NobelPrize2026 : দৈনিক অগ্ৰদূত ডিজিটেল ডেস্ক : শুকুৰবাৰে নৰৱেৰ নোবেল কমিটীয়ে শান্তি আৰু আন্তঃৰাষ্ট্ৰীয় আইনক প্ৰসাৰিত কৰাৰ ক্ষেত্ৰত আগবঢ়োৱা অৱদানৰ বাবে নৱনীতেম “নাভি” পিল্লাইক ২০২৬ চনৰ শান্তিৰ নোবেল বঁটা প্ৰদান কৰে।
দক্ষিণ আফ্ৰিকাৰ ডাৰবানত বৰ্ণবৈষম্যৰ শাসন চলি থকা সময়ত ভাৰতীয় তামিল মূলৰ এটা পৰিয়ালত জন্মগ্ৰহণ কৰা পিল্লাই এগৰাকী অধিবক্তা আৰু আইনী ক্ষেত্ৰৰ অগ্ৰণী ব্যক্তি হিচাপে প্ৰতিষ্ঠা লাভ কৰে।
তেওঁ গভীৰ গাঁথনিগত বৈষম্য, পৃথকীকৰণ আৰু বহিষ্কৰণৰ বিৰুদ্ধে থিয় দিছিল।বৰ্ণবৈষম্যৰ বিৰুদ্ধে যুঁজ দিয়া নেলছন মেণ্ডেলা আৰু আনসকলৰ হৈ ওকালতি কৰাৰ প্ৰাৰম্ভিক কৰ্মৰ পৰা আৰম্ভ কৰি আমাৰ সময়ৰ কেবাটাও গুৰুত্বপূৰ্ণ আন্তঃৰাষ্ট্ৰীয় গোচৰত ন্যায়াধীশ হিচাপে কাৰ্যনিৰ্বাহ কৰালৈকে তেওঁৰ কৰ্মজীৱনত এক উমৈহতীয়া ধাৰা পৰিলক্ষিত হয়।
নোবেল কমিটীয়ে কয় যে পিল্লাইয়ে ৰাষ্ট্ৰ আৰু ৰাষ্ট্ৰীয় নেতাসকলক তেওঁলোকৰ কাৰ্যৰ বাবে জবাবদিহি কৰিছিল আৰু হিংসা তথা সংঘাতৰ বলি হোৱা লোকসকলৰ মাজত আশাৰ সঞ্চাৰ কৰিছিল। দীৰ্ঘ কৰ্মজীৱনত তেওঁ এক দৃঢ় নৈতিক আদৰ্শৰ পৰিচয় দিছিল।
নাভি পিল্লাই অধিকৃত পেলেষ্টাইন ভূখণ্ড সম্পৰ্কীয় ৰাষ্ট্ৰসংঘৰ অনুসন্ধান আয়োগৰ অধ্যক্ষ আছিল। যোৱা বছৰ আয়োগে এই সিদ্ধান্তত উপনীত হৈছিল যে ইজৰাইলে গাজাত গণহত্যা সংঘটিত কৰিছে। ৰয়টাৰ্ছৰ বাতৰি অনুসৰি, ইজৰাইলে এই প্ৰতিবেদনক “কলংকজনক” বুলি অভিহিত কৰি নাকচ কৰিছিল।
১২ লাখ ছুইডিছ ক্ৰোনা, অৰ্থাৎ প্ৰায় ১২ লাখ মাৰ্কিন ডলাৰ মূল্যৰ শান্তিৰ নোবেল বঁটা অহা ১০ ডিচেম্বৰত অছল’ত প্ৰদান কৰা হ’ব। উল্লেখ্য যে ছুইডিছ উদ্যোগপতি আলফ্ৰেড নোবেলৰ মৃত্যু বাৰ্ষিকীৰ দিনটোতে এই বঁটা প্ৰদান কৰা হয়। ১৮৯৫ চনত কৰা তেওঁৰ উইল অনুসৰিয়েই এই বঁটাসমূহৰ প্ৰৱৰ্তন কৰা হৈছিল।
