AssamPolitics: দৈনিক অগ্ৰদূত ডিজিটেল ডেস্ক : বদৰুদ্দিন আজমলে ধুবুৰীৰ পৰা খেদা খালে বুলিয়েই ক’ব লাগিব। তেওঁৰ জৰাফুকাৰ ৰাজনীতি এতিয়া অসমত নচলে। আজমলক অসমৰ ৰাইজে ভালদৰে চিনি পাইছে। কংগ্রেছকো চিনি পাইছেই। বিধানসভাৰ নিৰ্বাচনৰ পাছত কংগ্রেছে এই উপনির্বাচনত ভালদৰে খেদা খাব।’
এইদৰে শুকুৰবাৰে ইয়াত এআইইউডিএফৰ মুৰব্বী তথা নগাঁও লোকসভা সমষ্টিৰ প্রার্থী বদৰুদ্দিন আজমল তথা কংগ্রেছক তীব্র সমালোচনা কৰে অগপৰ মুৰব্বী তথা মন্ত্রী অতুল বৰাই। মন্ত্ৰী বৰাই লগতে কয়, ‘অসম গণ পৰিষদ অসমৰ একমাত্র আঞ্চলিক ৰাজনৈতিক দল। আঞ্চলিক স্বার্থ সুৰক্ষিত কৰিবৰ বাবে জন্মা এটা দল। ঘাত-প্রতিঘাত নেওচি দলক শক্তিশালী কৰিবলৈ প্রয়াস অব্যাহত আছে। প্রগতিশীল জাতীয়তাবাদৰ চিন্তাৰে নতুন প্রজন্মক আগুৱাই নিয়াৰ প্ৰয়াস কৰিছো। সেই কাৰণেই বহু ঠাইত বিভিন্ন শ্ৰেণীৰ লোক আৰু নৱপ্ৰজন্মৰ লোকসকলে অগপত যোগদান কৰিছে।’
তেওঁ লগতে কয়, ‘অগপক দুৰ্বল কৰিবলৈ কংগ্ৰেছে জাতীয় পৰিষদৰ লগ লাগি কাম কৰিছে।’মন্ত্ৰী বৰাই কয়, ‘আমি আজি নগাঁও সংসদীয় সমষ্টিৰ উপ-নির্বাচনৰ মিত্ৰজোঁটৰ প্ৰাৰ্থীৰ হৈ প্ৰচাৰ চলাবলৈ অহাৰ প্রাকমুহূতত অগপৰ নগাঁও জিলা সমিতিৰ কাৰ্যালয়ত অনুষ্ঠিত এক যোগদান কার্যসূচীত অংশগ্রহণ কৰো। অজাপৰ হোজাই জিলা সমিতিৰ বহু সংখ্যক বিষয়ববীয়া আৰু সদস্যই অগপত যোগদান কৰিছে। এই সকল পূৰ্বতে কংগ্ৰেছৰ লগত আছিল আৰু তেওঁলোকে গত বিধানসভা নির্বাচনত যৌথভাবে নির্বাচন খেলিছিল। এইসকলৰ যোগদানে অকল হোজাইতে নহয় সমগ্র নগাঁও জিলাত অগপৰ ভেটি শক্তিশালী কৰিব।’
তেওঁ কয় যে অগপ এনডিএৰ সহযোগী দল আৰু অসমত বিজেপি নেতৃত্বাধীন মিত্ৰজোঁটৰ অংশীদাৰ। নগাঁও সংসদীয় সমষ্টিত মিত্ৰজোঁটৰ প্ৰাৰ্থীৰ হৈ দলৰ কৰ্মকর্তাসকলে সংসদীয় সমষ্টিৰ অন্তর্গত আঠটা বিধানসভা সমষ্টিত প্ৰচাৰ চলাই আছে বুলি তেওঁ সদৰী কৰে। লগতে কয়, ‘অগপৰ বিধায়ক, সাংসদ, দলীয় নেতাসকলকো প্ৰচাৰ অভিযানত অংশ ল’বলৈ দায়িত্ব দিয়া হৈছে। আমি নিশ্চিত যে এই উপ-নির্বাচনত মিত্ৰজোঁটৰ প্ৰাৰ্থী দেৱাশীষ শর্মা বিপুল ভোটত জয়ী হ’ব।’
