MadhavdevUniversity: দৈনিক অগ্ৰদূত ডিজিটেল ডেস্ক: মাধৱদেৱ বিশ্ববিদ্যালয়ৰ কেন্দ্ৰীয় গ্রন্থাগাৰত শুকুৰবাৰে ‘প্রফেচাৰ ডি পি বৰুৱা গ্ৰন্থ কোণ’ৰ উদ্বোধন কৰা হয়। গুৱাহাটী বিশ্ববিদ্যালয়ৰ প্ৰাক্তন উপাচার্য প্ৰফেচাৰ দেৱ প্ৰসাদ বৰুৱাৰ ব্যক্তিগত গ্রন্থাগাৰৰ পৰা তেওঁৰ পুত্ৰ চাৰ্লছ বৰুৱা আৰু বোৱাৰী ড° কান্তা চক্রবর্তীয়ে আগবঢ়োৱা মূল্যৱান গ্রন্থসমূহেৰে এই গ্রন্থ কোণটো স্থাপন কৰা হৈছে।
অনুষ্ঠানত মাধৱদেৱ বিশ্ববিদ্যালয়ৰ উপাচার্য প্ৰফেচাৰ অৰূপজ্যোতি চৌধুৰীয়ে আদৰণি ভাষণ প্রদান কৰি চাৰ্লছ বৰুৱা আৰু ড° কান্তা চক্রবর্তীক বিশ্ববিদ্যালয়ৰ কেন্দ্ৰীয় গ্ৰন্থাগাৰলৈ এনে এক মূল্যবান গ্রন্থসম্ভাৰ আগবঢ়োৱাৰ বাবে কৃতজ্ঞতা জ্ঞাপন কৰে। তেওঁ কয় যে বিশিষ্ট শিক্ষাবিদ তথা প্রাক্তন উপাচার্য প্রফেচাৰ বৰুৱাৰ ব্যক্তিগত গ্রন্থসম্ভাৰ বিশ্ববিদ্যালয়ৰ শিক্ষার্থী, শিক্ষক, গৱেষকৰ বাবে এক গুৰুত্বপূৰ্ণ শৈক্ষিক সম্পদ হিচাপে পৰিগণিত হ’ব।
বিশ্ববিদ্যালয়ৰ পঞ্জীয়ক ড° ক্ষীৰপদ দত্তই চাৰ্লছ বৰুৱা আৰু ড° কান্তা চক্রবর্তীক বিশ্ববিদ্যালয়ৰ তৰফৰ পৰা সম্বৰ্ধনা জ্ঞাপন কৰে। বিশ্ববিদ্যালয়ৰ তৰফৰ পৰা আগবঢ়োৱা কৃতজ্ঞতা পত্রতো এই গ্রন্থদানক শৈক্ষিক আৰু জ্ঞানচর্চাৰ ক্ষেত্ৰত এক মূল্যৱান অৱদান হিচাপে স্বীকৃতি দিয়া হয়।
অনুষ্ঠানত বিশ্ববিদ্যালয়ৰ সকলো শৈক্ষিক বিভাগৰ মুৰব্বী আৰু মাধৱদেৱ বিশ্ববিদ্যালয় ৰিডাৰ্ছ ক্লাবৰ সকলো সদস্য উপস্থিত থাকে। অনুষ্ঠানৰ আঁত ধৰে বিশ্ববিদ্যালয়ৰ গ্ৰন্থাগাৰিক ড° নিখিল হাজৰিকাই।
গ্রন্থ কোণ উদ্বোধন অনুষ্ঠানৰ পাছতে দুপৰীয়া ১২ বজাৰ পৰা বিশ্ববিদ্যালয়ৰ উপাচাৰ্যৰ সন্মিলন কক্ষত এক প্রশিক্ষণ কার্যসূচী অনুষ্ঠিত হয়। কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ৰ সহকাৰী পঞ্জীয়ক ড° কান্তা চক্ৰৱৰ্তীয়ে সমল ব্যক্তি হিচাপে অংশগ্রহণ কৰি ‘ফাইল ব্যৱস্থাপনা আৰু ছুটীৰ তথ্য’ বিষয়ত এক প্রশিক্ষণ অধিৱেশন পৰিচালনা কৰে। বিশ্ববিদ্যালয়ৰ তৃতীয় শ্ৰেণীৰ কৰ্মচাৰীসকলক এই প্রশিক্ষণ কাৰ্যসূচীৰ লক্ষ্য গোট হিচাপে অন্তর্ভুক্ত কৰা হয়।
এদিনীয়া এই কার্যসূচীয়ে একে সময়তে মাধৱদের বিশ্ববিদ্যালয়ৰ পাঠাভ্যাস, জ্ঞানচর্চা আৰু শৈক্ষিক ঐতিহ্য সংৰক্ষণৰ প্রতি দায়বদ্ধতা আৰু কৰ্মচাৰীসকলৰ দক্ষতা বিকাশৰ প্রতি বিশ্ববিদ্যালয়ৰ গুৰুত্ব প্রতিফলিত কৰে।