কৰ্মস্পৃহা থাকিলে মানুহে কৰিব নোৱাৰা কাম একো নাই। তাকেই যেন পুণৰ বাৰ প্ৰমান কৰি সংস্হাপনৰ এক অনন্য নিদৰ্শন দাঙি ধৰিছে মৰিগাঁও জিলাৰ দন্দুৱাৰ এগৰাকী উদ্যমি মহিলাই। মহিলা গৰাকীৰ নাম জুনুমা মালি ডেকা।
স্নাতক জুনুমা মালিয়ে কেৱল ফাৰ্মিঙৰ জৰিয়তে বৰ্তমান সময়ত সমগ্ৰ মৰিগাঁও জিলা খনৰ ভিতৰতে এগৰাকী অন্যতম স্বাৱলম্বী মহিলা হিচাবে চিহ্নিত হৈছে। জুনুমাৰ মাতৃৰ গৃহ গুৱাহাটী বিজয় নগৰ ৰঙামাটিত।
২০১০ চনত স্নাতক ডিগ্ৰী লাভৰ পাছত জুনুমা বিবাহ সূত্ৰে মৰিগাঁও জিলাৰ দন্দুৱাৰ এটি পৰিয়াললৈ বোৱাৰী হৈ আহে। স্বামীৰ আছিল এখন কাঠৰ দোকান । লগতে পৰিয়াল টোৰ ঘৰৰ চৌহদত আছিল এটা এয়াৰচেল টাৱাৰ। কাঠৰ দোকান খনৰ লগতে টাৱাৰ টোৰ পৰা পোৱা ভাড়াৰ ধনেৰে পৰিয়াল টো চলিছিল।
কিন্তু কাঠৰ দোকান খনৰ উপযুক্ত কাগছ পাতিৰ অভাৱত বন্ধ কৰিব লগা হয়। একে সময়তে এয়াৰচেল সেৱা বন্ধ হৈ পৰাত টাৱাৰৰ পৰা পোৱা ভাড়া কেইটা অহাৰো পথ বন্ধ হ’ল। পৰিয়াল টোৰ এনে এক দুৰ্যোগ কালত বোৱাৰী জুনমা মালি হতাশ নহৈ সাহস দিলে স্বামীক।
ঘৰত থকা স্হানীয় সচৰ গৰু জনীৰ গাখীৰ বিক্ৰী কৰি পোৱা টকা কেইটাকে সম্বল হিছাবে লৈ জুনমা মালিয়ে গাঁৱৰ পৰা আৰু এজনী চেউৰী গৰু আধিকৈ পুহিবলৈ আনে। ঘৰৰ গাই জনীৰ লগতে আধিকৈ পোহা চেউৰী জনীকো বৰ্ণসংকৰ ঘটাই দুটা বৰ্ণসংকৰ চেউৰী পোৱালী পালে।
এনেদৰেই শূণ্য হাতেৰে জুনমা মালিয়ে এজনীৰ পাছত সিজনী গৰু বঢ়াই গ’ল। ৭ – ৮ জনী গৰুৰ গৰাকী হোৱাৰ পাছত জুনমা মালিয়ে বিজ্ঞান সন্মত গোঁহালি এটা নিৰ্মাণৰ পৰিকল্পনা কৰিলে। কিন্তু এইক্ষেত্ৰত জুনমা মালিৰ টকাৰ অভাৱ হ’ল।
এনে সময়তে জুনমা মালিক সহায় কৰিবলৈ আগবাঢ়ি আহিল মৰিগাঁও কৃষি বিজ্ঞান কেন্দ্ৰৰ জ্যেষ্ঠ বিজ্ঞানী ঋজুস্মৃতা শৰ্মা ডেকা। তেখেতৰ পৰামৰ্শ মতে মালিয়ে এটি গোঁ – পালণৰ পশিক্ষণ লৈ স্হানীয় ইউ বি আই শাখাৰ স’তে যোগাযোগ কৰাত বিজ্ঞানসন্মত ভাৱে গোঁ পালন কৰিবৰ বাবে বেঙ্ক কৰ্তিপক্ষই সাত লাখ টকা ঋণ প্ৰদান কৰে।
