CJP: দৈনিক অগ্ৰদূত ডিজিটেল ডেস্ক : কেতিয়াবা দেশৰ শিক্ষা ব্যৱস্থা সংস্কাৰৰ দাবীত, কেতিয়াবা ছাত্র-ছাত্রীৰ অধিকাৰৰ দাবীত আন্দোলনৰ নেতৃত্ব প্রদান কৰি কম দিনৰ ভিতৰতে দেশজুৰি চৰ্চা অৰ্জন কৰিবলৈ সক্ষম হোৱা নেহা বৰাৰ ওপৰত সম্প্ৰতি কোটি কোটি ভাৰতীয়ৰ দৃষ্টি নিবদ্ধ আছে। বয়সৰ হিচাপত আজিও তেওঁ ৩০ত ভৰি দিয়া নাই। এই কম সময়তে মোদী চৰকাৰৰ নিদ্ৰাহৰণ কৰা নেহা হৈছে উত্তৰাখণ্ডৰ কন্যা। তেওঁৰ পিতৃ সেনাবাহিনীত কৰ্মৰত। পিতৃৰ বদলি সূত্রে তেওঁ কিছু বছৰ পশ্চিমবংগৰ শিলিগুৰিৰ বাসিন্দা আছিল।
শিলিগুৰিতে তেওঁ উচ্চ মাধ্যমিক আৰু একাদশ শ্রেণীৰ শিক্ষাগ্রহণ কৰে। এতিয়াও তেওঁৰ বাংলা ভূমিৰ স’তে যোগসূত্র আছে। দৰাচলতে বাংলাৰ ভূমিতে তেওঁৰ হৃদয়ত বাঁও আন্দোলনৰ বীজ অংকুৰিত হৈছিল। মেধাবী ছাত্রী নেহাই সম্প্রতি বাঁওপন্থী ছাত্র সংগঠন ‘আইছা’ৰ নেতৃত্ব বহন কৰি আছে।
তেওঁ দিল্লীৰ জৱাহৰলাল নেহৰু বিশ্ববিদ্যালয় (জেএনইউ)ৰ স্কুল অব আর্টছ এণ্ড এস্থেটিক্সত পিএইছডি কৰি আছে। নেহা দিল্লী বিশ্ববিদ্যালয়ৰ পৰা স্নাতক আৰু আম্বেদকাৰ বিশ্ববিদ্যালয়ৰ পৰা স্নাতকোত্তৰ ডিগ্রীধাৰী। উল্লেখ্য যে ককৰোচ জনতা পার্টিয়ে নীট-ইউজিৰ প্ৰশ্নকাকত ফাদিল কেলেংকাৰিৰ আঁত ধৰি প্রাক্তন শিক্ষামন্ত্রী ধর্মেন্দ্র প্রধানৰ পদত্যাগৰ দাবীত যোৱা
জুলাইত যন্তৰ মন্তৰত প্ৰতিবাদ গঢ়ি তোলাৰ সময়ত নেহাই ২৩ দিন ধৰি অনশন পালন কৰিছিল।
তেতিয়াৰে পৰা তেওঁৰ জনপ্রিয়তা দ্রুতগতিত বৃদ্ধি পায়। উল্লেখ্য যে শনিবাৰে যম্ভৰ মন্তৰৰ প্ৰতিবাদৰ প্ৰাক্ষণত বিমানৰ পৰাই চিজেপি নেতৃত্বক দিল্লী আৰক্ষীয়ে গ্ৰেপ্তাৰ কৰাৰ পাছত দুপৰীয়া বাঁওপন্থী ছাত্র সংগঠন আইছাৰ নেত্রী নেহা বৰা আৰু জ্যেষ্ঠ সাংবাদিক যোগেন্দ্ৰ যাদৱৰ নেতৃত্বত এক বৃহৎ সমদল ওলায়। পাছত আৰক্ষীয়ে পথৰ পৰা নেহাসহ একাংশ প্রতিবাদকাৰীক আটক কৰি গাড়ীত তুলি লৈ যায়।
এনে দমন নীতিয়েও তেওঁক ভীত-সন্ত্রস্ত কৰিব পৰা নাই। বৰঞ্চ অধিক দৃঢ়তাৰে তেওঁ ৰাজপথ কঁপাই আছে। আজিও তেওঁ জ্ঞানেশ কুমাৰৰ পদত্যাগ আৰু ভোটাৰ তালিকাৰ এছআইআৰ বাতিলৰ দাবীত দিল্লীত ৰাজপথলৈ ওলাই আহে।
উল্লেখ্য যে নাটকৰ আঁত ধৰি ৰাজনীতিৰ মঞ্চলৈ আহে নেহা। এই সম্পর্কত তেওঁ কয়, ‘নাটকেই মোক ৰাজনীতি নতুনকৈ চিনি পাবলৈ শিকালে।ৰাজনীতি কেৱল নির্বাচন নহয়, ৰাজনৈতিক দল অথবা ক্ষমতাৰ যুদ্ধতে ৰাজনীতি সীমাবদ্ধ নহয়। বৰঞ্চ মানুহৰ দৈনন্দিন জীৱনত ৰাজনীতি গভীৰভাৱে জড়িত আছে। নাটকৰ স’তে জড়িত হোৱাৰ সময়তে এই কথা মোৰ উপলব্ধি হৈছিল।’
নেহাৰ প্ৰিয় হৈছে বিশ্ববিখ্যাত কবি পাবলো নেৰুদাৰ কবিতা। বাংলাৰ ভূমিতে তেওঁ সোঁপন্থী ৰাজনীতিৰ স’তে দূৰত্ব সৃষ্টিৰ শিক্ষা আহৰণ কৰে। ক্ৰমে তেওঁ ক্ষমতাশালী তথা চৰকাৰ-প্ৰশাসনক প্রশ্ন কৰিবলৈ আৰম্ভকৰে। জবাবদিহিতা, গণতান্ত্রিক অধিকাৰ আৰু সেই অধিৰকাৰক তৰুণ প্ৰজন্মৰ স্বাৰ্থত ব্যৱহাৰক লৈ তেওঁ সক্রিয় হৈ উঠে।
এনেদৰে ক্ৰমে তেওঁ জনপ্রিয়তা অর্জন কৰিবলৈ ধৰে। অৱশ্যে বিগত নির্বাচনত পশ্চিমবংগৰ ক্ষমতা বিজেপিলৈ যোৱাত তেওঁ বহু পৰিমাণে হতাশো। উল্লেখ্য যে ২০২০ৰ নাগৰিকত্ব সংশোধনী আইন বিৰোধী আন্দোলনত জড়িত একাংশক বেআইনী কার্যকলাপ (প্ৰতিৰোধ) আইনৰ অধীনত গ্ৰেপ্তাৰ কৰি ৰখাৰো বিৰোধিতা কৰি আহিছে নেহাই।
সম্প্রতি কাৰাৰুদ্ধ হৈ থকা ওমৰ খালিদসহ একাংশৰ মুক্তিৰ দাবীতো তেওঁ সৰৱ হৈ আহিছে। লক্ষ্যণীয় যে নেহাৰ জনপ্রিয়তা অথবা উত্থান কেৱল সামাজিক মাধ্যমত সীমাবদ্ধ হৈ থকা নাই।
