তলাবন্ধৰ কাৰণে বহিঃৰাজ্যত আৱদ্ধ হৈ থকা লোকসকলক পৰ্যায়ক্ৰমে অসমলৈ ওভতাই অনা হ’ব ৷অৱশ্যে এই ক্ষেত্ৰত অগ্ৰাধিকাৰ লাভ কৰিব উত্তৰ পূৰ্বাঞ্চলৰ বিভিন্ন ৰাজ্যত থকা লোকসকলে। এই মন্তব্য মন্ত্ৰী ড° হিমন্ত বিশ্ব শৰ্মাৰ ৷এক সংবাদমেলত অংশ গ্ৰহণ কৰি মন্ত্ৰী ড° শৰ্মাই কয় যে দেশৰ বিভিন্ন ৰাজ্যত আৱদ্ধ হৈ আছে অসমৰ লোক ৷ এই সকল লোকক ওভতাই অনাই স্বাস্থ্য বিভাগ আৰু আৰক্ষী প্ৰশাসনৰ কাৰণে বিৰাট প্ৰত্যাহ্বান । ইয়াৰ কাৰণে অসমৰ বিভিন্ন স্থানত থকা কোৱাৰেন্টাইন কেন্দ্ৰ আৰু বাছৰ সুসামঞ্জস্য ৰাখিহে এইলোকসকলক অসমলৈ অনা হ’ব। কলকাতা,দিল্লী,বিহাৰ,ঝাৰখণ্ড আদিত আৱদ্ধ হৈ থকা সকলৰ কাৰণে পৰিবহণ নিগমৰ বাছসমূহ পৰ্যায়ক্ৰমে পঠোৱা হ’ব ৷কিন্তু দাক্ষিণাত্যত আৱদ্ধ হৈ থকা লোকসকলক বাছৰে ওভতাই অনাটো সহজ কথা নহয় । ইয়াৰ বাবে ৰেলৰ প্ৰয়োজন হ’ব ৷
লগতে প্ৰয়োজনত সংশ্লিষ্ট ৰাজ্যসমূহৰ পৰা বাছো ভাড়াত লোৱা হ’ব । সকলোকে একেলগে ওভতাই অনাটো সহজ নহয় । আনহাতে কৰ্কট ৰোগীসকলৰ প্ৰসংগ উল্লেখ কৰি মন্ত্ৰী শৰ্মাই কয় যে কৰ্কট ৰোগীসকলক অসমলৈ অনাৰ ক্ষেত্ৰত বিমান সেৱাৰ কাৰণে কেন্দ্ৰীয় চৰকাৰৰ স’তে যোগাযোগ অব্যাহত ৰাখিছে চৰকাৰে ৷কেন্দ্ৰৰ পৰা সেউজ সংকেত লাভ কৰিলেই সংশ্লিষ্ট লোকসকলক অনা হ’ব ৷ ইপিনে বহিঃৰাজ্যৰ লোকসকলক অসমলৈ অনাৰ ক্ষেত্ৰত মুখ্যমন্ত্ৰী সৰ্বানন্দ সোনোৱালে ব্ৰহ্মপুত্ৰ ৰাজ্যিক অতিথিশালত এক বৈঠক অনুষ্ঠিত কৰে ৷ মুখ্যমন্ত্ৰীৰ এক সূত্ৰই জনোৱা মতে কেন্দ্ৰীয় গৃহমন্ত্ৰ্যালয়ৰ নিৰ্দেশনা মৰ্মে ইতিমধ্যে বহিঃৰাজ্যত আৱদ্ধ হৈ থকা লোকসকলক পৰ্যায়ক্ৰমে অসমলৈ ওভতাই অনাৰ স্বাৰ্থত ৰাজ্য চৰকাৰে অসম আৰক্ষীৰ অতিৰিক্ত আৰক্ষী সঞ্চালক প্ৰধান জি পি সিঙক ন’ভেল বিষয়া আৰু অতিৰিক্ত আৰক্ষী সঞ্চালক প্ৰধান হৰমিত সিঙক বিকল্প ন’ভেল বিষয়া হিচাপে দায়িত্ব অৰ্পণ কৰা হৈছে। বহিঃৰাজ্যত আৱদ্ধ হৈ থকা প্ৰসংগত এই বৈঠকত আলোচনা কৰা হৈছে ৷ এই বৈঠকত মন্ত্ৰী ড° হিমন্ত বিশ্ব শৰ্মা,ভাস্কৰজ্যোতি মহন্ত,পৰিবহন মন্ত্ৰী চন্দ্ৰমোহন পাটোৱাৰী আদিৰ লগতে বহুকেইজন নেতা,মন্ত্ৰী উপস্থিত আছিল ৷ লগতে এই বৈঠকত কেন্দ্ৰীয় চৰকাৰৰ তলাবন্ধৰ ম্যাদ বৃদ্ধি কৰাৰ প্ৰসংগকো আদৰণি জনোৱা হয় ৷