MilitaryTechnology: দৈনিক অগ্ৰদূত ডিজিটেল ডেস্ক: প্ৰথম দেখিলে সাধাৰণ মাছৰ লগত বিশেষ পার্থক্য বিচাৰি পোৱা নাযাব। ভালদৰে নিৰীক্ষণ কৰিলেহে সামান্য পার্থক্য দৃষ্টিগোচৰ হ’ব পাৰে। সাগৰ শাসন কৰাৰ লক্ষ্যৰে সম্প্রতি এনে এক অদ্ভুত মাছ সৃষ্টি কৰিছে চীনে। সম্প্রতি বেইজিঙৰ এক অনুষ্ঠানত প্রদর্শিত হৈছে চীনৰ এই ‘ৰবটিক বিস্ময়’। দূৰ নিয়ন্ত্ৰিত এই মাছৰ নাম ৰখা হৈছে ‘বিজি-৫ গ’ল্ডেন ড্রেগন ফিছ’।
সূত্রই জনাইছে যে সাগৰত প্ৰতিৰক্ষা বিভাগত এই মাছক ব্যৱহাৰ কৰা হ’ব পাৰে।ব’য়াগংডাও মেৰিন টেকন’লজি গ্রুপ নামৰ এটা চীনা কোম্পানীয়ে এই মাছৰূপী ৰবট নিৰ্মাণ কৰিছে। গ’ল্ডেন এৰোয়ানা ফিছৰ অনুকৰণত তৈয়াৰ কৰা এই ৰবটক ডুবাৰু ড্র’ন বুলিও ক’ব পাৰি। অৱশ্যে পানীত ব্যবহৃত অন্যান্য ড্র’নৰ লেখীয়া ইয়াৰ কোনো প্রপেলাৰ নাই, আছে মাছৰ দৰে নমনীয় ফিছা।
এই ফিছাৰ জৰিয়তে পানীক পাছলৈ ঠেলি ঠেলি ইহঁত সম্মুখলৈ আগুৱাই যায়, ঠিক মাছৰ দৰে। পূৰ্ব নিৰ্ধাৰিত পথ অবিহনে এই ৰবটে মাছৰ দৰেই পথ সৃষ্টি কৰি লয়। দাবী কৰা হৈছে যে পূর্ব নির্ধাৰিত পথ অনুসৰণৰ সমান্তৰালকৈ ইহঁতে নিজৰ পথ বিচাৰি ল’ব পাৰে। ইয়াত থকা উন্নত ছেন্সৰে স্বয়ংক্রিয়ভাবে সন্মুখত থকা যিকোনো বাধা চিনাক্ত কৰিব পাৰে। পাথৰ থাকিলে সেয়াও অতিক্ৰম কৰি যাব পাৰে।
বাধাৰ সন্মুখীন হ’লে স্বয়ংক্রিয়ভাৱে গতিপথ পৰিৱৰ্তন কৰিব পাৰে।কোম্পানীটোৰ তৰফৰ পৰা জনাইছে যে মাছটোৰ ফিছা তিনিভাগত বিভক্ত আৰু মুঠ সাতভাগত বিভক্ত, যি পানীত ঢৌৰ সৃষ্টি কৰাত সক্ষম। লগতে এই ৰবটে সাগৰৰ পাঁচ মিটাৰ গভীৰলৈ গৈ প্রতি ছেকেণ্ডত ০.৬ মিটাৰ গতিবেগত সাঁতুৰিব পাৰে।
কোম্পানীটোৰ তৰফৰ পৰা এই ৰবটৰ আৰু এক উন্নত সংস্কৰণ আনিছে। ইয়াত আছে মাল্টি ৰবট কো-অপাৰেছন প্রযুক্তি। যাৰ অর্থ, এই ধৰণৰ একাধিক ৰবটে পানীৰ তলত একেলগে কাম কৰিব পাৰে। নিজৰ মাজত কাম ভাগ কৰি ল’ব পাৰে আৰু ইটোৱে সিটোলৈ সংকেত পঠাব পাৰে।
সবাতোকৈ ডাঙৰ বিষয়টো হৈছে, এই কৃত্রিম মাছ সাগৰৰ বিস্তীর্ণ অঞ্চল পর্যবেক্ষণ কৰাত সক্ষম। শত্ৰুৰ ৰাডাৰত ইয়াৰ অস্তিত্ব ধৰা নপৰে।ফলত একাংশ বিশেষজ্ঞই দাবী কৰিছে যে এই মাছ কেৱল মানুহৰ বিনোদনৰ বাবে নহয়, বৰঞ্চ চীনৰ প্ৰতিৰক্ষা ক্ষেত্ৰত ইয়াৰ ব্যাপক প্রয়োগ হ’ব। আকাৰ সৰু হোৱাৰ বাবে ই শত্ৰুৰ দৃষ্টিৰ আঁৰ হৈ থাকিব পাৰে।
লগতে সৰু প্রবাল প্ৰাচীৰৰ মাজেৰে সহজে চলাচল কৰিব পাৰে। ফলত চীনা নৌবাহিনীৰ গুপ্তচৰ বৃত্তিত ইয়াৰ কোনো বিকল্প নাই। উল্লেখ্য যে ব’য়াগংডাও নামৰ এই কোম্পানীটোৱে পোনপটীয়াকৈ চীনৰ প্ৰতিৰক্ষা বিভাগৰ স’তে কাম কৰে। অতীততো তেওঁলোকে চীনৰ সেনাৰ বাবে একাধিক অভিনৱ প্রযুক্তি তৈয়াৰ কৰিছিল।
এসময়ত চীনা সেনাৰ স’তে মিলি তেওঁলোকে তৈয়াৰ কৰিছিল ‘ৰোবো শ্বার্ক’ নামৰ এক ৰবট, যি শত্ৰুৰ ওপৰত আক্ৰমণ কৰাতো সক্ষম।
