Nagaon Bypolls: নগাঁও লোকসভাৰ উপ- নিৰ্বাচন , পাঁচ প্ৰাৰ্থীৰ মনোনয়ন দাখিল

দৈনিক অগ্ৰদূত ডিজিটেল ডেস্ক:নগাঁও জিলা আয়ুক্ত পদৰপৰা স্বেচ্ছামূলক অৱসৰ গ্ৰহণ কৰি যোৱা ৮ ছেপ্টেম্বৰত বিজেপিত যোগদান কৰা প্ৰাক্তন আই এ এছ বিষয়া দেৱাশীষ শৰ্মাক নগাঁও সংসদীয় উপ-নিৰ্বাচনৰ বাবে এন ডি এৰ প্ৰাৰ্থী হিচাপে মনোনিত কৰাৰ পিছত আজি মনোনয়ন দাখিল অন্তিম দিনা কে’বা সহস্ৰাধিক সমৰ্থকাে বিশাল সমদলৰে আহি ৰিটাৰ্ণি বিষয়া আৰণ্যক শইকীয়া হাতত মনোনয়ন পত্ৰ দাখিল কৰে বিজেপি প্ৰাৰ্থী গৰাকী ৷

নগাঁও চহৰৰ নেহৰুবালিৰ পৰা উলিওৱা বিশাল ৰেলীত বিজেপি প্ৰাৰ্থী গৰাকীক সংগ দিয়ে ৰাজ্যিক বিজেপিৰ সভাপতি তথা দৰং-মঙলদৈৰ সাংসদ দিলীপ শইকীয়া, কৃষি মন্ত্ৰী তথা জাগীৰোডৰ বিধায়ক পীযুষ হাজৰিকা, অগপৰ কাৰ্যকৰী সভাপতি তথা কেবিনেট মন্ত্ৰী কেশৱ মহন্ত, বিধায়ক সকল ক্ৰমে ৰূপক শৰ্মা, জিতু গোস্বামী, শশীকান্ত দাস, দিছপুৰৰ বিধায়ক তথা নগাঁওৰ প্ৰাক্তন সাংসদ প্ৰদ্যুত বৰদলৈ, কাজিৰঙাৰ সাংসদ কামাখ্যা প্ৰসাদ তাছাকে ধৰি এনডিএৰ শীৰ্ষ নেতাই ৷

আনহাতে মনোনয়ন দাখিল পৰ্বত উপস্থিত থকা মন্ত্ৰী পীযুষ হাজৰিকাই কয়,নগাঁও লোকসভা সমষ্টিৰ ৰাইজে উন্নয়ন আৰু পৰিৱৰ্তন বিচাৰে। মানুহে জানে যে কেন্দ্ৰ আৰু ৰাজ্যত বিজেপিৰ ক্ষমতা আছে। মোৰ বিশ্বাস যে মানুহে বিজেপিক ভোট দিব।’ ৰাইজে নিৰ্বাচনত কংগ্ৰেছক নাকচ কৰিব আৰু বিজেপি ক্ষমতালৈ অহাৰ পিছত ভোট দিব। ৰাইজে নিৰ্বাচনত কংগ্ৰেছক নাকচ কৰি বিজেপিক ভোট দিব। দেৱাশীষ শৰ্মা এজন অতি যোগ্য প্ৰাৰ্থী। আমিয়ে শেষ হাঁহিটো মাৰিম।

