FloodAffected: দৈনিক অগ্ৰদূত ডিজিটেল ডেস্ক: বানাক্ৰান্ত ৰাইজক লৈ নিকৃষ্ট ৰাজনীতি নকৰিব’, ‘চৰকাৰে আমাৰ বেদনা আৰু চকুপানী উপলব্ধি কৰক’, ‘আমাক জীয়াই থকাৰ অধিকাৰ প্ৰদান কৰক’,’১০ হেজাৰ কোটি টকাৰ সাহায্য মঞ্জুৰ কৰক’ এইদৰে কালি শিৱসাগৰ আৰু চৰাইদেউ জিলাৰ বন্যাৰ্তৰ পুনৰ সংস্থাপনৰ বাবে কেন্দ্ৰীয় চৰকাৰৰ পৰা ১০ হেজাৰ কোটি টকাৰ সাহায্যৰ দাবীত তাই আহোম ছাত্র সন্থাই উত্তাল প্রতিবাদ সাব্যস্ত কৰে।
হেজাৰ হেজাৰ বানাক্ৰান্ত ৰাইজে অংশগ্রহণ কৰা এই বৃহৎ প্রতিবাদী শোভাযাত্রা শিৱসাগৰ বৰ্ডিং খেলপথাৰৰ পৰা আৰম্ভ হয়। শিৱসাগৰ নগৰ পৰিভ্ৰমণ কৰি প্ৰতিবাদকাৰীসকলে শিৱসাগৰ জিলা আয়ুক্তৰ কাৰ্যালয় ঘেৰাও কৰে। এই প্রতিবাদী শোভাযাত্ৰাৰ নেতৃত্ব লোৱা আটাছুৰ কেন্দ্ৰীয় সভাপতি বসন্ত গগৈয়ে কয়, ‘থলগিৰি ভূমিপুত্ৰৰ পক্ষত থাকিম বুলি কোৱা চৰকাৰখনে আজিলৈকে বানাক্ৰান্ত ৰাইজৰ দুখ-দুর্দশাৰ প্রতি তিলমানো গুৰুত্ব নিদিলে। চৰকাৰে বানাক্ৰান্তৰ বাবে দিয়া ন্যূনতম ১৫ হেজাৰ টকাও আজিলৈকে হেজাৰ হেজাৰ বানাক্ৰান্তই লাভ নকৰিলে।’
তেওঁ কয়, ‘বিৰোধী দলৰ বিধায়কেও বানাক্রান্তসকলক লৈ নিকৃষ্ট ৰাজনীতি আৰু বান্দৰামী কৰাত আমি সকলো দিশৰ পৰাই সৰ্বস্বান্ত হৈ পৰিছো। এই প্রলয়ংকৰী বানে আমাক আর্থিকভাৱে ২০ বছৰ পিছুৱাই দিলে।
এই দুর্ভগীয়া বানাক্ৰান্ত ৰাইজৰ পুনৰ সংস্থাপনৰ বাবে আমাক ১০ হেজাৰ কোটি টকাৰ কেন্দ্ৰীয় সাহায্য লাগিবই। এই প্রতিবাদী কাৰ্যসূচীৰ পাছতো যদি চৰকাৰৰ গা নলৰে তেন্তে আমি বানাক্ৰান্ত ৰাইজৰ সহযোগত দিছপুৰৰ সচিবালয় ঘেৰাও কৰিম। তাৰ পাছতো যদি আমাৰ দাবীৰ প্ৰতি চৰকাৰে গুৰুত্ব নিদিয়ে তেতিয়া আমি সমগ্র উজনি অসম বন্ধৰ দৰে কঠোৰ গণতান্ত্রিক কার্যসূচী গ্রহণ কৰি উজনি অসম স্তব্ধ কৰি দিম।’
প্ৰতিঘৰ বানাক্ৰান্ত ৰাইজে কমেও চাৰি-পাঁচ লাখকৈ চৰকাৰী বান সাহায্য নোপোৱা পর্যন্ত আটাছু ক্ষান্ত নহয় বুলি গগৈয়ে চৰকাৰক সকীয়াই দিয়ে। তেওঁ কয়, ‘ৰাইজৰ খুব বেছি খং। আৰু ৰাইজ বহুত ক্ষুব্ধ হৈ আছে, সেয়েহে ৰাইজ আজিৰ প্ৰতিবাদী কাৰ্যসূচীত অংশ ল’বলৈ ওলাই আহিছে। চৰকাৰে প্ৰতিশ্রুতি দিছিল কিন্তু প্রতিশ্রুতি পূৰণ কৰা নাই বুলি অভিযোগ কৰি চৰকাৰে কৈছে ১৫ হেজাৰ টকা দিম, দুগৰাকীমানে পালে, ইয়াৰ অধিক সংখ্যকে পোৱা নাই। ৯০ শতাংশ মানুহে পোৱা নাই।’
