APSC Scam :
কোকৰাঝাৰ বিধান পৰিষদ ভৱনত সোমবাৰে অনুষ্ঠিত হোৱা অসম বিধানসভাৰ এদিনীয়া বাজেট অধিৱেশনত চৰকাৰে দাখিল কৰা বহুচৰ্চিত বিপ্লৱ শৰ্মাৰ বাৰশ পৃষ্ঠাৰ প্ৰতিবেদনত বহু বিস্ফোৰক তথ্য পোহৰলৈ আহিছে ৷এপিএছচি কেলেংকাৰীৰ অন্যতম খলনায়ক ৰাকেশ পালক অসম লোকসেৱা আয়োগৰ স্থায়ী অধ্যক্ষ পাতিবলৈ ২০১৩চনত কেলেংকাৰীৰ আন এজন বহু বিতৰ্কিত অভিযুক্ত ডাঃ মৃগেন শইকীয়াৰ জৰিয়তে সাক্ষাৎ কৰা হৈছিল সেই সময়ৰ মুখ্যমন্ত্ৰী প্ৰয়াত তৰুণ গগৈক।
ইয়াৰ পিছৰে পৰা প্ৰায়ে সময়ে সময়ে মুখ্যমন্ত্ৰী গৰাকীক সাক্ষাৎ কৰি আহিছিল ৷ প্ৰতিবেদনত উল্লেখ থকা মতে ৰাকেশ পালে যেতিয়াই মুখ্যমন্ত্ৰী গগৈ সাক্ষাৎ কৰে ,তেতিয়াই লৈ গৈছিল কেতবোৰ উপহাৰ। অৱশ্যে পৰৱৰ্তী সময়ত ৰাকেশ পালকে স্থায়ী অধ্যক্ষ ৰূপে নিযুক্তি দিছিল মুখ্যমন্ত্ৰী গগৈয়ে ৷আনহাতে প্ৰতিবেদনত উল্লেখ থকা আন এক তথ্যানুসৰি গৌৰৱ গগৈৰ বিয়াত ৰাকেশ পালে উপহাৰ স্বৰূপে দিছিল সোনৰ চেইন,আঙুঠি আৰু ব্ৰেচলেট৷
আনহাতে প্ৰতিবেদনত উল্লেখ আছে সেই সময়ৰ কেএমচিচিৰ দুই নেতা অখিল গগৈ ,কমল কুমাৰ মেধি(বৰ্তমান ৰাজ্যিক বিজেপিৰ মুখপাত্ৰ) আৰু আৰটিআই কৰ্মী দুলাল বৰাৰ নাম ৷ ৰাকেশ পালে গগৈক সাক্ষাৎ পাব বিচাৰিছিল যদিও নিৰ্ধাৰিত দিনটোত গগৈয়ে সাক্ষাৎ নিদি বৰং কেএমচিচিৰ আন এজন নেতা কমল কুমাৰ মেধিৰে যোগযোগ কৰিবলৈ কয় পালক ৷ সেই অনুসৰি কমল মেধি পালে দিয়ে ৩ লাখ টকা ৷ একেদৰে এপিএছচি কেলেংকাৰী মিটমাট কৰিবৰ বাবে আই পি এছ বিষয়া এপি তিৱাৰীকো দিয়ে ২ লাখ টকা ৷
উল্লেখ্য যে বিপ্লৱ শৰ্মাৰ আয়োগৰ পৃষ্ঠাই পৃষ্ঠাই বহু ৰৌ-বৰালীৰ নাম সন্নিৱিষ্ট আছে ৷ আছুৰ জ্যেষ্ঠ নেতাৰ পৰা আৰম্ভ কৰি বিয়াগোম চৰকাৰী বিষয়াৰ ঘনিষ্ঠ আৰু অঙহীবঙহীয়ে ৰাকেশ পালৰ জৰিয়তে লাভ কৰিছিল এচিএছ- এপিএছ ৷
প্রাক্তন কংগ্রেছী বিধায়ক সুমিত্রা পাটিৰৰ পৰিয়ালৰ ৩ সদস্যই লাভ কৰিছিল চাকৰি ৷ সুমিত্রা পাটিৰৰ বৰপুত্ৰ জৱাহৰ পাটিৰ , দ্বিতীয় পুত্ৰ কপূৰ পাটিৰে লাভ কৰিছিল এচিএছ ৷ একেদৰে চাকৰি পাইছিল সুমিত্রা পাটিৰৰ বোৱাৰী তথা জৱাহৰ পাটিৰৰ পত্নী মীনাক্ষী পামেই৷
আনহাতে,ন্যায়াধীশ বিকে শৰ্মাৰ আয়োগৰ প্ৰতিবেদনত বিস্ফোৰক তথ্যানুসৰি এপিএছচিৰ সহকাৰী পৰীক্ষা নিয়ন্ত্রক পবিত্ৰ কৈৱৰ্তৰ জীয়ৰী লীনা দাসে লাভ কৰিছিল কৰ পৰিদৰ্শকৰ চাকৰি ৷ভতিজা ভাৰ্গৰমুনি দাসে পাইছিল এপিএছ ৷
