আগ্ৰাৰ ৰূপ ব্যৱসায়ী অৱধেশ কুমাৰ আগৰৱালাৰ হত্যাকাণ্ডৰ নতুন মোৰ । আৰক্ষীৰ জেৰাত প্ৰতিদিনে পোহৰলৈ আহিছে ন ন তথ্য । যোৱা ২৭ অক্টোবৰত বিহাৰৰ পাটনাত দুই আততায়ীয়ে গুলীয়াই হত্যা কৰিছিল আগৰৱালাক । এই ঘটনা পোহৰলৈ অহাৰ পিচতেই পাটনা আৰক্ষীয়ে চিবি চেইন ডিষ্ট্ৰিবিউটৰ হৰি বাবু গোৱেলৰ পুত্ৰ নিখিল গোৱেল আৰু তেওঁৰ বাহনৰ চালক জীতেন্দ্ৰক এই হত্যাকাণ্ডত হাত থকাৰ সন্দেহ কৰিছিল ।
ইতিমধ্যে পাটনা আৰক্ষীয়ে নিখিল গোৱেল, শ্বুটাৰ ব্ৰজ ভূষণ পণ্ডিত, নীৰজ গৌতম আৰু ব্ৰজ গোপাল নামৰ তিনিগৰাকী সন্দেহজনক লোকক গ্ৰেপ্তাৰ কৰি জেৰা অব্যাহত ৰাখিছিল । প্ৰায় ৩৩ দিনৰ অন্তত আৰক্ষীৰ কঠোৰ জেৰাত দুই শ্বুটাৰে মুখ খোলে । আৰক্ষীক দিলে সেই ভয়ংকৰ নিশাৰ বিৱৰণ ।
২০ লাখ টকাত দিছিল ছুপাৰী :
জীতেন্দ্ৰৰ সম্পৰ্কীয় ভাতৃ ব্ৰজ গোপালে মথুৰাৰ শ্বুটাৰ ব্ৰজ ভূষণ পণ্ডিত আৰু নীৰজ গৌতমক পূৰ্বৰে পৰাই চিনি পায় । সেই অনুসৰি ব্ৰজ গোপালে অৱধেশ কুমাৰ আগৰৱালাক হত্যা কৰিবলৈ উক্ত দুই শ্বুটাৰৰ লগত সংযোগ কৰিছিল । তেওঁলোকৰ পৰিকল্পনা অনুসৰি অৱধেশ কুমাৰ আগৰৱালাক হত্যা কৰিলে দুই ছুপাৰীক দিয়া হ’ব ২০ লাখ টকা । কথা মতেই, ব্ৰজ গোপালে দুই শ্বুটাৰক আগতীয়াকৈ ১০ লাখ টকা পৰিশোধ কৰিছিল।
কি হৈছিল ২৭ অক্টোবৰৰ নিশা :
পৰিনই কুঞ্জ হৰিপৰ্বতৰ বাসিন্দা আছিল ৫৫ বছৰীয়া অৱধেশ আগৰৱালা । তেওঁ পেছাত এগৰাকী ৰূপ ব্যৱসায়ী । ধনতেৰাছৰ দুদিন পূৰ্বে তথা ২৭ অক্টোবৰৰ নিশা পাটনাৰ পিৰবাহোৰতস্থিত তেওঁৰ বিপণী বন্ধ কৰি নিজ ফ্লেটলৈ আহি আছিল আগৰৱালা । ইতিমধ্যে তেওঁৰ ফ্লেটৰ খটখটীত তেওঁলৈ অপেক্ষা কৰি আছিল দুই শ্বুটাৰে । আগৰৱালাক ঘৰৰ ফ্লেটৰ বাহিৰতে গুলীয়াই পলায়ন কৰে শ্বুটাৰদ্বয়ে । লগে লগে গুলীৰ শব্দ শুনি লাগিছিল হুৱা-দুৱা ।
চিচিটিভিত বন্দী হৈছিল সমগ্ৰ দৃশ্য় :
ইফালে এই সমগ্ৰ বন্দী হৈছিল চিচিটিভি কেমেৰাত । ঘটনাস্থলীৰ পৰা শ্বুটাৰদ্বয়ে পলায়ন কৰা সমগ্ৰ দৃশ্য পৰৱৰ্তী সময়ত পাটনা আৰক্ষীয়ে হাতত পৰিছিল । তাৰ পিছতেই পাটনা আৰক্ষীয়ে যোৱা ৬ নৱেম্বৰত চিবি চেইনৰ ডিষ্ট্ৰিবিউটৰ ৰূপ ব্যৱসায়ী নিখিল গোৱেল আৰু তেওঁৰ গাড়ীৰ চালক জীতেন্দ্ৰক গ্ৰেপ্তাৰ কৰে । এই ঘটনাৰ সময়ত গোৱেল আৰু জীতেন্দ্ৰৰ অৱস্থান পাটনাত আছিল ।
আৰক্ষীৰ ভাষ্য :
চেণ্ট্ৰেল পাটনাৰ আৰক্ষী অধীক্ষক প্ৰীতি চেহৰাৱতে এক সংবাদমেল সম্বোধন কৰি কয় যে, নিখিল গোৱেল, শ্বুটাৰ ব্ৰজ ভূষণ পণ্ডিত, নীৰজ গৌতম আৰু ব্ৰজ গোপালক হত্যাৰ গোচৰত গ্ৰেপ্তাৰ কৰা হৈছে । জেৰাৰ সময়ত, নিখিল গোৱেলে কৈছিল যে তেওঁ অৱধেশ আগৰৱালাক ছুপাৰী দি হত্যা কৰিছিল, কিয়নো আগৰৱালাৰ বাবে তেওঁৰ ব্যৱসায়ত যথেষ্ট লোকচানৰ সন্মুখীন হ’বলগীয়া হৈছিল ।
লগতে পঢ়ক : Agninav Shiv Mandir:নাজিৰাত নিশা অগ্নিনাভ মন্দিৰৰ শিৱ মুৰ্তি চুৰি
আনহাতে পাটনা আৰক্ষীয়ে কোৱা অনুসৰি, নিখিল গোৱেলে স্বীকাৰ কৰিছিল যে অৱধেশ কুমাৰ আগৰৱালাৰ বাবে তেওঁৰ পাটনাস্থিত ব্যৱসায় মন্থৰ হৈ পৰে। সেইবাবে নিখিল গোৱেলে ৰূপ ব্যৱসায়ী অৱধেশ আগৰৱালাক বাটৰ পৰা আঁতৰাবলৈ চালক জীতেন্দ্ৰৰ সহায় লৈ এই ঘটনা সংঘটিত কৰে ।
লগতে পঢ়ক : CBI files chargesheet in trading scam:ট্ৰেডিং কেলেংকাৰীৰ অভিযোগনামা দাখিল চিবিআইৰ
