ভাৰতত দ্ৰুত হাৰত ক’ভিড সংক্ৰমণ বৃদ্ধি হোৱাৰ সময়তে মহাৰাষ্ট্ৰ, পঞ্জাৱৰ দৰে কিছু সংখ্যক ৰাজ্যই তেওঁলোকৰ কৰ’না প্ৰতিষেধকৰ নাটনি হোৱাৰ অভিযোগ উত্থাপন কৰে । তেওঁলোকে কেন্দ্ৰক প্ৰতিষেধকৰ যোগান ধৰিবলৈ আবেদন কৰে । প্ৰতিষেধকৰ নাটনি হোৱাৰ বাবে বিজেপিক দোষাৰোপ কৰি কংগ্ৰেছৰ নেত্ৰী ছনিয়া গান্ধীয়ে কয় যে, মোদী চৰকাৰৰ পৰিকল্পনা নোহোৱাৰ বাবে আৰু ব্যৰ্থতাৰ বাবেই দেশত ক’ভিড প্ৰতিষেধকৰ নাটনি হৈছে ।
আজি কংগ্ৰেছ শাসিত ৰাজ্যসমূহৰ মুখ্যমন্ত্ৰীসকলৰ স’তে ভিডিঅ’ কনফাৰেন্সযুগে বৈঠকত মিলিত হয় কংগ্ৰেছৰ নেত্ৰীগৰাকীয়ে । উক্ত বৈঠকত ৰাহুল গান্ধীও উপস্থিত আছিল । বৈঠকত ছনিয়াই সংক্ৰমণৰ বিৰুদ্ধে যুঁজিবলৈ নমুনা পৰীক্ষণ, সংক্ৰমণৰ উৎস উদঘাটন আৰু টিকাকৰণত জোৰ দিবলৈ পৰামৰ্শ দিয়ে ।
ছনিয়াই কয়, ‘সকলো ক্ষেত্ৰতে স্পষ্টটা থকা উচিত । চৰকাৰে দেশজুৰি হোৱা আক্ৰান্ত আৰু মৃতকৰ সঠিক সংখ্যা জনোৱা উচিত । আমি টিকাৰকণত অধিক গুৰুত্ব আৰোপ কৰিব লাগে । আমাৰ দেশত পৰ্যাপ্ত পৰিমাণৰ প্ৰতিষেধক থাকিলেহে অন্য দেশক প্ৰতিষেধক প্ৰদান কৰা উচিত । চৰকাৰে ইয়াতকৈও বেছি দায়িত্বশীল হ’ব লাগে ।’
প্ৰতিষেধকৰ নাটনি সন্দৰ্ভত কংগ্ৰেছ নেত্ৰীগৰাকীয়ে কয়, ‘মোদী চৰকাৰৰ সঠিক পৰিকল্পনা নোহোৱাৰ বাবেই এই ঘটনা ঘটিছে । বিদেশত প্ৰতিষেধক সৰবৰাহ কৰাৰ বাবেই প্ৰতিষেধকৰ নাটনি হৈছে ।’