২০০১ ৰ পৰাই জালুকবাৰীত অপ্ৰতিৰোধ্য হৈ থকা মুখ্যমন্ত্ৰীয়ে ২৬ৰ বিধানসভা নিৰ্বাচনত মন মেলিছে উজনিৰ পৰা প্ৰতিদ্বন্দ্বিতা কৰিবলৈ । সমষ্টি সলনি কৰিবলৈ মুখ্যমন্ত্ৰীয়ে কৰা এই পৰিকল্পনাৰ কথা চেগা চোৰোকাকৈ কেবাবাৰো কৰি আহিছিল ৰাজহুৱাকৈ।
উল্লেখ্য যে, মুখ্যমন্ত্ৰীয়ে সমষ্টি সলনি কৰি উজনিৰ পৰা প্ৰতিদ্বন্দ্বিতা কৰাৰ বাবে মন মেলাৰ আঁৰত আছিল কেবাটাও কাৰণ।
উল্লেখযোগ্য যে, মুখ্যমন্ত্ৰীয়ে প্ৰথমে যোৰহাটৰ পৰা নিৰ্বাচনত প্ৰতিদ্বন্দ্বিতা কৰাৰ কথা ওলোৱাৰ পাছতেই নিজৰ আসন এৰি দিবলৈ সাজু হৈছিল যোৰহাটৰ বৰ্তমানৰ বিধায়ক হিতেন্দ্ৰনাথ গোস্বামী। কথা মতেই চলিছিল পৰিকল্পনা।
পিছে ২০২৪ত লোকসভা নিৰ্বাচনৰ ফলাফলে সিদ্ধান্ত সলনি কৰিবলৈ বাধ্য কৰালে মুখ্যমন্ত্ৰীক। কিয়নো ২০২৪ত লোকসভা নিৰ্বাচনত সৰ্ব শক্তি প্ৰয়োগ কৰাৰ পাছতো যোৰহাটত পৰাজিত হ’ল বিজেপি।
যোৰহাটৰ ৰাইজে প্ৰত্যাখ্যান কৰিলে মুখ্যমন্ত্ৰী হিমন্ত বিশ্ব শৰ্মাৰ ৰাজনীতিক।সকলো বাধা, মুখ্যমন্ত্ৰী তথা BJPৰ ৰণকৌশল ভেদ কৰি জয়লাভ কৰিলে গৌৰৱ গগৈয়ে। যোৰহাটৰ এই ফলাফলৰ পাছতেই মুখ্যমন্ত্ৰী হিমন্ত বিশ্ব শৰ্মাই যোৰহাটৰ পৰা ক্ৰমাৎ আঁতৰি আহি ব্যস্ত হৈ পৰে ডিব্ৰুগড়ত।
অসমৰ দ্বিতীয় ৰাজধানীৰ ৰূপত ডিব্ৰুগড়ক সজোৱাৰ কামত সম্প্ৰতি ব্যস্ত হৈ পৰিছে মুখ্যমন্ত্ৰী ।ডিব্ৰুগড়ত মুখ্যমন্ত্ৰীৰ এই সক্রিয়তাই ৰঙ দিছিল পঞ্চায়ত নিৰ্বাচনত। উজনীত ভাল ফল প্ৰদৰ্শন কৰিবলৈ সক্ষম হয় BJP দলে।
পিছে কথা বোৰ ভবাৰ দৰেই আগবঢ়িছিল যদিও আকৌ যেন লাগিল কেনা। পঞ্চায়ত নিৰ্বাচনৰ বিজয়ৰ আনন্দ উলাহ কৰাৰ আগতেই কংগ্ৰেছে ঘোষণা কৰিলে নতুন সভাপতি। গৌৰৱ গগৈক APCCৰ সভাপতিৰ দায়িত্ব অৰ্পণৰ পাছতেই আকৌ মুখ্যমন্ত্ৰীৰ অংকত লাগিল আউল।
গৌৰৱ গগৈ প্ৰদেশ কংগ্ৰেছৰ সভাপতি হোৱাৰ পাছতেই উজনিত কিছু পৰিমানে অনুকূল হৈ পৰিছে কংগ্ৰেছৰ বাবে ৰাজনীতি। আহোম জনগোষ্ঠীৰ নেতা হোৱাৰ লগতে লোকসভাত গৌৰৱ গগৈৰ ভূমিকা আৰু পিতৃ তৰুণ গগৈৰ প্ৰতি উজনিৰ লোকৰ মাজত থকা সদ ভাৱে কথাবোৰ পুনৰ নতুনকৈ ভাবিবলৈ বাধ্য কৰাইছে মুখ্যমন্ত্ৰী হিমন্ত বিশ্ব শৰ্মাক।
কিয়নো গৌৰৱ গগৈ সভাপতি হোৱাৰ পাছতেই উজনিত ৰাজনীতি সলনি হোৱাৰ আশংকা ব্যক্ত কৰিছে ৰাজনৈতিক বিশেষজ্ঞ সকলে। ইপিনে, উজনিত গৌৰৱ গগৈ বনাম হিমন্ত বিশ্ব শৰ্মাৰ যুঁজৰ বিপৰীতে বিজেপিৰ হাইকামণ্ডে যেন বিচাৰিছে উজনিত গৌৰৱৰ সন্মুখত মুখ্যমন্ত্ৰী হিমন্ত নহয় থাকক স্থানীয় সৰ্বানন্দ সোণোৱাল যাৰ বাবে গৌৰৱ গগৈ সভাপতি হোৱাৰ পাছতেই সক্ৰিয়তা বাঢ়িছে সোণোৱালৰ মুখ্যমন্ত্ৰীৰ সভা-সমিতি সমূহতো হঠাৎ উপস্থিতি দেখা গৈছে সোনোৱালৰ।
সঘনে সলনি হোৱা এনে ৰাজনৈতিক প্ৰেক্ষাপটত ২৬ত ডিব্ৰুগড়ত হিমন্ত বিশ্ব শৰ্মাই প্ৰতিদ্বন্দ্বিতা কৰাৰ যি আশা মনতে গোপনে পুহি ৰাখিছে সেয়া যেন সাৰ্থক হোৱাৰ সম্ভাৱনা নাই। তেনেস্থলত উজনিৰ নেতা হোৱাৰ মন মেলি প্ৰথমে যোৰহাট আৰু পাছত ডিব্ৰুগড়ত খোপনি পুতিবলৈ চেষ্টা চলাইয়ো মাজপথত থমকি ৰব লগীয়া হৈছে মুখ্যমন্ত্ৰী হিমন্ত বিশ্ব শৰ্মা।
তেনেস্থলত ২৬ত উজনিৰ পৰিবৰ্তে পুনৰবাৰ জালুকবাৰীৰ পৰাই নিৰ্বাচনত অৱৰ্তীন হোৱাৰ অধিক সম্ভাৱনা এতিয়া প্ৰকট হৈ পৰিছে মুখ্যমন্ত্ৰীৰ বাবে।