বৰ্তমান মালিৰ গৰু ফাৰ্মখনত ১২ জনী গাই গৰু সহ সৰ্মমুঠ চেউৰীসহ ২৫ জনী গৰু আছে। দৈনিক জুনমা মালিয়ে ৬০ – ৭০ লিটাৰ গাখীৰ বিক্ৰী কৰে। তদুপৰি জুনমাই ঘৰতে উৎপাদন কৰে ঘী আৰু ক্ৰিম। বিভিন্ন বিয়া সবাহৰ অৰ্ডাৰ লয় জুনমা মালিয়ে।
উৎপাদিত গাখীৰ বিক্ৰী কৰি মালিয়ে সুন্দৰকৈ পৰিশোধ কৰিছে বেঙ্কৰ ঋণ। গোঁহালিৰ গোৱৰ আৰু হাবি জংঘল পেলনীয়া সামগ্ৰীৰে তিনি চাৰিটা টেঙ্কিত মালিয়ে উৎপাদন কৰা কেচু সাৰে অঞ্চল টোত ভাল বজাৰ লাভ কৰিছে। প্ৰতি কেজি কেচু সাৰ মালিয়ে ৩০ টকাকৈ বিক্ৰী কৰে।
ইয়াৰ সমান্তৰাল কৈ মালিয়ে আৰম্ভ কৰিছে এখন নাৰ্চাৰি। নাৰ্চাৰি খনো শূণ্য মুলধনেৰে আৰম্ভ কৰিছিল মালিয়ে। প্ৰথমে কষি বিজ্ঞান কেন্দ্ৰই দিয়া মেৰি গল্ডেৰে মালিয়ে আৰম্ভ কৰে নাৰ্চাৰি খন। মেৰি গল্ডৰ পাছত কৃষি বিজ্ঞান কেন্দ্ৰই ডেম’ হিছাবে দিয়া নাৰ্জি ফুলৰে মালাৰ বাবে মালিয়ে নাৰ্জি ফুলৰ খেতি কৰে।
নাৰ্জি ফুল দেখি মানুহে অন্যান্য ফুল , গছ পুলি আদি বিছৰাত মালিয়ে ২০২০ চনতে নাৰ্চাৰিৰ এটি ট্ৰেইনিং লৈ ডালিয়াকে ধৰি অন্যান্য ফুল গছ পুলি আদিৰো ব্যৱস্হা কৰে। বৰ্তমান মালিৰ নাৰ্চাৰী খনেও পুণাংগ ৰূপ লাভ কৰিছে।
২০২০ চনতে মালিয়ে ২০ -২৫ টা স্হানীয় সঁচৰ হাঁহেৰে আৰম্ভ কৰা হাঁহৰ ফাৰ্ম এখনো বৰ্তমান পুৰ্ণাংগ হোৱাৰ দিশে। অকল ইমানেই নহয় ২০২১ চনৰ পৰা মালিয়ে এটি টেঙ্কিত আৰম্ভ কৰিছে আলংকাৰিক মাছ পালন কৰিবলৈ।
বৰ্তমান টেঙ্কি টোত ১৫০ আলংকাৰিক মাছ আছে। তদুপৰি মালিয়ে নাৰ্চাৰি খনৰ কাষত বৰ্ধিত ৰূপত মৌ পালনৰ প্ৰয়াসেৰে কেবাবাহো মৌ পালন আৰম্ভ কৰিছে। গৰুক খুৱাবৰ বাবে ঘৰতে কৰিছে ঘাঁহৰ খেতি। মুঠতে মালীৰ ঘৰৰ চৌপাশে কেৱল ফাৰ্মিং।
