শীতৰ কবলৰ ৰক্ষা পাবলৈ কম্বল ব্যৱহাৰ কৰা হয়। অথচ গৰমক বাধা দিয়াৰ বাবেও ব্যৱহাৰ হ’ব পাৰে কম্বল। এই বিষয়টো হয়তাে সকলােৰে অজ্ঞাত আছিল। এতিয়া চীনৰ এদল বিজ্ঞানীয়ে জনালে যে কম্বলৰ দ্বাৰা কেৱল শীতেই নহয়, গৰমকো বাধা দিব পাৰি। গােলকীয় উষ্ণতাৰ প্রকোপত হিমবাহ গলাৰ পৰা ৰক্ষা কৰাৰ বাবেই চীনৰ এই বিজ্ঞানীৰ দলটোৱে আৰম্ভ কৰিছে অভিনৱ প্রয়াস। এখন বিশেষ কম্বলেৰে ঢাকি দিছে হিমবাহ।
গােলকীয় উষ্ণতাৰ অভিশাপ যাতে বৰফৰ স্তৰ দ্রুতগতিৰে গলি বিপদ সন্নিকট নহয়, তাৰ বাবেই তেওঁলােকৰ এই চমকপ্রদ ব্যৱস্থা। বিজ্ঞানী দলটোৱে জনাইছে যে পৰিৱেশ বান্ধৱ ‘জিঅ’ফেব্রিক অর্থাৎ প্রাকৃতিক সামগ্ৰীৰেই তৈয়াৰ কৰা হৈছে পাঁচশ বর্গ মিটাৰৰ এটা স্তৰ। দক্ষিণ-পশ্চিম চীনৰ ছিচুৱান প্ৰদেশৰ ডাগু অঞ্চলত থকা হিমবাহৰ অংশখিনি উক্ত বিশেষ কম্বলেৰে ঢাকি পেলােৱা হৈছে। কিন্তু কেনেকৈ কাম কৰিব প্রাকৃতিক সামগ্ৰীৰে তৈয়াৰী কম্বলখনে? এই প্রশ্নৰ উত্তৰত বিজ্ঞানীসকলে জনাইছে যে বিষয়টো আন একোৱেই নহয়।
সূৰ্যৰ পৰা পােনপটীয়াকৈ কিৰণ আহি পৰাৰ ফলতে হিমবাহ দ্রুতগতিৰে গলি আছে। এই স্তৰটোৰ কাম হৈছে সৌৰ বিকিৰণ আৰু হিমবাহৰ মাজত বাধা হৈ থিয় দিয়া। সেই কার্যই সুৰ্যৰ ৰশ্মিক কিছু পৰিমাণে প্রতিফলিত কৰিব। যাৰ প্রকোপত হিমবাহত তাপৰ প্ৰভাৱ কমিব আৰু তেতিয়া বৰফ সহজে নগলিব। চীনা বিজ্ঞানীসকলে দাবী কৰিছে, ডাঃ হিমবাহক সেই পাঁচশ বর্গমিটাৰৰ বিশেষ কম্বলখনেৰে ঢাকি দিয়াৰ সুফল তেওঁলােকে লাভ কৰিছে।
তাৰ পাছৰ পৰাই হিমবাহ গলাৰ হাৰ কমিছে বুলি তেওঁলােকে দাবী কৰিছে। উল্লেখ্য যে চীনৰাে পূর্বে হিমবাহক এইদৰে ৰক্ষা কৰাৰ কথা ভাবিছিল ছুইজাৰলেণ্ডৰ বিজ্ঞানীসকলে। প্রায় এটা দশকৰ আগতে আল্পছ পর্বতমালাৰ ছুইজাৰলেণ্ডত অৱস্থিত অংশৰ ৰােন হিমবাহৰ সংলগ্ন অঞ্চলত জনবসতি বাঢ়ি থকাৰ ফলত অতি দ্রুতগতিৰে বৰফ গলিবলৈ আৰম্ভ কৰে। সেই গলন প্রক্রিয়াৰ পৰা ৰক্ষাৰ বাবে পদক্ষেপ গ্রহণৰ কথা ভাবিছিল ছুইছ বিজ্ঞানীসকলে।
অৱশেষত চীনা পৰিৱেশ বিজ্ঞানীৰ স’তে যৌথ আলােচনাত বহাৰ পাছত সমাধানৰ সূত্র লােয়। সেই সমাধানৰ সূত্রকে সম্প্রতি বাস্তৱায়িত হৈছে চীনৰ ডাগু হিমবাহত। উল্লেখ্য যে ডাগু হিমবাহত জলীয় অংশও অনেক আছে। ফলত বৰফ গলাৰ প্রৱণতাও বেছি। সেয়ে হিমবাহক ৰক্ষা কৰিবলৈকে বিশেষ পদক্ষেপ হাতত লৈছে চীনা পৰিৱেশবিদ ৱাং ফেইটেঙৰ দলে। ফেইটেঙে জনাইছে যে সৰু হিমবাহসমূহ ৰক্ষাৰ ক্ষেত্ৰত ‘জিঅ’ফেব্রিক’ৰে তৈয়াৰী কম্বল অত্যন্ত কার্যকৰী হ’ব। ইয়াৰ দ্বাৰা গােলকীয় উষ্ণতাৰ মাজতাে অটুট থাকিব প্রকৃতিৰ ভাৰসাম্য।
