচাৰীৰ পদোন্নতিক লৈ আন এক সিদ্ধান্ত গ্রহণ কৰা হয়। ৰাজ্যত নতুন নিযুক্তিৰ বাবে পদ সৃষ্টিত অংশ হিচাপে কালি অসম সচিবালয়ৰ কম্পিউটাৰ অপাৰেটৰ পদৰ পৰা কনিষ্ঠ প্রশাসনিক সহায়ক পদলৈ পদোন্নতিৰ সময় চাৰি বছৰৰ পৰা তিনি বছৰলৈ হ্ৰাস কৰাত কেবিনেটে অনুমোদন জনায়।
মুখ্যমন্ত্ৰীয়ে সদৰী কৰা আন এক সিদ্ধান্ত অনুসৰি সামৰিক বাহিনীত কৰ্মৰত অসমৰ যুৱক-যুৱতীয়ে নিয়ম অনুসৰি ৪২ বছৰত অৱসৰ লোৱাৰ পাছত ৰাজ্য চৰকাৰৰ পদত যোগদানৰ বয়সৰ উচ্চসীমা আজি ৪৫ বছৰলৈ বৃদ্ধি কৰা হয়। এইবাৰো নৱম শ্ৰেণীৰ ছাত্ৰ-ছাত্ৰীক বিনামূলীয়া চাইকেল যোগান আঁচনিখন ৰূপায়ণ কৰা হ’ব আৰু কেবিনেটে ইয়াক অনুমোদন জনায়।
