দৈনিক অগ্ৰদূত ডিজিটেল ডেস্ক: অসমৰ বজাৰত কৃষকে উচিত মূল্যত সাৰ বিচাৰি হাহাকাৰ কৰিবলগীয়া হোৱাৰ বিপৰীতে চোৰাং ব্যৱসায় অধিক ৰমৰমীয়া হৈছে। অসমৰ পৰা হেজাৰ হেজাৰ কুইণ্টল সাৰ চুবুৰীয়া ৰাষ্ট্ৰলৈ সৰবৰাহ হৈছে। ইয়াৰে তেনেই সামান্য এটি অংশহে জব্দ হৈছে আৰু বেছিভাগেই যিকোনো কৌশলৰেই নহওক কিয় চোৰাং বজাৰত প্ৰৱেশ কৰিছে।
শেহতীয়াকৈ বৃহৎ পৰিমাণৰ চোৰাং ইউৰিয়া জব্দ হৈছে। মূলতঃ বৰাক উপত্যকাক কেন্দ্ৰ কৰি ইউৰিয়া সাৰৰ চোৰাং ব্যৱসায় তুংগত উঠিছে। চৰকাৰে যিমানেই দাবী নকৰক কিয়, বজাৰত কৃষকে উচিত মূল্যত সাৰ নাপায়। সাৰৰ বজাৰ চলে ৰাজসাহায্যত; অথচ কৃষকে পৰিশোধ কৰিব লাগে অধিক মূল্য। ইউৰিয়া সাৰৰ চোৰাং বজাৰখন কি বিশাল পৰিসৰত চলিছে তাৰ শেহতীয়া কেইটামান উদাহৰণেই পর্যাপ্ত।
সম্প্ৰতি কাছাৰ আৰক্ষীয়ে জিলাখনৰ দুটা স্থানৰ পৰা ৫৩২ বেগ চোৰাং ইউৰিয়া জব্দ কৰে।প্রতিখন বেগত ৪৫ কিলোগ্রামকৈ ইউৰিয়া সাৰ আছিল। ইয়াৰে পাঁচশ বেগ ইউৰিয়া জব্দ কৰা হয় মিজোৰাম সীমান্তৰ লাইলাপুৰত। এই সাৰ পৰিবহণত জড়িত থকা বদৰউদ্দিন নামৰ এজন লোকক গ্ৰেপ্তাৰ কৰা হৈছে।
একেদৰে ৰনগিৰ খাৰি অঞ্চলৰ পৰা ৩২ বেগ ইউৰিয়া সাৰ জব্দ কৰা হয়। চোৰাং এই সাৰ পৰিবহণত জড়িত থকা ছাহিল হুছেইন লস্কৰ নামৰ এজন লোকক গ্ৰেপ্তাৰ কৰা হৈছে। যোৱা নিশা নলবাৰী জিলাৰ বেলশৰ আৰক্ষী থানাৰ অধীনত শৌলমাৰী আৰক্ষী চকীৰ এক অঞ্চলত ৬০ বেগ চোৰাং ইউৰিয়া জব্দ কৰা হয়।
বড়িতাপা অঞ্চলৰ পৰা এই সাৰখিনি এখন চাৰিচকীয়া বাহনৰ পৰা জব্দ কৰা হয়। এই কাৰ্যত জড়িত থকাৰ অভিযোগত দুজন লোকক গ্ৰেপ্তাৰ কৰা হয়। শেহতীয়াকৈ যোৱা ২০ আগষ্টত কামৰূপত দদৰা আৰক্ষীয়ে ৭০ বেগ চোৰাং ইউৰিয়া সাৰ জব্দ কৰে। দুখন বাহনৰ পৰা এই সাৰ জব্দ কৰা হয়।
এই সাৰখিনি সম্পূৰ্ণৰূপে চৰকাৰী যোগানৰ আছিল বুলি আৰক্ষীয়ে নিশ্চিত কৰিছে। ইয়াৰ লগত জড়িত দুজন লোককো গ্ৰেপ্তাৰ কৰা হৈছে। আকৌ যোৱা ২১ জুলাইত অসম-মিজোৰাম সীমান্তৰ লাইলাপুৰত দুখন ট্ৰাকৰ পৰা এহেজাৰ বেগ চোৰাং ইউৰিয়া সাৰ জব্দ কৰা হয়।
