Assam is suffering from unexpected heat waves
ভাদ পাৰ হৈ আহিন সোমাল আৰু অতীত হ’ল সেই হৃদয় উদ্বেলিত কৰা কবিতা- ‘ভাদ মাহত মহাপুৰুষ দুয়োজনাৰ তিথি আহিন মাহত দূবৰি বন থাকে নিয়ৰত তিতি।’ কাৰণ নিয়ৰৰ হৃদয় জুৰোৱা শীতলতাৰ বিপৰীতে এতিয়াও দিনে- ৰাতিয়ে সমানে উৎকট গৰমত চাটি-ফুটি কৰি থাকিবলগীয়া হৈছে অসমবাসীয়ে।
বতৰ পৰিৱৰ্তনৰ এনে ভয়াৱহ যন্ত্ৰণাৰ পৰা সকাহ বিচাৰি মানুহে কামনা কৰিবলগীয়া হৈছে বৰষুণৰ, অথচ এই সময়ত তাৰ সম্ভাৱনাও কম। ভাৰতীয় বতৰ বিজ্ঞান কেন্দ্ৰৰ তথ্য অনুসৰি, অসমত আগন্তুক দুই-এটা দিনত ক’ৰবাত ক’ৰবাত পাতলীয়া দুই-এজাক বৰষুণ পৰাৰ সম্ভাৱনা আছে যদিও সেয়া পৰিৱেশ শীতল কৰাৰ বাবে মুঠেই পর্যাপ্ত নহয়। ইতিমধ্যে মৌচুমীয়েও ৰাজ্যৰ পৰা বিদায় লৈছে। গতিকে বংগোপ সাগৰত বিশেষ কোনো পৰিঘটনাৰ সৃষ্টি নহ’লে মুষলধাৰ বৰষুণৰ সম্ভাৱনা এতিয়া আৰু নাই।
প্রসংগক্রমে অসমত এইবাৰ স্বাভাবিকতকৈ বৰষুণৰ পৰিমাণো কম। সামগ্রিক এনে পৰিস্থিতিত উৎকট গৰমে নিজে জলবায়ুকেন্দ্রিক কোনো প্রভাৱৰ দ্বাৰা তাৎক্ষণিকভাবে প্রভাবিত নহ’লে চলিত পৰিৱেশ অলপ দীঘলীয়া সময়লৈ অব্যাহত থাকিব বুলি বতৰ বিজ্ঞান কেন্দ্রই সম্ভাৱনা ব্যক্ত কৰিছে। অসমৰ ক্ষেত্ৰত গৰমৰ অনুভৱ দেশব বহু ৰাজ্যৰ তুলনাত অধিক। আর্দ্রতাৰ পৰিমাণ যথেষ্ট বেছি হোৱা হেতুকেই ৰাজ্যখনত উত্তাপৰ পৰিমাণতকৈ অনুভব অত্যধিক।
ইয়াৰ পৰিপ্ৰেক্ষিতত বতৰ বিজ্ঞান কেন্দ্ৰৰ তথ্য মতে গুৱাহাটীৰ ক্ষেত্ৰতে যদিও আজি দিনৰ ভাগত তাপমাত্রা আছিল ৩৭ ডিগ্রী চেলছিয়াছ, ঠাই বিশেষে উত্তাপ অনুভৱ হয় ৪৭ ডিগ্রী পর্যন্ত। আঞ্চলিক বতৰ বিজ্ঞান কেন্দ্ৰৰ তথ্য অনুসৰি, চলিত ছেপ্টেম্বৰৰ উত্তাপৰ মাত্রাই পূৰ্বৰ অভিলেখ অতি সহজে ভংগ কৰিব। গুৱাহাটী, শিলচৰসহ ৰাজ্যৰ প্ৰধান চহৰসমূহত উত্তাপৰ মাত্ৰা চলিত মাহটোৰ ইতিমধ্যে পাৰ হোৱা দিনকেইটাত অভাবনীয়ভাবে অধিক হৈ বয়। আনকি এটা দিনত উত্তাপৰ মাত্রা ৩৮.২ ডিগ্রী চেলছিয়াছো হয়। এই পৰিমাণ স্বাভাৱিকতকৈ ৬.৪ ডিগ্রী অধিক।
আনহাতে, অনুভৱৰ পৰিমাণ হয় ৫১ ডিগ্রী চেলছিয়াছ। শিলচৰত উত্তাপ এই ছেপ্টেম্বৰতে ৩৯.৪ ডিগ্রী চেলছিয়াছলৈও বৃদ্ধি হয় আৰু এই পৰিমাণ স্বাভাবিকতকৈ ৭.৪ ডিগ্রী চেলছিয়াছ অধিক। অসমসহ উত্তৰ-পূৰ্বাঞ্চলৰ আটাইকেইখন ৰাজ্যত এইবাৰ বৰষুণৰ পৰিমাণো স্বাভাবিকতকৈ কম হৈ থাকে। ইয়াৰ ফলতো উত্তাপৰ ধাৰাবাহিকতা অধিক হৈ ৰয়। উল্লেখ্য যে যোৱা জুনৰ পৰা আগলৈ অতি কম দিনৰ বিপৰীতে বেছি দিন অত্যধিক উষ্ণতাৰ মাজতে অতিক্রম হয়। উষ্ণতাৰ এনে ধাৰাবাহিকতাব প্রকোপ বৃদ্ধিৰ অন্যতম কাৰণ বৰষুণৰ পৰিমাণ হ্রাস।
