Yuba Sangbadik Sanstha Foundation :
আগতে বাতৰি কাকতৰ প্ৰতিটো শব্দই মানুহে সচা বুলি ভাবিছিল, কিন্তু আজিকালি নাভাবে৷ যোৱা তিনিদশক ধৰি মূল্যবোধৰ আমূল পৰিৱৰ্তন হৈছে ৷ আজিৰ পৰা ত্ৰিশ বছৰ আগতে ৰাজনীতিয়ে হওক অথবা সাহিত্য, সংস্কৃতি, সাংবাদিকতাত যিটো মূল্যবোধ আছিল আজি সেইটো হেৰাই গ’ল, সস্তীয়া হৈ গৈছে৷ এই মন্তব্য বিশিষ্ট সাংবাদিক, দৈনিক অগ্ৰদূত কাকতৰ মূখ্য সম্পাদক তথা অসম সাহিত্য সভাৰ প্ৰাক্তন সভাপতি কনক সেন ডেকাৰ ৷
আজি গুৱাহাটী প্ৰেছ ক্লাৱ প্ৰেক্ষাগৃহত যুৱ সাংবাদিক সন্থা অসমৰ প্ৰতিষ্ঠা দিৱস আৰু বিশেষ সম্বৰ্ধনা অনুষ্ঠানত সংগঠনটোৰ তৰফৰ পৰা আগবঢ়োৱা বিশেষ সন্মান গ্ৰহন কৰি ডেকাই লগতে কয় এতিয়া সাহিত্যয়ে হওক, অন্যান্য ক্ষেত্ৰতে হওক মূল্যবোধৰ আমূল পৰিৱৰ্তন ঘটিছে ৷
গতিকে এতিয়া আটাইতকৈ ডাঙৰ কথা সেই মূল্যবোধটো কেনেকৈ ঘুৰাই আনিব পাৰো ৷ ভাষনত তেওঁ কয় এতিয়া চাৰিওফালে দেখিছো ব্যভিচাৰ, কিন্তু এই ব্যভিচাৰ কৰা মানুহবোৰ সাধাৰণ মানুহ নহয় ৷ মানুহে যে কয় মূৰৰ পৰা মাছ গেলে, এতিয়া সমাজত আমি সেইটো দেখিব পাৰিছো ৷
পৰিৱৰ্তন হবলৈ হলে যুৱ সাংবাদিক সকল ওলাই আহিব লাগিব আৰু তেওলোকে যদি মোক গ্ৰহণ কৰে মইয়ো ওলাই আহিম৷ তিনিদশকৰ আগৰ সাহিত্য, সমাজনীতি, ৰাজনীতি, সাংবাদিকতাৰ মূল্যবোধ ঘুৰাই আনিব পাৰো, মানুহৰ মাজত বিশ্বাসযোগ্যতা কেনেকৈ প্ৰতিপন্ন কৰিব পাৰো তাৰে চেষ্টা কৰিবলৈ সকলোকে আহ্বান জনায় ৷
ভাষনৰ মাজতে তেওঁ সন্মান প্ৰদানৰ বাবে যুৱ সাংবাদিক সন্থা অসমক ধন্যবাদ জনায় আৰু সমাজৰ বাবে সকলোকে সমিলমিলেৰে কাম কৰি যাবলৈ আহ্বান জনায় ৷
উল্লেখ্য যে আজি যুৱ সাংবাদিক অসমে সংগঠনটোৰ পঞ্চম বাৰ্ষিক প্ৰতিষ্ঠা দিৱসৰ লগত সংগতি ৰাখি দৈনিক অগ্ৰদূত কাকতৰ মূখ্য সম্পাদক কনক সেন ডেকাক সংগঠনটোৰ ‘বিশেষ সন্মান’ প্ৰদান কৰাৰ উপৰিও এন কে টিভিৰ পৰিচালন সম্পাদক পৰাগমনি আদিত্যক ‘সংবাদ শিৰোমণি সন্মান’ আৰু নিউজ লাইভৰ ডিব্ৰুগড়ৰ ব্যুৰ সূৰজ দত্তলৈ ‘বৰ্ষশ্ৰেষ্ঠ যুৱ সাংবাদিকতা সন্মান’ প্ৰদান কৰে ৷