গগৈয়ে লগতে কয়, ‘চৰকাৰে ১৫ হেজাৰ দিছে, ১০ হেজাৰ দিছে দিওক, কিন্তু স্থায়ীভাবে প্রতিৰোধ পাব লাগিব, সেই কামটো এতিয়ালৈকে কৰা নাই। চৰাইদেউ আৰু শিৱসাগৰৰ জনজীৱন ২০-২৫ বছৰ পিছুৱাই গ’ল। ১০ হেজাৰ কোটি টকাৰ পেকেজ লাগে। চৰকাৰে ৰাইজৰ কথাবিলাক শুনা নাই। আমি কৈছো বান নহাৰ আগতে কামবিলাক কৰক। ১৮ কিলোমিটাৰ যি উন্মুক্ত মথাউৰি আছিল, ১৯৫০ বা ১৯৬০ৰ যি মথাউৰি বনাইছিল, তাৰ পুনর্নির্মাণ কৰক। দৈয়াং কাছঝাৰ যিটো মথাউৰি আছে, পুনর্নির্মাণ কৰি দিয়ক। আইআইটি বিশেষজ্ঞ আনি প্রতিৰোধমূলক কামবিলাক কৰক। চৰকাৰৰ কৰিবলৈ ধন-সম্পদ বহুত আছে।’
শিৱসাগৰ, চৰাইদেউৰ ৰাইজক মৰিবলৈ এৰি দিম নেকি বুলি প্রশ্ন কৰি আটাছু সভাপতিজনে কয়, ‘প্রতিবাৰে যদি বানপানী হয়, আমাৰ অৱস্থা কি হ’ব? চৰকাৰে পদক্ষেপ গ্রহণ কৰা নাই। স্থায়ী প্ৰতিৰোধৰ ব্যৱস্থা চৰকাৰে মনা নাই।’ তেওঁ কয়, ‘আজি প্রতিবাদ ৰাজপথলৈ গৈছে। ইয়াৰ পাছতো যদি ধর্ণা-সমাৱেশৰ কথাবিলাক নুশুনে, প্রতিবাদ দিছপুৰলৈ যাব। দিছপুৰলৈ যাব অসমৰ জনসাধাৰণ, কাৰণ শিৱসাগৰ-চৰাইদেউৰ বানাক্ৰান্ত জনসাধাৰণৰ স্বাৰ্থত প্রতিবাদেই হ’ব। আমি খিলঞ্জীয়া মানুহ এতিয়া শিৱসাগৰত থাকিব পৰা নাই, ঘৰত শুব পৰা নাই, খাব পৰা নাই, থাকিবলৈ নাই, খাবলৈ নাই। গতিকে শিৱসাগৰৰ অৰ্থনৈতিক অৱস্থাটো চৰকাৰে বুজি পাব লাগিব। চৰকাৰে যেতিয়া কথাবিলাক নুশুনে, আমি কথাবিলাক অলপ বেলেগে কম। গতিকে সেইকাৰণে প্রতিবাদ হৈছে।’
আটাছু সভাপতিয়ে হুংকাৰ দি কয়, ‘প্রতিবাদ আজি হৈছে, কাইলৈও কার্যসূচী হ’ব। প্রতিবাদটো আমি দিছপুৰলৈ নিম। মুখ্যমন্ত্রীজনে যদি কথা নুশুনে, দিছপুৰ স্তব্ধ কৰাম আমি আন্দোলন কৰি। আমি দিছপুৰ ঘেৰাও কৰিম। তাৰ পাছতো যদি নুশুনে, অসম বন্ধ দিম। প্রতিবাদৰ ভাষা আমি চৰকাৰক বুজাম। আমি প্রতিবাদ কৰিবই লাগিব, বানাক্ৰান্ত ৰাইজৰ প্ৰতিবাদ।’
প্রতিবাদী কার্যসূচীত উজনি অসম মুছলিম কল্যাণ পৰিষদৰ কেন্দ্ৰীয় সমিতিৰ সভাপতি মনিৰুল ইছলাম বড়াই কয়, ‘কোনো দিনেই নোহোৱা উজনি অসমৰ এই জলপ্ৰলয়ৰ প্রকৃত কাৰণ উদ্ভাৱনৰ বাবে আইআইটি বিশেষজ্ঞ আৰু ভূতত্ত্ববিদৰ জৰিয়তে তদন্ত কমিটী গঠন কৰি তাৰ প্ৰকৃত কাৰণ উদ্ভাৱন কৰাৰ লগতে সমাধান সূত্র উলিয়াবলৈ আজি পর্যন্ত চৰকাৰে প্ৰচেষ্টা নকৰাটো অতি দুর্ভাগ্যজনক। কেন্দ্ৰীয় চৰকাৰে অসমক আজিও মাহী আইৰ আচৰণ কৰাৰ বাবে আজি পর্যন্ত উজনি অসমৰ বানাক্ৰান্তৰ চকুলো আৰু দুখ-বেদনা কেন্দ্রীয় চৰকাৰে উপলব্ধি কৰিব নোৱাৰিলে। আটাছুৰ এই প্ৰতিবাদত উজনি অসম মুছলিম কল্যাণ পৰিষদেও পূর্ণ সমর্থন আগবঢ়াইছে।’
বানাক্ৰান্ত ৰাইজে উপযুক্ত প্রাপ্য অধিকাৰ নোপোৱা পর্যন্ত এই গণতান্ত্রিক সংগ্রাম অব্যাহত থাকিব বুলি বড়াই ক্ষোভ উজাৰে। শিৱসাগৰৰ বিশিষ্ট ব্যৱসায়ী বিনোদ আগৰৱালা আৰু ব্যৱসায়ী সন্থাৰ সভাপতি বকুল বৰঠাকুৰেও বানাক্রান্তসকলক উপযুক্ত ক্ষতিপূৰণ প্ৰদান কৰিবলৈ কেন্দ্ৰীয় আৰু ৰাজ্য চৰকাৰৰ প্ৰতি দাবী জনায়।