শিলচৰ-আইজল ৰাষ্ট্ৰীয় ঘাইপথত চলোৱা তালাচীত এই বৃহৎ পৰিমাণৰ চোৰাং সাৰ জব্দ হয়। অদ্যাপি এই সাৰৰ মূল উৎস উদ্ধাৰ নহ’লেও আৰক্ষীৰ তদন্তত নিশ্চিত কৰা হৈছে যে অসমৰ কৃষকৰ বাবে আবণ্টিত এই বৃহৎ পৰিমাণৰ সাৰ মিজোৰাম হৈ ম্যানমাৰলৈ প্ৰেৰণৰ পৰিকল্পনা কৰিছিল চোৰাং ব্যৱসায়ীৰ দলে।
লক্ষ্যণীয় দিশটো হ’ল যে চোৰাং সাৰ সৰবৰাহৰ লগত বাহনৰ চালক-হেণ্ডিমেনহে গ্ৰেপ্তাৰ হয়। তাৰ পাছত আৰু চোৰাং চক্ৰত জড়িত কোনো লোকৰ তথ্য পোহৰলৈ নাহে।
এয়া মাত্র কেইটামানহে উদাহৰণ। এনেদৰে ৰাজ্যখনৰ কৃষকৰ বাবে আবণ্টিত সাৰৰ এখন বৃহৎ চোৰাং বজাৰ নির্বিঘ্নে চলি আহিছে। এই বজাৰ প্ৰতিৰোধৰ যি তৎপৰতা কৃষি বিভাগ তথা চৰকাৰে দাবী কৰি আহিছে সেয়া কার্যতঃ এক অর্থহীন বিষয়তহে পৰিণত হৈছে।
আৰক্ষীৰ তথ্য অনুসৰি, চোৰাং ইউৰিয়া সাৰ প্ৰধানকৈ প্ৰেৰণ কৰা হয় অসমৰ চুবুৰীয়া দুখন ৰাষ্ট্ৰলৈ। অনাকৃষি কাৰ্যত এই সাৰ ব্যৱহাৰ হয়। প্ৰধানকৈ বাংলাদেশ আৰু ম্যানমাৰলৈ এই সাৰ যোগান ধৰা হয়। ৰাজসাহায্যৰ এই সাৰ চোৰাং বজাৰত বিক্ৰী হয় কে’বাগুণ অধিক মূল্যত।
বিশেষকৈ ঔদ্যোগিক খণ্ডত ব্যৱহাৰ হোৱা হেতু এই সাৰৰ মূল্য চোৰাং বজাৰত আকাশলংঘী হৈ আহিছে আৰু সেই বাবে চোৰাং বজাৰখনো ক্ৰমে অধিক ৰমৰমীয়া হৈছে। এই বজাৰখন ৰোধৰ কাৰ্যকৰী ব্যৱস্থা অসমত মুঠেই নাই, যাৰ পৰিণাম ভুগিবলগীয়া হৈছে ৰাজ্যৰ কৃষক সমাজে। ইউৰিয়া সাৰ কেইটামান খণ্ডত বিশেষভাৱে ব্যৱহাৰ হয়।
প্লাইউড আৰু ৰেজিন উৎপাদনত ইউৰিয়া সাৰ ব্যৱহাৰ হয়। পশু খাদ্যতো ইয়াৰ ব্যৱহাৰ হয়। চিন্থেটিক প্লাষ্টিক প্রস্তুত উদ্যোগতো ইউৰিয়া সাৰৰ ব্যৱহাৰ হয়।
তদুপৰি খনন কাৰ্যত ব্যৱহাৰ হোৱা বিস্ফোৰক প্ৰস্তুততো ইউৰিয়া সাৰ বিশেষভাৱে ব্যৱহাৰ হয়। জাল নথি অথবা কোনো নথিপত্র অবিহনে হেজাৰ হেজাৰ কুইণ্টল ইউৰিয়া সাৰ এনেদৰে চোৰাং বজাৰত বিক্ৰী হৈছে আৰু তাৰ বিপৰীতে ৰাজ্যৰ কৃষকে নিজৰ প্ৰয়োজনত বিচাৰি হাহাকাৰ কৰিবলগীয়া হৈছে। যি সাৰ বজাৰত উপলব্ধ হয় তাৰ মূল্যও আকাশলংঘী।
