IndiaPopulation : দৈনিক অগ্ৰদূত ডিজিটেল ডেস্ক : ভাৰতত উদ্বেকজনক হাৰত হ্রাস পাইছে প্ৰজননৰ হাৰ। ফলত শিশু বা কম বয়সীয়া লোকৰ তুলনাত বৃদ্ধি পাইছে বয়স্ক লোকৰ সংখ্যা। এই ধাৰা অব্যাহত থাকিলে আনকি ১৬ বছৰৰ ভিতৰতে দেশত সর্বাধিক হ’ব অতি বয়স্ক লোকৰ সংখ্যা। এই উদ্বেগজনক তথ্য প্রকাশ কৰিছে আন্তৰ্জাতিক গৱেষক সংস্থা মুডীজে।
সংস্থাটোৰ মতে, জনসংখ্যা স্থিতিশীল ৰখাৰ বাবে প্রয়োজনীয় প্ৰজননৰ হাৰ ভাৰতত শেহতীয়াভাৱে বহুগুণে হ্রাস পাইছে। ফলত কম বয়সীয়া লোকতকৈ বয়স্ক ব্যক্তিৰ সংখ্যা বৃদ্ধি পাবলৈ ধৰিছে। এয়া মুঠেও সুখৰ বতৰা নহয়।
কাৰণ কৰ্মক্ষম লোকৰ সংখ্যা হ্রাস পাবলৈ ধৰিছে। ইয়াৰ বিপৰীতে অৱসৰ গ্ৰহণ কৰা ব্যক্তিৰ সংখ্যা বৃদ্ধি পাবলৈ ধৰিছে। গতিকে পেঞ্চন, চিকিৎসা ব্যৱস্থা আদিৰ বাবদ ব্যয়ৰ পৰিমাণ বৃদ্ধি পাবলৈ ধৰিছে। উল্লেখ্য যে নৰেন্দ্ৰ মোদী চৰকাৰে ২০৪৭লৈ বিকশিত ভাৰতৰ অৰ্থাৎ উন্নত দেশত দেশক পৰিণত কৰোৱাৰ সপোন দেখুৱাই আহিছে।
এনে অৱস্থাতে মুডীজে দেশৰ জনগাঁথনিলৈ কেনে পৰিৱৰ্ত আহিছে তাৰ উদ্বেগজনক তথ্য প্রকাশ কৰিছে। সংস্থাটোৰ শেহতীয়া প্রতিবেদন অনুসৰি ইতিমধ্যে ২০২৪তে ভাৰতে ‘বয়স্ক জনসমষ্টি বিশিষ্ট’ (এজিং) দেশৰ তালিকাত প্ৰৱেশ কৰিছে।
সংস্থাটোৱে লগতে আঙুলিয়াই দিছে যে ২০৪৯ৰ ভিতৰত ভাৰত ‘বয়স্ক’ আৰু ২০৬৫ৰ ভিতৰত অতি বয়স্ক জনসমষ্টিৰ দেশত পৰিণত হ’ব। অর্থাৎ মাথোঁ ১৬ বছৰৰ ভিতৰতে দেশ বয়স্কৰ পৰা অতি বয়স্ক জনসমষ্টি লোকৰ দেশত পৰিণত হ’ব। অৱশ্যে আমেৰিকা যুক্তৰাষ্ট্ৰৰ দৰে দেশতো বয়স্ক লোকৰ ব্যক্তিৰ সংখ্যা বৃদ্ধি পাবলৈ ধৰিছে।
আনকি আমেৰিকা যুক্তৰাষ্ট্ৰকো বয়স্কৰ পৰা অতি বয়স্ক জনসমষ্টিৰ দেশত পৰিণত হ’বলৈ মাথোঁ ১৯ বছৰহে প্রয়োজন হ’ব বুলি মুডীজে পূর্বানুমান কৰিছে। একেদৰে এই ক্ষেত্ৰত ইণ্ডোনেছিয়াক ২৯ বছৰৰ প্ৰয়োজন হ’ব।
