Chirang : দৈনিক অগ্ৰদূত ডিজিটেল ডেস্ক: চিৰাং জিলা সদৰ কাজলগাঁওৰ বজাৰ প্ৰেক্ষাগৃহত আজি মুখ্যমন্ত্ৰীৰ আত্মনিৰ্ভৰ অভিযান এক আৰু দুইৰ চেক বিতৰণ অনুষ্ঠান অনুষ্ঠিত হয়। চিদলী-চিৰাং বিধানসভা সমষ্টিৰ মুঠ ৬২২ গৰাকী হিতাধিকাৰীৰ মাজত চেক বিতৰণ কৰা হয়। ইয়াৰে ৯১ গৰাকীয়ে এক লাখ টকাকৈ আৰু ৫৩১ গৰাকীয়ে ২৫ হেজাৰ টকাকৈ চেক লাভ কৰে।
একেদৰে বিজনীত বিজনী বিধানসভা সমষ্টিৰ ৬২৩ গৰাকী হিতাধিকাৰীৰ মাজতো চেক বিতৰণ কৰা হয়। ইয়াৰে ৮৪ গৰাকীয়ে এক লাখ টকাকৈ আৰু ৫৩৯ গৰাকীয়ে ২৫ হেজাৰ টকাকৈ লাভ কৰে। দুয়োটা বিধানসভা সমষ্টি মিলাই সমগ্ৰ জিলাখনৰ মুঠ ১,২৪৫ গৰাকী হিতাধিকাৰীয়ে মুখ্যমন্ত্ৰীৰ আত্মনিৰ্ভৰ অসম অভিযান আঁচনিৰ ধন লাভ কৰে।
কাজলগাঁওত অনুষ্ঠিত চেক বিতৰণ অনুষ্ঠানত চিদলী-চিৰাং সমষ্টিৰ বিধায়ক পানীৰাম ব্ৰহ্ম, জিলা আয়ুক্ত গোকুল ব্ৰহ্ম, পাৰিষদ শুকুৰসিং মুছাহাৰী আৰু নন্দলাল মগৰসহ বিভিন্ন বিভাগৰ বিষয়া-কৰ্মচাৰী আৰু চিদলী-চিৰাং সমষ্টিৰ জনসাধাৰণ উপস্থিত থাকে। মুখ্যমন্ত্ৰীৰ পোনপটীয়া সম্প্ৰচাৰৰ পিছতে হিতাধিকাৰীসকলৰ মাজত চেক বিতৰণ কৰা হয়।
