Sikkim: দৈনিক অগ্ৰদূত ডিজিটেল ডেস্ক: পাহাৰৰ পৰা একোৱেই যেন আঁতৰা নাই বিপদৰ ডাৱৰ। দেওবাৰে পুৱা উত্তৰ ছিকিমত ভূমিস্খলনৰ ফলত চ্যাকুং আৰু তিস্তা নদীৰ গতিপথ অৱৰোধ হৈ আকস্মিক বানৰ আশংকা সৃষ্টি হৈছিল। ইয়াৰ পিছতে মিৰিক পাহাৰৰ ৰংভাং নদীত সৃষ্টি হোৱা গভীৰ হ্ৰদক লৈ উদ্বেগৰ সামান্য হ্ৰাস হওঁতেই পুনৰ ভূমিস্খলনৰ বিপৰ্যয় নামি আহিল ছিকিমত।
পশ্চিম ছিকিমৰ ৰিম্বি-ইউকসম মুখ্য পথত হুড়মূৰকৈ পাহাৰ খহি পৰে। ইয়াৰ ফলত পথটোৰে যান-বাহন চলাচল সম্পূৰ্ণৰূপে বন্ধ হৈ পৰে। ইয়াৰ মাজতে আৰম্ভ হয় ধাৰাসাৰ বৰষুণ। ফলত নতুনকৈ আতংকৰ পৰিস্থিতিৰ সৃষ্টি হৈছে। বিপদৰ আশংকাত স্থানীয় লোকসকল।
ছিকিম প্ৰশাসনৰ সূত্ৰে জানিব পৰা মতে, ইউকসম-তাশিডিং নিৰ্বাচনী সমষ্টিৰ ৰিম্বি গাঁৱত বৃহৎ ভূমিস্খলন সংঘটিত হয়। পাহাৰৰ পৰা নামি অহা শিল-মাটিৰ তলত ৰিম্বিৰ স’তে ইউকসম আৰু খেচুপৰি সংযোগ কৰা মুখ্য পথটো সম্পূৰ্ণৰূপে বিচ্ছিন্ন হৈ পৰে। পথৰ ওপৰেৰে পানীৰ সোঁত বৈ যায়। ইয়াৰ ফলত অঞ্চলটোত যান-বাহন চলাচল সম্পূৰ্ণ বন্ধ হৈ পৰিছে।
পাহাৰৰ এটা বৃহৎ অংশ খহি পথৰ ওপৰত পৰাত সমগ্ৰ অঞ্চলটো মাটি, শিল আৰু গধুৰ ধ্বংসাৱশেষেৰে আবৃত হৈ পৰিছে। ব্যাপক ভূমিস্খলনৰ ফলত পথটোৰ বৃহৎ অংশ ক্ষতিগ্ৰস্ত হৈছে। ফলত গুৰুত্বপূৰ্ণ এই পথটোৰে খোজকাঢ়ি অহা-যোৱাও যথেষ্ট বিপজ্জনক হৈ পৰিছে।
স্থানীয় বাসিন্দাসকলে জনোৱা মতে, পৰিস্থিতি উদ্বেগজনক। ক্ষতিগ্ৰস্ত পাহাৰৰ পাদদেশ আৰু সংলগ্ন অঞ্চলৰ কেবাটাও ঘৰ বিপদৰ সন্মুখীন হৈছে। বাসিন্দাসকলৰ আশংকা, বৰষুণ অব্যাহত থাকিলে পুনৰ ভূমিস্খলন সংঘটিত হ’ব পাৰে।
উল্লেখ্য যে, ৰিম্বি-ইউকসম পথটো স্থানীয় বাসিন্দা আৰু পৰ্যটক—দুয়োৰে বাবে এক গুৰুত্বপূৰ্ণ সংযোগ পথ। সেয়েহে পথটো বন্ধ হৈ পৰাত পৰ্যটকসকল সমস্যাৰ সন্মুখীন হৈছে।
আটাইতকৈ ডাঙৰ উদ্বেগৰ কাৰণ হৈছে, ভূমিস্খলনৰ পিছতো ক্ষতিগ্ৰস্ত পাহাৰৰ ঢাল সম্পূৰ্ণৰূপে সুস্থিৰ হোৱা নাই।
স্বাভাৱিকতেই পথৰ কাষত বাস কৰা স্থানীয় লোকসকল নিৰাপত্তাক লৈ শংকিত। তেওঁলোকে কৰ্তৃপক্ষৰ ওচৰত দাবী জনাইছে যাতে বিশেষজ্ঞৰ জৰিয়তে বিপজ্জনক ঢালটো শীঘ্ৰে পৰীক্ষা কৰা হয় আৰু প্ৰয়োজনীয় প্ৰতিৰোধমূলক ব্যৱস্থা গ্ৰহণ কৰা হয়।
স্থানীয় বাসিন্দাসকলৰ অভিযোগ, প্ৰতিবাৰ বাৰিষাতে এনে সমস্যাৰ সৃষ্টি হয়। সেয়েহে কেৱল ধ্বংসাৱশেষ আঁতৰাই পথটো মুকলি কৰিলেই স্থায়ী সমাধান নহ’ব। এই অঞ্চলত বাৰে বাৰে ভূমিস্খলন ৰোধ কৰিবলৈ ঢাল সুৰক্ষা, পাহাৰ সংৰক্ষণ আৰু স্থায়ী নিৰাপত্তা আন্তঃগাঁথনি নিৰ্মাণৰ দৰে দীৰ্ঘম্যাদী পদক্ষেপৰ প্ৰয়োজন।
কৰ্তৃপক্ষই বৰ্তমান পৰিস্থিতিৰ ওপৰত নজৰ ৰাখিছে। অৱশ্যে বতৰ পৰিস্থিতিৰ উন্নতি নোহোৱা আৰু ভূমিস্খলনপ্ৰৱণ অংশটো নিৰাপদ বুলি ঘোষণা নকৰালৈকে ক্ষতিগ্ৰস্ত এই অংশত যাতায়াতৰ ক্ষেত্ৰত বিপদৰ আশংকা থাকিব বুলি ধাৰণা কৰা হৈছে।
