DelhiProtest : দৈনিক অগ্ৰদূত ডিজিটেল ডেস্ক: কেতিয়াবা যদি যন্তৰ-মন্তৰত উপস্থিত হয়। কেতিয়াবা আকৌ থানাৰ সন্মুখত ধৰ্ণা দিয়ে। আকৌ কেতিয়াবা নিৰ্বাচন আয়োগ অভিযানৰ নামত আকাশবাণী ভৱনৰ সন্মুখত গৈ পোনে পোনে বহি পৰে।
জ্ঞানেশ কুমাৰৰ পদত্যাগৰ দাবীত বিৰোধী শিবিৰে চলোৱা প্ৰতিবাদত (Delhi Protest) প্ৰতিদিনে নতুনত্ব অনাৰ চেষ্টা কৰিছে ৰাহুল গান্ধীয়ে। মাজে মাজে এই প্ৰতিবাদত থাকিছে ছাৰপ্ৰাইজ। ফলত অপ্ৰস্তুত অৱস্থাত পৰিবলগীয়া হৈছে দিল্লী আৰক্ষী।
সেয়েহে দিল্লীৰ নিৰাপত্তাৰ ক্ষেত্ৰত আৰু কোনো ধৰণৰ শিথিলতা ৰাখিব বিচৰা নাই কেন্দ্ৰীয় গৃহ মন্ত্ৰালয়ে। বিৰোধীয়ে যিকোনো সময়তে হঠাতে প্ৰতিবাদ আৰম্ভ কৰিলে যাতে নিৰাপত্তাৰক্ষীসকলে পৰিস্থিতি নিয়ন্ত্ৰণত অসুবিধাৰ সন্মুখীন নহয়, তাৰ প্ৰতি লক্ষ্য ৰখা হৈছে।
উচ্চতম ন্যায়ালয় অভিযানৰ তথাকথিত ‘সফলতা’ৰ পাছত এইবাৰ ইণ্ডি মিত্ৰজোঁটে জ্ঞানেশ কুমাৰৰ বিৰুদ্ধে কেনে ধৰণে প্ৰতিবাদ আগবঢ়াব? ৰাহুল গান্ধীয়ে কৈছে, সম্প্ৰতি তেওঁ এই বিষয়ত ৰহস্য বজাই ৰাখিব বিচাৰে।
অনাগত দিনত প্ৰতিবাদে কোন দিশে গতি কৰিব, কংগ্ৰেছ বা ইণ্ডি মিত্ৰজোঁটে পৰৱৰ্তী সময়ত কি পদক্ষেপ গ্ৰহণ কৰিব, সেয়া কোনেও নাজানে। এনে পৰিস্থিতিত দিল্লীৰ নিৰাপত্তা ব্যৱস্থা কটকটীয়া কৰি ৰখাৰ সিদ্ধান্ত লৈছে কেন্দ্ৰীয় গৃহ মন্ত্ৰালয়ে।
ৰাজধানীৰ নিৰাপত্তা শিথিল কৰা নাই দিল্লী আৰক্ষীয়ে। আৰক্ষীৰ তৰফৰ পৰা উৎসৱৰ দিনকেইটাত অতিৰিক্ত ২৭ হেজাৰ অৰ্ধসামৰিক বাহিনীৰ জোৱান নিয়োগ কৰি ৰখাৰ বাবে আবেদন জনোৱা হৈছিল। তথ্য অনুসৰি,কেন্দ্ৰীয় গৃহ মন্ত্ৰালয়ে এই আবেদনত অনুমোদন জনাই।
যোৱা ১০ অক্টোবৰত ককৰোচ জনতা পাৰ্টীৰ প্ৰতিবাদৰ দিনা দিল্লীক কাৰ্যতঃ দুৰ্গত পৰিণত কৰা হৈছিল। সেইদিনা মুঠতে ৫০ হাজাৰৰো অধিক নিৰাপত্তাৰক্ষী নিয়োগ কৰা হৈছিল। ইয়াৰ ভিতৰত ২৭ হেজাৰ আছিল বিভিন্ন অৰ্ধসামৰিক বাহিনীৰ জোৱান। বাকীসকল আছিল দিল্লী আৰক্ষীৰ কৰ্মী।
এই ৫০ হেজাৰ নিৰাপত্তাৰক্ষী অহা ২০ অক্টোবৰলৈকে নিয়োগ হৈ থাকিব। অৰ্থাৎ উৎসৱৰ দিনকেইটাত কোনো ধৰণৰ প্ৰতিবাদ হ’লেও যাতে জনজীৱন ব্যাহত নহয়, তাৰ প্ৰতি লক্ষ্য ৰাখিছে কেন্দ্ৰীয় গৃহ মন্ত্ৰালয়ে।
অৱশ্যে, সূত্ৰৰ দাবী অনুসৰি, নৱৰাত্ৰি চলি থকা সময়ছোৱাত দিল্লীত আৰু বৃহৎ সমাৱেশ নকৰিব পাৰে ইণ্ডি মিত্ৰজোঁটে। অৱশ্যে, সংবাদমেলত ৰাহুল গান্ধীয়ে স্পষ্ট কৰি দিছে যে এই যুঁজ অব্যাহত থাকিব। অনাগত দিনত প্ৰতিবাদৰ ধৰণতো নতুনত্ব আহিব বুলি তেওঁ ইংগিত দিছে। সম্প্ৰতি সেই সম্ভাৱনাৰ প্ৰতি লক্ষ্য ৰাখিয়েই আৰক্ষীয়ে কটকটীয়া নিৰাপত্তা ব্যৱস্থা বজাই ৰাখিছে।