পবিত্র কৈৱৰ্তৰ কন্যা লীনা দাস মঙলদৈৰ প্রাক্তন বিজেপি বিধায়ক গুৰুজ্যোতি দাসৰ পত্নী ৷
একেদৰে কৈৱৰ্তৰ দ্বিতীয় গৰাকী কন্যা নির্মালী দাসেও ২০০৯ত লাভ কৰিছিল এপিএছৰ চাকৰি৷ বৰ্তমান অসম মীন নিগমৰ অধ্যক্ষ গুৰুজ্যোতি দাসৰ ঘনিষ্ঠ বিজেপি নেতা নিতাই ঘোষঁৰ পুত্ৰই পাইছিল এপিএছ ৷
আনহাতে,ন্যায়াধীশ বিকে শৰ্মাৰ আয়োগৰ প্ৰতিবেদনত পোহৰলৈ অহা আন এক বিস্ফোৰক তথ্য মতে মেট্রিকত তৃতীয় বিভাগত উত্তীর্ণ হৈও কে’বাজনেও লাভ কৰিছিল এপিএছচিৰ চাকৰি৷ ভাগ্যৱান প্ৰাৰ্থী সকল আছিল সুশোভন দাস,
এন বেনথৈ ছানু,সৰোজ সোণোৱাল,ভৰত কুমাৰ পেগু,পদ্ম কুমাৰ পেগু,মামনি হাজৰিকা আৰু বিকাশ কুনাৰ পিন্সা।
# আছুৰ মুখ্য উপদেষ্টা ড: সমজ্জুল ভট্টাচাৰ্যৰ ঘনিষ্ঠও লাভ কৰিছিল এপিএছচি চাকৰি:
ন্যায়াধীশ বিকে শৰ্মাৰ আয়োগৰ প্ৰতিবেদনত উল্লেখ থকা তথ্য অনুসৰি আছুৰ মুখ্য উপদেষ্টা ড: সমজ্জুল ভট্টাচাৰ্যৰ ঘনিষ্ঠ জন দাসে (বৰ্তমান অতিৰিক্ত আৰক্ষী অধীক্ষক ৰূপে কৰ্মৰত)লাভ কৰিছিল এপিএছ ৷
এপিএছচিৰ পৰীক্ষা নিয়ন্ত্ৰক এ এন বি সিনহাৰ কন্যাই লাভ কৰিছিল এচিএছ ৷ আৰটিআই কৰ্মী অকৰাম প্ৰশান্ত সিঙৰ ঘনিষ্ঠ প্ৰতাপ দাসেও লাভ কৰিছিল এপিএছ ৷
# NRC ৰ প্ৰাক্তন সমন্বয়ক অৱসৰপ্ৰাপ্ত এচিএছ বিষয়া হিতেশ দেৱশৰ্মাৰ পুত্ৰও লাভ কৰিছিল এপিএছ
এন আৰ চিৰ প্ৰাক্তন সমন্বয়ক অৱসৰপ্ৰাপ্ত এচিএছ বিষয়া হিতেশ দেৱশৰ্মাৰ পুত্ৰ গীতাৰ্থ দেৱশৰ্মাৰ পুত্ৰয়েও ৰাকেশ পালৰ জৰিয়তে লাভ কৰিছিল অসম আৰক্ষী সেৱাৰ চাকৰি ৷
# কমল মেধিয়ে ৰাকেশ পালৰ পৰা ৩ লাখ টকা লোৱাৰ তথ্য প্ৰতিবেদনত অহাৰ পিছতে অখিল গগৈয়ে বিচাৰিছে স্পষ্টীকৰণ
বিপ্লৱ শৰ্মা তদন্ত আয়োগৰ প্ৰতিবেদনত কমল মেধিয়ে ৰাকেশ পালৰ পৰা ৩ লাখ টকা লোৱাৰ তথ্য প্ৰতিবেদনত অহাৰ পিছতে জাঙুৰ খাই উঠিছে ৰাইজৰ দলৰ সভাপতি অখিল গগৈ ৷ এই সন্দৰ্ভত সামাজিক মাধ্যমত প’ষ্ট কৰি গগৈয়ে উল্লেখ কৰে যে ‘কেলেংকাৰীৰ তদন্ত আয়োগৰ প্ৰতিবেদনৰ দ্বিতীয় খণ্ডৰ ৫০৭ পৃষ্ঠাত মোৰ নামত বৰ্তমানৰ বিজেপি নেতা কমল কুমাৰ মেধিয়ে ২০১৪ চনত ৩ লাখ টকা খোৱা বুলি ওলাইছে। এই ক্ষেত্ৰত কমল মেধিয়ে ৰাজহুৱাকৈ দিয়ক স্পষ্টীকৰণ।