বৰষুণৰ পৰিমাণ কম হোৱা বাবেই এনে অসহনীয় অৱস্থাৰ সৃষ্টি হয়। শেহতীয়া তথ্য অনুসৰি, যোৱা পহিলা জুনৰ পৰা আজিলৈকে অসমত বৰষুণৰ হাৰ ১৮ শতাংশ হ্রাস হৈ আছে। চলিত বৰ্ষৰ পহিলা মাৰ্চৰ পৰা ১৫ মে’লৈকে বৰষুণৰ হাৰ উদ্বেগজনকভাবে ৪২ শতাংশ হ্রাস হয়। ইয়াৰ পাছত পহিলা জুনৰ পৰা তিনি জুলাইলৈ বৰষুণৰ পৰিমাণ স্বাভাৱিকতকৈ ১৮ শতাংশ বৃদ্ধি হয়। সেই সময়ছোৱাতে ৰাজ্যৰ অধিক অংশ বানৰ কৱলত পৰে। তাৰ পাছৰ পৰা বৰষুণৰ পৰিমাণ সামগ্রিকভাবে পুনৰ হ্রাস পাবলৈ ধৰে। অব্যাহত থকাৰ দুঃসংবাদ এয়ে যে সম্প্রতি যি উৎকট গৰমে ৰাজ্যখনক দহিছে এই পৰিবেশ অহা ২৩ ছেপ্টেম্বৰলৈ সম্ভাৱনা ব্যক্ত কৰিছে আঞ্চলিক বতৰ বিজ্ঞান কেন্দ্ৰই।
বৃহস্পতিবাৰে গুৱাহাটীত সৰ্বাধিক উষ্ণতা হয় ৩৯ ডিগ্ৰী ৷ গতিকে অহা পাঁচটা দিনো ৰাইজে চাটি-ফুটি কৰি থাকিব লাগিব, দিন-ৰাতি সমানে শীতল অনুভৱ বিচাৰি হাবাথুৰি খাব লাগিব। ২৩ ছেপ্টেম্বৰ পাছতহে সাময়িকভাবে গৰম সামান্য হ্রাস পাব পাৰে। অৱশ্যে সেয়াও ঠাই বিশেষে হোৱাৰ সম্ভাৱনা আছে। এনে অভূতপূর্ব উত্তাপৰ বাবেই চুবুৰীয়া ৰাজ্য শ্বিলং অথবা অৰুণাচললৈ ঠাণ্ডা বিচাৰি অসমৰ পৰা যোৱা মানুহৰ অভাৱ নাই।
বন্ধৰ দিনটোত এপাক শ্বিলঙলৈ যোৱা মানুহৰ অভাৱ এই বছৰ জুলাইৰ পাছত হোৱা নাই বুলি জনায় অসম-মেঘালয় ট্যুৰ টেক্সি সন্থাৰ চালকে। অৱশ্যে মেঘালয়ৰ পৰিৱেশ অসমতকৈ শীতল হ’লেও উদ্বেগজনকভাবে ত্ৰিপুৰাৰ বাদে উত্তৰ- পূৰ্বাঞ্চলৰ আটাইকেইখন ৰাজ্যত এইবাৰ বৰষুণৰ পৰিমাণ হ্রাস হয়। ইয়াৰ ফলতো অসমত গৰমৰ প্রকোপ বৃদ্ধি হৈছে।
বিশ্বত হোৱা বতৰ পৰিবৰ্তনৰ ভয়াৱহ প্রভাবে গ্রাস কৰাৰ ফলতে অসমত সৃষ্টি হৈছে সাম্প্রতিক জটিল পৰিস্থিতিৰ। বৰঝাৰস্থিত আঞ্চলিক বতৰ বিজ্ঞান কেন্দ্ৰৰ মুখ্য বিজ্ঞানী সঞ্জয় শ্বই মন্তব্য কৰা অনুসৰি, এনে কাৰণতে অবতৰতো ধুমুহাৰ তাণ্ডৱ দেখিবলৈ পোৱা গৈছে। অকস্মাৎ হোৱা মুষলধাৰ বৰষুণৰ প্ৰভাৱো পৰিলক্ষিত হৈছে।
এইটো ঠিক যে জলবায়ু পৰিৱৰ্তনৰ কথা ৰজা-প্রজা সকলোৰে মুখতহে চলি আহিছে। তাৰ বাস্তবসম্মত কার্যসূচী মুঠেই নাই। পৰিৱেশ দিৱস পালন এক বাহ্যিক আনুষ্ঠানিকতাত পৰিণত হৈছে। কোটি কোটি গছপুলি ৰোপণ চমকত পৰিণত হৈছে। পৰিৱেশৰ বাবে যমদূত একক ব্যবহার্য প্লাষ্টিকৰ ব্যৱহাৰ নিষিদ্ধ ঘোষণা ঘোষণাতে সীমাবদ্ধ বৈছে। তেনে প্লাষ্টিকৰ উৎপাদন কোনো কাৰণতে বন্ধ কৰা নহয়।