কৰ’নাৰ ভয়াৱহতাৰ মাজতো প্ৰাপ্য অধিকাৰৰ দাবীত পুনৰ আন্দোলনমুখৰ হোৱাৰ প্ৰস্তুতি চলাইছে ৰাজ্যৰ ছয় জনগোষ্ঠীয়ে ৷ আহোম, মৰাণ, মটক, চুতীয়া, কোচ ৰাজবংশী আৰু আদিবাসী চাহ জনগোষ্ঠীৰ জনজাতিকৰণকে ধৰি দীৰ্ঘদিনীয়া অন্যান্য সমস্যাসমূহ সমাধান নকৰাৰ প্ৰতিবাদতে কেউটা জনগোষ্ঠীৰ সংগঠনসমূহে এই সিদ্ধান্ত গ্ৰহণ কৰিছে ।
দৈনিক অগ্ৰদূতৰ আগত এই কথা সদৰী কৰি সদৌ কোচ ৰাজবংশী ছাত্ৰ সন্থাৰ মুখ্য উপদেষ্টা হিতেশ্বৰ বৰ্মনে কয় যে কোচ ৰাজবংশীকে ধৰি ৰাজ্যৰ ছয় জনজাতিৰ জনজাতিকৰণকে ধৰি অন্যান্য সমস্যাসমূহ সমাধানৰ ক্ষেত্ৰত চূড়ান্তভাৱে প্ৰতাৰণা কৰিছে বিজেপি নেতৃত্বাধীন কেন্দ্ৰীয় তথা ৰাজ্য চৰকাৰে ৷ সেয়ে সমাগত স্বাধীনতা দিৱসত দেশৰ প্ৰধানমন্ত্ৰীয়ে ৰাষ্ট্ৰক সম্বোধি প্ৰদান কৰিবলগীয়া ভাষণৰ জৰিয়তে ৰাজ্যৰ ছয় জনগোষ্ঠীৰ জনজাতিকৰণৰ বিষয়টো বিতং বিৱৰণ দিব পৰাকৈ আৰু সংসদৰ সমাগত গ্ৰীষ্মকালীন অধিবেশনত এই সম্পৰ্কীয় বিধেয়ক পাৰিত কৰাৰ স্বাৰ্থত ইতিপূৰ্বে গঠন কৰা ড° হিমন্ত বিশ্ব শৰ্মা নেতৃত্বাধীন উচ্চ ক্ষমতাসম্পন্ন সমিতিক প্ৰয়োজনীয় প্ৰতিবেদন শীঘ্ৰে দাখিল কৰিবলৈ দাবী জনোৱা হৈছে।
ইয়াৰ পাছতো যদি স্বাধীনতা দিৱসত দেশৰ প্ৰধানমন্ত্ৰীয়ে ৰাষ্ট্ৰক সম্বোধি দিয়া ভাষণত ছয় জনগোষ্ঠীৰ জনজাতিকৰণৰ সন্দৰ্ভত কোনো ব্যাখ্যা আগ নবঢ়ায় তেনেহলে অতিমাৰী কৰ’নাৰ ভয়াৱহতাকো নেওচি প্ৰাপ্য অধিকাৰৰ দাবীত ব্যাপক গণ আন্দোলন গঢ়ি তোলা হ’ব । স্বজাতি সুৰক্ষিত ভৱিষ্যতৰ স্বাৰ্থত সৰ্বস্ব ত্যাগ কৰিবলৈ প্ৰতিজন জনগোষ্ঠীয় নেতা কৰ্মী সাজু বুলি উল্লেখ কৰি বৰ্মনে কয় যে কোচ ৰাজবংশীকে ধৰি ৰাজ্যৰ ছয় জনগোষ্ঠীৰ জনজাতিৰকৰণ প্ৰক্ৰিয়া অধিক সৰলীকৰণ প্ৰলোভনেৰে ২০১৬ ৰ ২৯ ফ্ৰেব্ৰুৱাৰীত তদানীন্তন গৃহমন্ত্ৰী ৰাজনাথ সিঙৰ অধ্যক্ষতাত অনুষ্ঠিত বৈঠকৰ জৰিয়তে উত্তৰ পূৰ্বাঞ্চলৰ দায়িত্বত থকা কেন্দ্ৰীয় গৃহ মন্ত্ৰণালয়ৰ সচিব এম কে সিংলাৰ অধ্যক্ষতাত এখন উচ্চ ক্ষমতাসম্পন্ন সমিতি গঠন কৰে ৷
লগতে ছয় জনগোষ্ঠীক জনজাতিকৰণ সম্পৰ্কত আৰ্হি প্ৰস্তুত কৰি ২০১৬ ৰ ৩১মে’ৰ ভিতৰত প্ৰতিবেদন দাখিলৰ বাবেও তদানীন্তন গৃহমন্ত্ৰী সিঙে নিৰ্দেশ দিয়ে । কিন্তু প্ৰতিবেদন দাখিল কৰাটো দূৰৈৰ কথা এই সম্পৰ্কত প্ৰতিবেদন দাখিল নকৰাকৈয়ে চাকৰিৰ পৰা অৱসৰ লয় সিংলাই । পৰৱৰ্তী পৰ্যায়ত উক্ত সমিতিৰ অধ্যক্ষ হিচাপে কাৰ্যনিৰ্বাহ কৰে গৃহ মন্ত্ৰণালয়ৰ সচিব ৰীতা মিত্ৰই ।ইপিনে ৰাজ্যসভাত চৰ্চা হোৱাৰ পূৰ্বে সামৰণি পৰে ৰাজ্যসভাৰ অধিবেশন। ইয়াৰ পাছতে বিত্ত মন্ত্ৰী ড° হিমন্ত বিশ্ব শৰ্মাৰ অধ্যক্ষাত এই সম্পৰ্কত প্ৰয়োজনীয় পদক্ষেপ গ্ৰহণৰ নামত কেন্দ্ৰীয় চৰকাৰে বিগত বৰ্ষৰ ২০ ডিচেম্বৰত গঠন কৰে আন এক উচ্চ ক্ষমতা সম্পন্ন সমিতি ৷
কিন্তু এইখন সমিতিয়েও আজি পৰ্যন্ত প্ৰতিবেদন দাখিল কৰা নাই । জনজাতিকৰণৰ ক্ষেত্ৰত কোনো ধৰণৰ আপোচ কৰা নহ’ব বুলিও বৰ্মনে স্পষ্ট কৰি দিয়ে ৷ অনুৰূপ মন্তব্য সদৌ অসম মৰাণ ছাত্ৰ সন্থাৰ সভাপতি অৰুণজ্যোতি মৰাণৰো ৷ তেওঁ কয় যে প্ৰাপ্য অধিকাৰৰ দাবীত আন্দোলন গঢ়ি তোলাৰ বাহিৰে অন্য বিকল্প নাই ৷