তিনিওজনকে অসমীয়াৰ স্বাভিমান ফুলাম গামোছা, চেলেং, ফুলাম জাপি, স্মাৰক আৰু মানপত্ৰ প্ৰদান কৰা হয়৷ বটা গ্ৰহন কৰি পৰাগমনি আদিত্য আৰু সূৰজ দত্তই সংগঠনটোক ধন্যবাদ জনোৱাৰ লগতে এনেধৰনৰ সন্মানে আগন্তুক দিনত কাম কৰি যাবলৈ প্ৰেৰণা দিয়ে বুলি উল্লেখ কৰে ৷
প্ৰাঞ্জল হাজৰিকাই আত ধৰা সভাখনত আৰম্ভণিতে এটি বৰগীত পৰিবেশন কৰে জনপ্ৰিয় কন্ঠশিল্পী আশ্বাস আয়ুস্মানে ৷ সন্থাৰ সাধাৰণ সম্পাদক কাঞ্চন জ্যোতি গোহাঁইয়ে উদ্দেশ্য বাখ্যা কৰা সভাখনত উপস্থিত থাকি নিয়মীয়া বাৰ্তা কাকতৰ সম্পাদক নৰেশ কলিতাই কয় ৩৪বছৰীয়া সাংবাদিকতাত বহু ঘাট প্ৰতিঘাত দেখিছো ৷
২০বছৰ মই অগ্ৰদূত কাকতত সংবাদকৰ্মী হিচাপে আছিলোঁ ৷ আজি মই যি অৱস্থাত আছো সেয়া কনক সেন ডেকা অথবা অগ্ৰদূতৰ বাবে সম্ভৱ হৈছে ৷ মই বহু সম্পাদকক পাইছো কিন্তু কনক সেন ডেকাৰ দৰে সত্যনিষ্ঠ আৰু সাহসী সম্পাদক দ্বিতীয়জন পোৱা নাই ৷
ডেকা ছাৰে কোনোদিনে সাংবাদিকতা ক্ষেত্ৰত আপোচ কৰা নাই। নলবাৰী সদৰৰ পৰা সংবাদদাতা হিচাপে কাম কৰি আজি এই পৰ্যায় পাইছো ৷ সংবাদ মাধ্যমত কেৱল চৰকাৰী সভা সমিতিৰ বাতৰিয়ে হয় বুলি যি মানুহৰ মাজত ধাৰণা আছিল সেয়া সংবাদ জগতলৈ আহি সলনি কৰিবলৈ উঠিপৰি লাগিলো ৷
বাতৰি কাকতত যে কেৱল চৰকাৰী বাতৰিয়েই নহয় দুৰ্নীতি, অনিয়ম, দুখীয়াৰ প্ৰতি বঞ্চনা আদিৰ বাতৰিয়ো হয়, সেয়া প্ৰকাশ পোৱাৰ পিছত মানুহে বাতৰিকাকতৰ নতুন সোৱাদ পাব ললে ৷
মই সাহসিকতাৰে বাতৰি কৰি থকা দেখি সেইসময়তে কনক সেন ডেকা ছাৰে মাতি আনিলে ৷ তেতিয়াৰ পৰা মোৰ সাংবাদিকতাৰ ধাৰা অব্যাহত আছে ৷
বিগত ৩৪বছৰৰ আমাৰ যদি সাংবাদিকতা ক্ষেত্ৰখন চাও উগ্ৰ জাতীয়তাবাদ, সহস্ৰ সংগ্ৰাম, বন্ধ, প্ৰতিবাদ যথেষ্ট হৈছে ৷ কিন্তু এনে পৰিস্থিতিয়ে আমাৰ জাতিটোক ভাষাটোক শক্তিশালী ৰূপত গঢ়িব নোৱাৰে ৷