ভাৰতৰ ক্ষেত্রত সংস্থাটোৱে কৈছে যে দেশ উন্নত তথা ধনী দেশত পৰিণত হোৱাৰ পূৰ্বে বয়স্ক জনসমষ্টিৰ দেশতহে পৰিণত হ’ব। যি ঘটনা ইউৰোপ আৰু জাপানৰ ক্ষেত্ৰত বিপৰীত হৈছে। অর্থাৎ এই দেশ-মহাদেশসমূহ উন্নত হোৱাৰ পাছতহে বয়স্ক জনসমষ্টিৰ দেশত পৰিণত হৈছে।
উল্লেখ্য যে আন্তর্জাতিক সংস্থাৰ গৱেষণা অনুসৰি ১৯৫০ৰ পৰাই বিশ্বত প্ৰজননৰ হাৰ হ্রাস পাই আহিছে। তেতিয়া নাৰীৰ উৰ্বৰতাৰ হাৰ ৪.৯ শতাংশ আছিল যদিও সম্প্রতি ইয়াৰ পৰিমাণ ২.২তকৈ সামান্যহে অধিক হৈছে। ভাৰতত এই হাৰ ১.৯হে।
এই তথ্য প্রকাশ পাইছে প্ৰধানমন্ত্ৰীৰ আৰ্থিক উপদেষ্টা পৰিষদৰ সদস্য সঞ্জীৱ সন্যালৰ নেতৃত্বত এটা দলে কৰা গৱেষণাত। অৱশ্যে বিহাৰ আৰু উত্তৰ প্ৰদেশৰ সৰ্বভাৰতীয় গড়তকৈ প্ৰজননৰ হাৰ অধিক। ৰাজ্য দুখনত এই হাৰ ১.৬। অৱশ্যে এই ক্ষেত্রত প্রশ্ন উত্থাপন হয় যে যদি ভাৰতত জন্মৰ হাৰ হ্রাস পাইছে তেন্তে দেশত জনসংখ্যা এতিয়াও কিয় ঊর্ধ্বমুখী হৈ আছে?
ইয়াৰ উত্তৰত গৱেষকসকলে কৈছে যে জনসংখ্যাৰ নিজস্ব গতি প্রকৃতি আছে। গৱেণষা অনুসৰি জন্মৰ হাৰ হ্ৰহ্রাস পালেও মানুহৰ গড় আয়ুস বৃদ্ধিৰ ফলত জনসংখ্যা বৃদ্ধিৰ ধাৰা অটুট আছে।
কিন্তু কম বয়সীয়া বা শিশুৰ তুলনাত বয়স্ক লোকৰ সংখ্যা বৃদ্ধি পাইছে। ফলত আৰু কিছু বছৰৰ ভিতৰতে দেশত কর্মক্ষম লোকৰ সংখ্যা উদ্বেগজনক হাৰত সম্ভাৱনা আছে। একেদৰে পৰিয়ালৰ সংখ্যা হ্রাস পাব। ফলত সা-সামগ্ৰীৰ চাহিদা হ্রাস পাব।
গতিকে নির্মাণ, যানবাহন আৰু স্কুল-কলেজ আদি সকলো ক্ষেত্রতে নেতিবাচক প্ৰভাৱ পৰিব। বিশেষজ্ঞসকলৰ মতে, দেশৰ আর্থিক বৃদ্ধি বজাই ৰখাৰ স্বাৰ্থত উৎপাদনশীলতাৰ ওপৰত অধিক নিৰ্ভৰ কৰা হ’ব। কিন্তু কর্মক্ষম লোকৰ সংখ্যা হ্রাস পাব। ফলত সা-সামগ্ৰীৰ চাহিদা হ্রাস পাব। এই সম্পৰ্কত ৰাষ্ট্ৰসংঘৰ প্ৰজনন আৰু জনসংখ্যা বিষয়ক সংস্থাই মত পোষণ কৰিছে যে ২০৫০ৰ ভিতৰত ভাৰতত বয়স্ক জনসমষ্টিৰ সংখ্যা ১৩৪ শতাংশ বৃদ্ধিৰ আশংকা আছে। একেদৰে ৮০ বা ততোধিক বয়সৰ লোকৰ সংখ্যা ২৭৯ শতাংশ বৃদ্ধি পাব পাৰে।
