CockroachJantaParty : দৈনিক অগ্ৰদূত ডিজিটেল ডেস্ক : ককৰোচ জনতা পাৰ্টি (CJP)ৰ তিনি নেতা অভিজিৎ দীপকে, সৌৰভ দাস আৰু আশুতোষ ৰাঙ্কাক মুকলি কৰি দিলে দিল্লী আৰক্ষীয়ে। সতৰ্কতামূলক ব্যৱস্থা হিচাপে তেওঁলোকক গ্ৰেপ্তাৰ কৰা হৈছিল।
দেওবাৰে পুৱা তিনিওজনকে দিল্লী কেণ্টনমেণ্ট থানাত কাৰ্যবাহী দণ্ডাধীশৰ সন্মুখত হাজিৰ কৰোৱা হয়। তাৰ পিছতে তেওঁলোকক মুকলি কৰি দিয়া হয়। অৱশ্যে নিৰ্দিষ্ট চৰ্ততহে মুক্তি লাভ কৰিছে দীপকে, সৌৰভ আৰু ৰাঙ্কাই।
CJPৰ আইনী বিষয়সমূহ চোৱাচিতা কৰা ‘লিগেল টীম’ৰ মুৰব্বী ৰত্না সিঙে জানিবলৈ দিয়া অনুসৰি, দীপকে, সৌৰভ আৰু ৰাঙ্কাই এবছৰৰ বাবে কোনো স্থানতে শান্তি ভংগ কৰিব নোৱাৰিব। এই চৰ্ততে তেওঁলোকক মুকলি কৰি দিয়া হৈছে। মুক্তি লাভ কৰাৰ পাছত ৰাঙ্কাই জনায় যে দেওবাৰে দুপৰীয়া দুই বজাত তেওঁলোকে এখন সংবাদমেল অনুষ্ঠিত কৰিব।
দীপকে আৰু আন দুজন নেতাৰ মুক্তিৰ পিছতে CJPয়ে এটা বিবৃতি প্ৰকাশ কৰে। বিবৃতিটোত কোৱা হৈছে, ‘‘ককৰোছ কেতিয়াও নমৰে। অৱশেষত দীপকে, সৌৰভ আৰু ৰাঙ্কাক মুকলি কৰি দিবলৈ বাধ্য হ’ল দিল্লী আৰক্ষী।’’
ভাৰতীয় নাগৰিক সুৰক্ষা সংহিতাৰ ১২৬ আৰু ১৭০ নং ধাৰাৰ অধীনত CJPৰ তিনি নেতাক সতৰ্কতামূলকভাৱে গ্ৰেপ্তাৰ কৰা হৈছিল। দিল্লীৰ আন্দোলনত অংশগ্ৰহণ কৰিবলৈ শনিবাৰে পুৱা মুম্বাইৰ পৰা তেওঁলোক ৰাজধানীত উপস্থিত হৈছিল।
পুৱা ১০ বাজি ১৯ মিনিটত তেওঁলোকৰ বিমানখন দিল্লী বিমানবন্দৰত অৱতৰণ কৰিছিল। সেই বিমানখনত উঠিয়েই আৰক্ষীয়ে তেওঁলোকক আটক কৰে।
তেওঁলোকৰ মুক্তিৰ দাবীত CJPয়ে উচ্চতম ন্যায়ালয়ৰো দ্বাৰস্থ হৈছিল। অৱশ্যে তাৰ আগতেই তেওঁলোকক মুকলি কৰি দিয়া হয়। শনিবাৰে পুৱাৰে পৰা দীপকে, ৰাঙ্কা আৰু সৌৰভ ক’ত আছিল, সেই বিষয়ে জানিব পৰা হোৱা নাছিল।
তেওঁলোকৰ পৰিয়ালেও যোগাযোগ কৰিব পৰা নাছিল বুলি অভিযোগ উত্থাপন হৈছিল। ইয়াৰ মাজতে শনিবাৰে দীৰ্ঘদিনীয়া অসুস্থতাৰ অন্তত দীপকেৰ আইতাকৰ মৃত্যু হয়। দিল্লী আৰক্ষীয়ে দাবী কৰে যে দীপকেৰ ওচৰলৈ মৃত্যুৰ খবৰ প্ৰেৰণ কৰা হৈছে।
যন্তৰ-মন্তৰৰ অভিযানত অংশগ্ৰহণ কৰাৰ পূৰ্বে ইউটিউবাৰ ধ্ৰুৱ ৰাঠীকো আৰক্ষীয়ে আটক কৰিছিল। শনিবাৰে পুৱা গুৰুগ্ৰামৰ বাসগৃহৰ পৰা তেওঁক আটক কৰা হৈছিল। গভীৰ নিশা তেওঁক মুকলি কৰি দিয়া হৈছে বুলি খবৰ প্ৰকাশ পাইছে।
ইয়াৰ উপৰি শুকুৰবাৰে নিশাৰ পৰা শনিবাৰৰ গোটেই দিনটো ৰাজধানীৰ বিভিন্ন স্থানত ব্যাপক ধৰপাকড় চলায় আৰক্ষীয়ে। প্ৰায় ৭,০০০ লোকক আটক কৰা হৈছিল। তেওঁলোকৰ অধিকাংশকে নিশাৰ ভিতৰতে মুকলি কৰি দিয়া হয়।
দেশৰ মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগ আৰু ভোটাৰ তালিকাৰ বিশেষ নিবিড় সংশোধন (SIR) বাতিলৰ দাবীত শনিবাৰে যন্তৰ-মন্তৰ অভিযানৰ আহ্বান জনাইছিল দীপকে আৰু তেওঁৰ সহযোগীসকলে। তেওঁলোকক আটক কৰা হ’লে অজিংক্য শিণ্ডেই আন্দোলনৰ নেতৃত্ব দিব বুলি ঘোষণা কৰিছিল দীপকে। বৰ্তমান অজিংক্য মুম্বাইত আছে।
দেওবাৰে বিয়লি মুম্বাইৰ শিৱাজী পাৰ্কত তেওঁ প্ৰতিবাদী কাৰ্যসূচীৰ আহ্বান জনাইছে। ইয়াৰ লগতে পুনৰ এবাৰ যন্তৰ-মন্তৰ অভিযানৰ আহ্বান জনাইছে ককৰোচসকলেও।