শক্তিশালী ৰূপত গঢ়িবলৈ হলে জাতি – ভাষাৰ কাৰনে আমাক ভাৱনা লাগিব, কাম কৰি যোৱাৰ ইচ্ছা লাগিব ৷ ডেকা ছাৰে নতুন প্ৰজন্মক যি বাট দেখুৱাইছে সেয়া খৰটকীয়া হওক তাৰেই কামনা কৰিছোঁ ৷
সংবাদিক সকলোকো একত্ৰিত হৈ কাম কৰি যাবলৈ কলিতাই আহ্বান জনায় ৷ অনুষ্ঠানত উপস্থিত থাকি বিশিষ্ট উপন্যাসিক ৰীতা চৌধুৰীয়ে কয় সমাজ পৰিৱৰ্তনৰ ভূমিকা সাংবাদিক সকলৰ ওপৰত আছে ৷
যি সকল সাংবাদিকে সমাজলৈ অৱদান আগবঢ়াইছে তেওঁলোকলৈ ধন্যবাদ থাকিল ৷ বাতৰি কাকত, সামাজিক মাধ্যমৰেৰে বহু বাৰ্তা বিলোৱা হয় কিন্তু সমাজলৈ পজিটিভ বাৰ্তা বিলোৱাতো খুব কঠিন কাম ৷
কিয়নো দেখা যায় বেছিভাগ নিগেটিভ বাৰ্তাই প্ৰচলন বেছিকৈ হয় ৷ সমাজত যি ঘটি থাকে সেই বাৰ্তাটো শুদ্ধ ৰূপত বিলোৱাতো সকলোৰে কেৱল দায়িত্বয়ে নহয় কৰ্তব্যয়ো ৷
কেতিয়াবা দেখা যায় সংবাদ মাধ্যম সামাজিক মাধ্যম আদিত মানুহক নষ্ট কৰি দিবলৈ চলে৷ মই ভাবো যি সকলে ভাল কাম কৰিব খোজে তেওঁলোকক উৎসাহ যোগাব লাগে ৷
তেখেতে লগতে কয় সহজ পথ লবলৈ গৈ বহু কবি, সাহিত্যিক সাংবাদিকে পথ হেৰুৱাইছে ৷ আজিৰ যুৱ চামক সৎ পথৰে আগবঢ়াই নিয়াতো দৰকাৰ ৷ যুৱ সাংবাদিক সকলোলৈ অনুৰোধ জনাই কয় তেওঁলোকে অগ্ৰজ সকলক সন্মান কৰক ৷
আজিৰ সভাত মটক স্বায়ত্ত্ব শাসিত পৰিষদৰ অধ্যক্ষ সৰোজ গোহাঁই, জনপ্ৰিয় কন্ঠশিল্পী ড° মৌচুমী চহৰীয়ায়ো ভাষন প্ৰদান কৰে ৷
সভাত অসম জাতীয়তাবাদী যুৱ পৰিষদৰ সাধাৰণ সম্পাদক উদয়ন কুমাৰ গগৈ,অসম ৰাজ্যিক সাংবাদিক সন্থাৰ সাধাৰণ সম্পাদক প্ৰদীপ চন্দ্ৰ ডেকা, মটক যুৱ ছাত্ৰ সন্মিলনৰ সভাপতি ৰঞ্জিত গোহাঁই, টাই আহোম ছাত্ৰ সন্থাৰ যুটীয়া সম্পাদক মিলন বুঢ়াগোহাঁইকে কৰি বহু বিশিষ্ট ব্যক্তি উপস্থিত আছিল ৷
কাৰ্যসূচীৰ লগত সংগতি ৰাখি পুৱা পতাকা উত্তোলন কৰে সন্থাৰ সভাপতি চন্দন দাসে আৰু শ্বহীদ তৰ্পণ কাৰ্যসূচী মুকলি কৰে সম্পাদক কাঞ্চন জ্যোতি গোহাঁইয়ে ৷