UPPL: দৈনিক অগ্ৰদূত ডিজিটেল ডেস্ক: প্রমোদ বড়ো নেতৃত্বাধীন পূৰ্বৰ ইউপিপিএলৰ পৰিষদে আৰম্ভকৰা বিটিচিৰ ১৭শ পদৰ নিযুক্তি প্রক্রিয়া বাতিল কৰা হ’ল। কালি ইয়াত অনুষ্ঠিত বিটিচিৰ কার্যবাহী পৰিষদৰ বৈঠকত এই সিদ্ধান্ত গৃহীত হয়। বৈঠকৰ অন্তত এখন সংবাদমেলত বিটিচিৰ মুৰব্বী হাগ্রামা মহিলাৰীয়ে কয় যে পূৰ্বৰ পৰিষদে ১৭শ পদৰ নিযুক্তি প্ৰক্ৰিয়া আৰম্ভ কৰিছিল।
ইয়াৰে কেতবোৰৰ লিখিত পৰীক্ষা অনুষ্ঠিত হ’লেও মৌখিক পৰীক্ষা অনুষ্ঠিত হোৱা নাছিল বা অন্যান্য নিয়মাৱলীৰ ত্রুটি আছিল। গতিকে এইসমূহ পদৰ নিযুক্তি প্রক্রিয়া বাতিল কৰা হৈছে বুলি মহিলাৰীয়ে সদৰী কৰে। নিযুক্তি প্রক্রিয়া বাতিল হোৱা পদসমূহৰ বিপৰীতে বিটিচিৰ কেন্দ্ৰীয় নিযুক্তি ব’র্ডে নতুনকৈ জাননী জাৰি কৰি নিযুক্তি পৰীক্ষা অনুষ্ঠিত কৰিব বুলি মহিলাৰীয়ে স্পষ্ট কৰি দিয়ে।
মহিলাৰীয়ে লগতে জনায় যে ইউপিপিএলৰ পৰিষদে বন বিভাগত নিযুক্তি দিয়া ৪১৪ টা পদৰ ৩৯৪ টা বৈধ বুলি চিনাক্ত কৰা হৈছে। এই ৩৯৪ প্রার্থীক শীঘ্রে নিযুক্তিপত্র প্রদানৰ প্ৰক্ৰিয়া আৰম্ভ হ’ব বুলিও তেওঁ প্রকাশ কৰে।
আনহাতে, বৈঠকত গৃহীত আন এক সিদ্ধান্ত সদৰী কৰি মহিলাৰীয়ে কয়, ‘সম্প্রতি সামাজিক মাধ্যম তথা বিভিন্ন মাধ্যমত মাটিৰ মূল্যায়ন অতি বেছি হোৱা বুলি চর্চা চলি আছে। বিষয়টো আজি বৈঠকত গুৰুত্ব সহকাৰে আলোচিত হয়। গতিকে বিষয়টো পুনৰীক্ষণ কৰিবলৈ সংশ্লিষ্ট বিভাগক দায়িত্ব দিয়া হৈছে।’
ইপিনে, বড়োলেণ্ড বিশ্ববিদ্যালয়ত নতুনকৈ ছটা বিভাগ অন্তৰ্ভূক্ত কৰাৰ বাবে অসম চৰকাৰৰ শিক্ষা বিভাগলৈ এক বিশেষ প্ৰস্তাৱ প্ৰেৰণ কৰা হৈছে বুলিও মহিলাৰীয়ে সংবাদমেলত ঘোষণা কৰে। এই নতুন বিভাগসমূহৰ অন্যতম হৈছে শাৰীৰিক শিক্ষা, সমাজশাস্ত্র, ডাটা ছাইন্স আৰু কৃত্রিম বুদ্ধিমত্তা, বেছম বিভাগ, চাৰুকলা শিল্প বিভাগ আৰু গ্ৰন্থাগাৰ তথা তথ্যসেৱা। তদুপৰি নেপালী, হিন্দী আৰু বাংলা বিভাগ খোলা হ’ব বুলিও সদৰী কৰে বিটিচি মুৰব্বীজনে।
