বি এচ চি নাৰ্চিং পঢ়িবলৈ বাংগালোৰলৈ যোৱা অসমৰ এগৰাকী মেধাবী ছাত্ৰীৰ হত্যাৰ ঘটনাই সমগ্ৰ অসমতে চাঞ্চল্যৰ সৃষ্টি কৰিছে ৷ বৰপেটা জিলাৰ হাউলীৰ নগৰঝাৰ নিবাসী জেচমিনাৰা আখতাৰ নামৰ ছাত্ৰী গৰাকীয়ে বাংগালোৰৰ এখন শিক্ষানুষ্ঠানত বি এচ চি নাৰ্চিংৰ বাবে নামভৰ্তি কৰিছিল ৷ নামভৰ্তি কৰাৰ পিছত পৰিয়ালৰ লোকে চাৰিদিন পূৰ্বে জেচমিনাৰা আখতাৰক শিক্ষানুষ্ঠানখনত থৈ আহে যদিও কালি দিনৰ ভাগত ৰহস্যজনক ভাবে ছাত্ৰী গৰাকীৰ মৃতদেহ উদ্ধাৰ হয় ৷
যুৱতী জেছমিনা আখতাৰক অসমৰে গোৱালপাৰাৰ লক্ষীপুৰৰ পাষণ্ড আনিছুৰ ৰহমান আৰু দুজন তেওঁৰ সতীৰ্থই ধৰ্ষণ কৰি হত্যা কৰিছিল বুলি অভিযোগ উত্থাপিত হৈছে।অসম এৰা তিনিটা দিন সম্পূৰ্ণ নহওতেই ছাত্ৰী গৰাকীৰ বাংগালোৰত হোৱা ৰহস্যজনক মৃত্যুত চাঞ্চল্যৰ সৃষ্টি কৰিছে ৷ পৰিয়ালৰ পৰা জানিব পৰা মতে জেচমিনাৰা আখতাৰ নামৰ শিক্ষাৰ্থী গৰাকীয়ে কিছুদিন পুৰ্বে বাংগালোৰৰ “ইষ্ট ৱেষ্ট কলেজ”ত বি এচ চি নাৰ্চিঙৰ বাবে নামভৰ্তি কৰিছিল ৷
নামভৰ্তি কৰাৰ পিছত পৰিয়ালৰ লোকে সোমবাৰে জেচমিনাৰা আখতাৰক বাংগালোৰৰ কলেজখনত থৈ আহে ৷ কিন্তু বুধবাৰে পুৱাৰ ভাগত ৰহস্যজনক ভাবে জেচমিনআৰাৰ মৃতদেহ উদ্ধাৰ হয় ৷ হাউলি নগৰঝাৰৰ নিবাসী নাজিমুদ্দিন আহমেদ আৰু মৰ্জিনা খাতুনৰ দ্বিতীয়া কন্যা আছিল জেচমিনাৰা আখতাৰ ৷ জেচমিনাৰা হত্যাৰ মূল অভিযুক্ত গোৱালপাৰা লক্ষীপুৰৰ আনিচুৰ ৰহমানৰ লগতে দুজন অভিযুক্তক ইতিমধ্যে কৰ্ণাটক আৰক্ষীয়ে কৰায়ত্ব কৰা বুলি জানিব পৰা গৈছে ।
পৰিয়ালৰ অভিযোগ মৰ্মে উক্ত আনিচুৰ ৰহমানে পূৰ্বৰে পৰা বাংগালোৰৰ উক্ত কলেজখনত শিক্ষা গ্ৰহণ কৰাৰ লগতে এজেণ্ট হিচাপে অসমৰ পৰা বিভিন্ন শিক্ষাৰ্থী সকলক নাম ভৰ্তি কৰায় কমিচন লাভ কৰি আহিছে । জেচমিনাৰা আখতাৰৰ পিতৃ নাজিমুদ্দিনে জনোৱা মতে জীয়ৰীৰ হাতত নামভৰ্তিৰ বাবে দিছিল ডেৰ লাখ টকাৰ এখন চেক ।
উক্ত চেকখনৰ লোভতে উক্ত দুস্কৃতিকাৰীয়ে জেচমিনাৰা আখতাৰক হত্যা কৰা বুলি সন্দেহ কৰা হৈছে । ঘটনাৰ খবৰ পোৱা মাত্ৰেই পৰিয়ালৰ লোক বাংগালোৰত উপস্থিত হয় যদিও কৰ্ণাটক আৰক্ষীৰ তদন্ত অব্যাহত থকা হেতুকে এতিয়ালৈকে জেচমিনাৰা আখতাৰৰ মৃতদেহ স্বগৃহলৈ আনিব পৰা হোৱা নাই ।
ইপিনে সমগ্ৰ ঘটনাটো ফাষ্টটেক আদালতৰ জৰিয়তে বিচাৰ প্ৰক্ৰিয়া আৰম্ভ কৰি দোষীক ফাচি দিবলৈ অসমৰ মুখ্যমন্ত্ৰী সৰ্বানন্দ সনোৱাল আৰু বিত্ত মন্ত্ৰী হিমন্ত বিশ্ব শৰ্মাক আহ্বান জনাইছে জেচমিনাৰা আখতাৰৰ দুৰ্ভগীয়া পিতৃ নাজিমুদ্দিনৰ উপৰিও স্হানীয় লোকে ৷ এই হত্যাকাণ্ডৰ লগত জড়িত সকল যাতে কোনোপধ্যে সাৰি নাযায় আৰু তেওঁলোকক উপযুক্ত শাস্তি প্ৰদান কৰা হয় তাৰবাবে পৰিয়ালৰ লোকসকলৰ লগতে ৰাইজে দাবী তুলিছে ৷