উল্লেখ্য যে অগপৰ নগাঁও জিলা সমিতিৰ উদ্যোগত আজি এক বৃহৎ যোগদান কার্যসূচী অনুষ্ঠিত হয়। দলৰ কাৰ্যকৰী সভাপতি মন্ত্রী কেশৱ মহন্তই অগপত যোগদান কৰা সকলক আদৰণি জনাই কয় যে জাতীয় পৰিষদৰ লগতে কিছু সংখ্যক কংগ্ৰেছ আৰু এআইইউডিএফৰ কৰ্মীয়ে অগপত যোগদান কৰিছে। তেওঁলোকৰ যোগদানে অগপক শক্তিশালী কৰিব। অগপৰ নগাঁও জিলা সমিতিৰ কাৰ্যালয়ত অনুষ্ঠিত এই কার্যসূচীত অসম জাতীয় পৰিষদৰ হোজাই জিলা সমিতিৰ বিষয়ববীয়া, সদস্যসকলে যোগদান কৰে।
নগাঁও লোকসভা সমষ্টিৰ উপ-নিৰ্বাচনৰ বিজেপি প্রার্থী দেৱাশীষ শৰ্মাৰ হৈ প্ৰচাৰ চলাবলৈ আহি অগপৰ সভাপতি তথা মন্ত্রী অতুল বৰা আৰু কাৰ্যকৰী সভাপতি তথা মন্ত্রী কেশৱ মহন্তই এই যোগদান অনুষ্ঠানত অংশগ্ৰহণ কৰে। অনুষ্ঠানত অজাপৰ হোজাই জিলা সমিতিৰ সভাপতি লুটফুৰ ৰহমান, উপ-সভাপতি কুতুৱ আলী, সাধাৰণ সম্পাদক মিনহাজ আহমেদ, ৰাজ্যিক কার্যনির্বাহক সদস্য বেণি মাধর ঘোষকে ধৰি কাৰ্যনিৰ্বাহকৰ সকলো সদস্য, সাধাৰণ সদস্যসকলে অগপত যোগদান কৰে। তেওঁলোকক অগপৰ নেতৃত্বই আদৰণি জনায়।
অগপত যোগদান কৰি জাতীয় পৰিষদৰ হোজাই জিলা সমিতিৰ সভাপতি লুটফুৰ ৰহমানে অজাপ আৰু কংগ্ৰেছক কঠোৰ সমালোচনা কৰি কয় যে কংগ্ৰেছৰ বোকোচাত উঠি কেতিয়াও আঞ্চলিকতাবাদ সুৰক্ষিত কৰিব নোৱাৰি। তেওঁ কয়, সেয়ে তেওঁলোকে অগপত যোগদান কৰিছে। যোগদান কাৰ্যসূচীৰ পাছতে অগপৰ দুই শীর্ষ নেতৃত্বই নতুন প্ৰজন্মৰ ছাত্ৰ-ছাত্ৰীসকলৰ লগত মত বিনিময় কৰি আঞ্চলিকতাবাদক শক্তিশালী কৰিবলৈ আহ্বান জনায়।
এই দুটা অনুষ্ঠানত মন্ত্ৰী বৰা আৰু মহন্তৰ উপৰি অগপ নেতা অতুল কুমাৰ মেধি, অগপৰ নগাঁও জিলা সমিতিৰ সভাপতি মণিমাধৱ মহন্ত আদিয়ে অংশগ্ৰহণ কৰে। ইয়াৰ পাছতে মন্ত্ৰী বৰা, মহন্তসহ অগপৰ নেতাসকলে ধিং বিধানসভা সমষ্টিৰ অন্তৰ্গত বৰভেটি পঞ্চায়ত, নগাঁও-বটদ্রৱা বিধানসভা সমষ্টিৰ অন্তৰ্গত বৰঘাট আৰু হয়বৰগাঁও, ৰূপহীহাট বিধানসভা সমষ্টিৰ অন্তৰ্গত সুতিৰপাৰ খেলপথাৰ আৰু ৰূপহী ৰাজহুৱা প্রেক্ষাগৃহত অনুষ্ঠিত নির্বাচনী সভাত অংশগ্ৰহণ কৰি বিজেপি নেতৃত্বাধীন মিত্রজোঁটৰ প্রার্থী দেৱাশীষ শৰ্মাৰ হৈ প্ৰচাৰ চলায়।
তেওঁলোকে কংগ্ৰেছ আৰু এআইইউডিএফক কঠোৰ সমালোচনা কৰি কয় এই দুয়োটা দলে উন্নয়ন নিবিচাৰে। উন্নয়ন আৰু বিকাশৰ বাবে মিত্ৰজোঁটৰ প্রার্থী দেৱাশীষ শর্মাক আশীর্বাদ আৰু সমর্থন জনাবলৈ ৰাইজক দুই মন্ত্রীয়ে আহ্বান জনায়।