ইফালে, ৬ অক্টোবৰৰ নিৰ্বাচনৰ বাবে কংগ্ৰেছ প্ৰাৰ্থী শিবামনি বৰায়ো জিলা কংগ্ৰেছ কাৰ্যালয়ৰ পৰা সহস্ৰাধিক সমৰ্থকৰে বিশাল সমদলৰে আহি জিলা আয়ুক্ত কাৰ্যালয়ত ৰিটাৰ্ণিং বিষয়াৰ হাতত দাখিল কৰে মনোনয়নপত্ৰ ৷ কংগ্ৰেছ প্ৰাৰ্থী গৰাকীক সংগ দিয়ে এপিচিচিৰ সভাপতি গৌৰৱ গগৈ,সাংসদ ৰকিবুল হুছেইন, বিৰোধী দলপতি ৱাজেদ আলী চৌধুৰী,বিধায়ক নুৰুল হুদাবহু কেইজন কংগ্ৰেছ বিধায়ক,জ্যেষ্ঠ কংগ্ৰেছ নেতা ৰিপুণ বৰা সহ বহু কেইগৰাকী নেতা ৷ গৌৰৱ গগৈয়ে সংবাদ মাধ্যমৰ আগত কয়, এই আসন খন আমাৰ আছিল ৷ আমাৰেই থাকিব ৷ বিপুল ভোটত কংগ্ৰেছ প্ৰাৰ্থী গৰাকী বিজয়ী হ’ব। ইয়াত কোনো সন্দেহ নাই৷ সংখ্যালঘুৰ ভোট নালাগে বুলি আস্ফালন কৰা মুখ্যমন্ত্ৰী গৰাকীয়ে এতিয়া ৰাতিৰ ভিতৰত চোং সলাই সংখ্যালঘু ভোটৰ বাবে হাবাথুৰি খাই পৰিছে ৷ মুছলমান সদায়ে গোৱল গালি দি অহা বিজেপিৰ মন্ত্ৰী – বিধায়ক সকলে নগাঁও সংসদীয় সমষ্টিৰ নিৰ্বাচনৰ প্ৰাকমুহূৰ্তত জাকে জাকে সংখ্যালঘু লোকক গেৰুৱাকৰণ কৰিও ক্ষান্ত নাথাকি একাংশ কংগ্ৰেছীকো যোগদান কৰাইছে৷ তেওঁলোকৰ এই ভেল্কীবাজী সকলো স্তৰৰ ৰাইজে অৱগত হৈছে৷ আগন্তুক নিৰ্বাচনত সমূচিত উত্তৰ দিব ৷

আনহাতে আজি মনোনয়ন দাখিলৰ অন্তিম দিনা কোনো ৰেলী নোলোৱাকৈ কিছু সংখ্যক সমৰ্থকক লৈ এ আই ইউ ডি এফৰ প্ৰাৰ্থী বদৰুদ্দিন আজমল আৰু টি এম চিৰ প্ৰাৰ্থী আব্দুল চালামেও মনোনয়ন দাখিল কৰে। নিৰ্দলীয় হিচাপে মনোনয়ন দাখিল কৰে সংখ্যালঘু নেতা ইউনুছ তামুলীয়ে ৷

উল্লেখ্য যে কংগ্ৰেছৰ সাংসদ প্ৰদ্যুত বৰদলৈয়ে বিধান সভা নিৰ্বাচনৰ প্ৰাকক্ষণত কংগ্ৰেছ ত্যাগ কৰি বিজেপিত যোগদান কৰি দিছপুৰৰ পৰা বিজেপি প্ৰাৰ্থী হিচাপে নিৰ্বাচনত অৱতীৰ্ণ হৈ বিধানসভালৈ নিৰ্বাচিত হয় ৷ বৰদলৈৰ পদত্যাগৰ বাবে নগাঁও সংসদীয় নিৰ্বাচন হোৱাটো নিশ্চিত হৈ পৰিছিল ৷ সেই অনুসৰি নিৰ্বাচন আয়োগে নিৰ্বাচনৰ দিন ঘোষণা কৰি ৬ অক্টোবৰত ভোটগ্ৰহণৰ দিন ধাৰ্য কৰে আৰু ৯ অক্টোবৰত হ’ব ভোট গণনা । আনহাতে আজি মনোনয়ন দাখিল কৰাৰ পিছত ১৯ ছেপ্টেম্বৰত প্ৰাৰ্থীত্ব প্ৰত্যাহাৰৰ অন্তিম তাৰিখ I