SignboardControversy :দৈনিক অগ্ৰদূত ডিজিটেল ডেস্ক : হিন্দী ভাষা ব্যৱহাৰক লৈ দক্ষিণ ভাৰতৰ ৰাজ্যসমূহত কটকটীয়া স্থিতিৰ মাজতে তামিলনাডুত লোৱা হৈছে গুৰুত্বপূৰ্ণ পদক্ষেপ। ৰাজ্যখনৰ ৰাজ্যিক ঘাইপথৰ ছাইনব’ৰ্ডত হিন্দী ভাষাত নাম লিখাৰ অভিযোগত দুগৰাকী বিষয়াক নিলম্বন কৰা হৈছে।
একে সময়তে ছাইনব’ৰ্ডসমূহৰ পৰা আঁতৰোৱা হৈছে হিন্দী ভাষাত লিখা অংশ। ঘটনাটো পোহৰলৈ অহাৰ পাছতে সৃষ্টি হৈছে ব্যাপক প্ৰতিক্ৰিয়াৰ।
চৰকাৰৰ ফালৰ পৰা জনোৱা হৈছে যে এয়া তামিলনাডুৰ দ্বি-ভাষিক নীতিৰ উলংঘন। তথ্য অনুসৰি, ঘটনাটো তুতিকোৰিনৰ সাত্তানকুলাম-নাজাৰেথ ৰাজ্যিক ঘাইপথ (SH-93)ৰ। পথটোৰ ছাইনব’ৰ্ডসমূহত তামিল আৰু ইংৰাজীৰ লগতে হিন্দী ভাষাতো চহৰৰ নাম লিখা হৈছিল।
বিষয়টো পোহৰলৈ অহাৰ পাছতে তৎপৰ হৈ পৰে চৰকাৰ। ছাইনব’ৰ্ডসমূহ স্থাপনৰ দায়িত্বত থকা দুগৰাকী বিষয়াক নিলম্বন কৰা হয়। তামিলনাডু চৰকাৰৰ ফালৰ পৰা স্পষ্ট কৰা হৈছে যে ৰাজ্যখনৰ দ্বি-ভাষিক নীতি উলংঘাৰ অভিযোগত দুয়োগৰাকী বিষয়াৰ বিৰুদ্ধে বিভাগীয় পদক্ষেপ গ্ৰহণ কৰা হৈছে।
ইয়াৰ ভিতৰত ছাইনব’ৰ্ডৰ পৰা হিন্দী ভাষা আঁতৰোৱাটোও অন্তৰ্ভুক্ত। চলিত বৰ্ষত এনে ঘটনা এইবাৰকে ধৰি তিনিবাৰ পোহৰলৈ আহিছে।
উল্লেখ্য যে তামিলনাডুত দীৰ্ঘদিন ধৰি দ্বি-ভাষিক নীতি প্ৰচলিত হৈ আছে। এই নীতি অনুসৰি চৰকাৰী কাম-কাজ আৰু শিক্ষাক্ষেত্ৰত তামিল আৰু ইংৰাজী ভাষাৰ ব্যৱহাৰ বাধ্যতামূলক। কেন্দ্ৰীয় চৰকাৰে ত্ৰি-ভাষিক নীতি প্ৰয়োগৰ চেষ্টা চলালে আৰম্ভণিৰে পৰাই ৰাজ্যখনে ইয়াৰ বিৰোধিতা কৰি আহিছে।
১৯৬৫ চনত তামিলনাডুত চৰকাৰী ভাষা আইন গৃহীত হৈছিল। ইয়াৰ জৰিয়তে তামিল ভাষাক চৰকাৰী ভাষা হিচাপে গণ্য কৰা হয়। এই আইনৰ জৰিয়তে ৰাজ্যিক ঘাইপথ আৰু ৰাষ্ট্ৰীয় ঘাইপথৰ নিয়ম পৃথক হ’ব পাৰে। ৰাজ্যখনে নিজৰ অধীনস্থ পথসমূহত নিজস্ব ভাষা নীতি প্ৰয়োগ কৰিব পাৰে।
ইয়াৰ উপৰি, বহু ৰাজ্যত দোকান আৰু বাণিজ্যিক প্ৰতিষ্ঠানৰ ছাইনব’ৰ্ডত স্থানীয় ভাষাৰ ব্যৱহাৰক লৈ নিয়ম আছে। যেনে, পঞ্জাৱত পাঞ্জাবী আৰু কৰ্ণাটকত কন্নড় ভাষাৰ ব্যৱহাৰ স্থানীয় আইনৰ জৰিয়তে বাধ্যতামূলক কৰা হৈছে। ইয়াৰ উদ্দেশ্য স্থানীয় ভাষাক উৎসাহিত কৰা।
তামিলনাডুৰ এই আইনৰ জৰিয়তে যোৱা মাৰ্চ মাহত তিৰুচিৰাপল্লীৰ ৰে’লৱে কাৰ্যালয়ৰ প্ৰৱেশদ্বাৰৰ পৰা হিন্দীত লিখা ‘কৰ্তব্য দ্বাৰ’ আঁতৰোৱা হৈছিল। একেটা মাহতে দ্ৰাবিড় ৰাজনৈতিক দলৰ কৰ্মীসকলে ছিংগানাল্লুৰ ষ্টেচনত থকা হিন্দী লেখা ক’লা চিয়াঁহীৰে ঢাকি দিছিল।
