GovernmentSchool: দৈনিক অগ্ৰদূত ডিজিটেল ডেস্ক: ‘শিক্ষক আলু নহয়, সকলো কামতে চৰকাৰে শিক্ষকসকলক নিয়োগ নকৰিব। চৰকাৰে ছাত্ৰ-ছাত্ৰীৰ ভৱিষ্যৎ ধ্বংস নকৰিব। ব্যক্তিগত খণ্ডৰ বিদ্যালয়ক বৰপীৰা পাৰি দি চৰকাৰী বিদ্যালয় ধ্বংসৰ এয়া চৰকাৰী কুটিল ষড়যন্ত্র। চৰকাৰী শিক্ষকসকলক একমাত্র শিক্ষাদানতে নিয়োজিত কৰি ৰাখক। এয়াই তেওঁলোকৰ একমাত্র কাম হ’ব লাগে।’
এই মন্তব্য একাংশ অভিভাৱক-অভিভাৱিকাৰ। লোকপিয়ল আৰু নগাঁৱৰ সমাগত উপ-নির্বাচনত শিক্ষক-শিক্ষয়িত্রীসকলক নিয়োজিত কৰাত কালি কলিয়াবৰৰ বহুকেইখন বিদ্যালয়ত অঘোষিতভাবে পাঠদান বন্ধ হয়। ইয়াকে লৈ ক্ষোভ প্রকাশ কৰি চৰকাৰৰ বিৰুদ্ধে সৰৱ হৈ উঠিছে ছাত্র-ছাত্রীসকলৰ লগতে তেওঁলোকৰ অভিভাৱকসকল।
পুৱা সময়মতে বিদ্যালয়লৈ আহি পাঠগ্রহণ অবিহনে উভতি যাব লগা হয় বহু ছাত্র-ছাত্রী। অঘোষিতভাবে মঙলবাৰে পাঠদান বন্ধ থকা এখন ৰাজহুৱা খণ্ডৰ বিদ্যালয় হ’ল কলিয়াবৰ শিক্ষাখণ্ডৰ অন্তৰ্গত সাত নম্বৰ বৰভগীয়া প্ৰাথমিক বিদ্যালয়। আনদিনাৰ দৰে আজিও পুৱা সময়মতে স্কুলখনত ছাত্র-ছাত্রীসকল উপস্থিত হয় যদিও বহু দেবিলৈ বিদ্যালয়ৰ তলা খোল নাখালে। কাৰণ বিদ্যালয়ৰ শিক্ষক-শিক্ষয়িত্রীসকলক আন কামত নিয়োজিত কৰা হৈছে। ফলত ঘণ্টাৰ পাছত ঘণ্টা অপেক্ষা কৰিও কোনো শিক্ষক নহাত উপায়ান্তৰ হৈ ছাত্র-ছাত্রীসকল ঘৰলৈ উভতি যায়।
শৈক্ষিক দিনপঞ্জীত কোনো বন্ধ নথকাকৈয়ে এনেদৰে বিদ্যালয়ৰ পাঠদান বন্ধ থকাক লৈ অভিভাৱকসকলৰ মাজত প্ৰচণ্ড ক্ষোভৰ সৃষ্টি হৈছে। অনুসন্ধান কৰি জানিব পৰা মতে বিদ্যালয়খন দুজনীয়া শিক্ষকৰ বিদ্যালয়। ইয়াৰে এজন শিক্ষক সম্প্রতি লোকপিয়লৰ কামত নিয়োজিত হৈ আছে। আনগৰাকী শিক্ষকক উপ-নির্বাচনৰ কামত নিয়োজিত কৰা হৈছে। আজি নিৰ্বাচনৰ প্ৰশিক্ষণ গ্রহণ কৰিবলৈ যোৱাৰ বাবে শিক্ষকৰ অভাৱত বিদ্যালয় বন্ধ ৰাখিবলগীয়া হয়। ফলত এখন চৰকাৰী বিদ্যালয় বিনা ঘোষণাৰে বন্ধ হৈ থাকে।
আনহাতে, বিদ্যালয়খনৰ শিক্ষকদ্বয়ক আন কামত নিয়োজিত কৰা কাৰ্যক লৈ প্রশ্ন উত্থাপন হৈছে। স্থানীয় ৰাইজে মতপোষণ কৰিছে যে চৰকাৰে গুণগত শিক্ষাৰ কথা কয় যদিও বাস্তৱত শিক্ষকসকলক অনাশৈক্ষিক কামত নিয়োজিত কৰি বিদ্যালয়ত পাঠদান পর্যন্ত বন্ধ কৰিবলগীয়া হৈছে।
আনহাতে, বিদ্যালয়লৈ পুৱাই আহি শিক্ষাগ্রহণ অবিহনে উভতি যাবলগীয়া এজন ছাত্রই কয়, ‘আমি পুৱা ৮-৩০ বজাতে স্কুললৈ আহিছিলো। বহু সময় ৰ’লো, কিন্তু ছাৰ-বাইদেউ এজনো নাহিল। দুৱাৰত তলা লগোৱা নাছিল। আমি কি কৰিম, ঘৰলৈ গুচি আহিলো।’
একেদৰে এজন অভিভাৱকে ক্ষোভেৰে কয়, ‘চৰকাৰে কয় ল’ৰা-ছোৱালীক চৰকাৰী স্কুলত পঢ়াওক। আমি পঠিয়াও। কিন্তু স্কুললৈ আহি যদি তলা দেখে, তেন্তে ল’ৰা-ছোৱালীয়ে কি শিকিব? শিক্ষকক জনগণনা, নির্বাচন সকলোতে লগায়। আমাৰ ল’ৰা-ছোৱালীৰ ভৱিষ্যতৰ দায়িত্ব কোনে ল’ব? এয়া শিক্ষা বিভাগৰ সম্পূৰ্ণ টোগলকী কাণ্ড।’
স্বয়ং চৰকাৰেই ৰাজহুৱা খণ্ডৰ বিদ্যালয়সমূহৰ প্ৰতি অৱহেলা কৰা বুলি ক্ষোভপ্রকাশ কৰে আন এজন অভিভাৱকে। তেওঁ কয়, ‘দুজন শিক্ষকৰে পৰিচালিত এখন বিদ্যালয়ৰ দুয়োজন শিক্ষকক একেলগে আন কামত কেনেদৰে নিয়োগ কৰে? বিকল্প শিক্ষকৰো ব্যৱস্থা নকৰিলে। ফলত অঘোষিতভাৱে স্কুলত পাঠদানো বন্ধ হ’ল।’
উল্লেখ্য যে কলিয়াবৰৰ গ্ৰামাঞ্চলৰ সকলো ছাত্ৰ-ছাত্ৰীৰে ব্যক্তিগত বিদ্যালয়ত অধ্যয়নৰ সামর্থ্য নাই। এইসকল ছাত্র-ছাত্ৰীৰ বাবে চৰকাৰী বিদ্যালয়ে একমাত্ৰ ভৰসা। গতিকে চৰকাৰৰ এনে কূটনৈতিক কাণ্ডই মূলতঃ দৰিদ্ৰ আৰু নিম্ন আয়ৰ পৰিয়ালসমূহৰ ছাত্ৰ-ছাত্ৰীসকলৰ অপূৰণীয় ক্ষতি কৰা বুলি ব্যাপক চর্চা হৈছে।