প্ৰতিখন ফাৰ্মত ব্যস্ত থাকোতে সময় কোনফালে যায় মালিয়ে গমেই নাপাই। তাৰ মাজতে কৰে ঘৰুৱা ৰন্ধা বঢ়াৰ কাম। মালিক এই সন্দৰ্ভত অগ্ৰদূতৰ পৰা – তেওঁ কেনেকৈ সময় মিলাই আৰু ইমান দুৰন্ত কৰ্মস্পৃহাৰ অন্তৰালত কি আছে বুলি সোধাত তেওঁ কয় ,”এই মানসিক শক্তি কনেই মোৰ ফাৰ্মিঙৰ প্ৰকৃত মুলধন।
অসমৰ কৰ্মসংস্হানহীন শিক্ষিত যুৱক যুৱতিলৈ মালিৰ আৱেদন ,চাকৰি অসমত কেইটা আছে। চেষ্টা কৰক চাকৰিৰ বাবে। কিন্তুু চৰকাৰী চাকৰি অৱিহনে জীৱন টো অসাৰ বুলি নাভাবিব। ফাৰ্মিং কৰক, খেতিবাতি কৰক। অসমত এই এই ক্ষেত্ৰ খনত বহুত সম্ভাৱনা আছে।তদুপৰি বৰ্তমান বেঙ্কৰ ঋণ লৈ প্ৰতিবাদ কৰা সকলৰ সন্দৰ্ভত তেখেতৰ প্ৰতিক্ৰীয়া সোধাত কয় – ঋণ দি বেঙ্কে সহায় কৰিছে গতিকে ঋণ পৰিশোধ কৰাটো ঋণ লওঁতাৰ কৰ্তব্য। ঋণৰ সৎব্যৱহাৰ কৰিলে সৰ্বস্বান্ত হোৱাৰ প্ৰশ্ন নাহে। অসমৰ বজাৰ সন্দৰ্ভতো তেওঁ কয় – অসমীয়াগীৰি মুখেৰে কৰি বজাৰ দখল কৰিব বিছাৰিলে অসমীয়াক কোনেও হাতত বজাৰ তুলি নিদিয়ে। বজাৰ আমি নিজেই লব লাগিব। মই কাম কৰিছো বজাৰো দখল কৰিছো।’
উল্লেখ্য যে মালিয়ে নিজৰ কৰ্মৰ বাবে জিলা পৰ্যায়ৰ পৰা ৰাজ্যিক আৰু ৰাষ্ট্ৰীয় পৰ্যায়ত কেবাটাও বঁটা লাভ কৰিবলৈ সক্ষম হৈছে। মৰিগাঁও জিলা প্ৰশাসনৰ আদৰ্শ মহিলা কৃষক সন্মান, কৃষি বিজ্ঞান কেন্দ্ৰৰ ডাঃ কৰানে আম্বেদকাৰ ৰাষ্ট্ৰীয় বঁটা, ৰাষ্ট্ৰীয় দুগ্ধ দিৱসত পুৰৱি ডায়েৰিৰ – ২য় ফাৰ্মাৰ অ’মেন বঁটাকে ধৰি দুটা ৰাজ্যিক বঁটা লাভ কৰে। তদুপৰি পুৰৱি ডায়েৰিৰ তৰফৰ পৰা মালিয়ে এটি মিল্কিং মেচিন উপহাৰ হিচাবে এইবাৰ লাভ কৰিছে। মুঠতে শূণ্য হাতেৰে এজনী আধি গৰুৰ পৰা ফাৰ্মিঙৰ যাত্ৰা আৰম্ভ কৰি জুনুমা মালি ডেকাই আত্মবিশ্বাসৰ বাবেই ৮ বছৰীয়া নিৰলস চেষ্টাৰ ফলত আজি যেন সফলতাৰ আকাশ চুৱাৰ দিশে গতি কৰিছে। নিশ্চিত ভাৱে মৰিগাঁৱৰ জুনমা মালি ডেকাই নৱপ্ৰজন্মৰলৈ সংস্হাপনৰ এক অনন্য পথ দেখুৱাইছে।
