বেঁকীৰ খহনীয়াৰ পৰা ১১৫ বছৰীয়া শংকৰ-মাধৱ সত্ৰ বচোৱাৰ বাবে তৎকালীনতাৰে আৰম্ভ কৰা হ’ব কামঃ মন্ত্রী দাস
বাগসাৰ শালবাৰী মহকুমাৰ অন্তৰ্গত গোৱৰ্ধনা, খাগ্ৰাবাৰী, চূণবাৰী, এলেঙামাৰী, নেপালীবস্তি আদি কৰি বিভিন্ন গাঁৱত প্ৰতি বছৰে বেঁকী নৈয়ে খহনীয়াৰ সৃষ্টি কৰি শ শ পৰিয়ালক গৃহহাৰা কৰি অহাৰ লগতে হাজাৰ হাজাৰ বিঘা খেতি মাটি, মন্দিৰ, মছজিদ বেঁকীৰ খহনীয়াৰ কবলত পৰিছে ৷ ইতিমধ্যে খাগ্ৰাবাৰী-গোৱৰ্দ্ধনাত বেঁকী নৈৰ খহনীয়াই কাল ৰূপ ধাৰণ কৰি ১১৫ বছৰীয়া ঐতিহাসিক শংকৰ মাধৱ সত্ৰখনলৈ তীব্ৰ ভাবুকি কঢ়িয়াই আনিছে ৷
এই বিষয়ে সংবাদ মাধ্যমত ধাৰাবাহিক বাতৰি প্ৰকাশ হোৱাৰ পিছতেই বেঁকী নৈৰ খহনীয়া পৰিদৰ্শনৰ উদ্দেশ্যে কালি অঞ্চলটোত উপস্থিত হয় ৰাজ্যৰ পঞ্চায়ত আৰু গ্ৰামোন্নয়ন মন্ত্ৰী ৰঞ্জিত কুমাৰ দাস । মন্ত্রীগৰাকীয়ে পোনে পোনে সত্ৰখন পৰিদৰ্শন কৰি সত্ৰৰ ভিতৰভাগত বহি ৰাইজৰ লগত আলোচনাত মিলিত হৈ সেই গাঁওখনৰ স’তে তেওঁৰ এক আত্মীক সম্পৰ্ক থকা বুলি উল্লেখ কৰি কয়, “এতিয়া সত্ৰখন বচোৱাৰ কাৰণে সকলোৰেই এক গুৰুত্বপূৰ্ণ কথা হৈ পৰিছে৷আমি যিহেতু সত্ৰ নামঘৰক সৰ্বাধিক গুৰুত্ব আৰোপ কৰিছো ৷ গতিকে তৎকালীন ভাবে সত্ৰখনক ৰক্ষা কৰাৰ বাবে পাৰ্কুপাইন, পাৰ্কলেণ্ড দি মাটি কাটি শ্ল’পিং দি তাতে জিওচিট দি বিশেষ কাৰিকৰী পদ্ধতিৰে খহনীয়া ৰোধ কৰাৰ ব্যৱস্থা কৰা হ’ব ৷”
কাম কৰাৰ বাবে ৰাইজৰ পৰা মুক্তহস্তে দান বৰঙনি বিচাৰি সত্ৰাঞ্চলৰ খহনীয়া ৰোধ কৰাৰ উপৰি আন ঠাইৰো খহনীয়া ৰোধ কৰা হ’ব বুলি মন্তব্য কৰি মন্ত্ৰী গৰাকীয়ে কয় যে, জিলা উপায়ুক্ত, বিভাগীয় কৰ্তৃপক্ষ আৰু ৰাইজৰ সহযোগত তৎকালীন ভাবে বেঁকী নৈৰ খহনীয়া ৰোধ কৰাৰ ব্যৱস্থা কৰা হ’ব আৰু পৰবৰ্তী সময়ত স্থায়ীভাবে খহনীয়া ৰোধৰ ব্যৱস্থা হাতত লোৱা হ’ব ৷
খহনীয়া পৰিদৰ্শন কালত মন্ত্ৰী ৰঞ্জিত কুমাৰ দাসক সংগ দিয়ে বিটিআৰৰ কাৰ্যবাহী সদস্য তথা স্থানীয় মথনগুৰি সমষ্টিৰ এমচিএলএ গৌতম দাসে ৷
এইফালে স্থানীয় এগৰাকী মহিলাই ৰাজহুৱাকৈ ক্ষোভ উজাৰিলে মন্ত্রী ৰঞ্জিত দাসৰ আগমনৰ সময়তে । মহিলাগৰাকীয়ে মন্ত্রী দাসে ৰাইজৰ খবৰ লোৱা নাই বুলি অভিযোগ কৰি কয়, নিৰ্বাচনৰ সময়তহে ৰাইজক আশ্বাস দিবলৈ আহে কিন্তু নিৰ্বাচন যোৱাৰ পাছত ৰাইজৰ খবৰ ল’বলৈ নাহে । আজি নৈৰ বুকুত সকলো যাও যাওঁ অৱস্থা ৷ আমাক এই বিপদৰ সময়ৰ পৰা বচাওক নহ’লে ঘৰ মাটি নৈত জাহ যোৱাৰ পাছত আমি নৈৰ বুকুত জাপ দি মৰাৰ বাদে আন উপায় নাই ৷
