Gaurav Gogoi:
মন্ত্রী জয়ন্ত মল্ল বৰুৱাৰ পত্নী জুলী ডেকা বৰুৱাই চৰকাৰী নীতি-নিয়ম সলনি কৰি গো-পালকৰ ৰাজসাহায্যৰ ধন আত্মসাৎ কৰাৰ গুৰুতৰ অভিযোগ উঠিছে। ইতিমধ্যে প্রাক্তন বিজেপি বিধায়ক তথা বৰ্তমানৰ কংগ্রেছ নেতা অশোক শর্মাই তথ্য দাঙি ধৰি কয় যে মন্ত্রী পত্নী হোৱাৰ সুবাদতে চৰকাৰী নীতি-নিয়ম সলনি কৰি নিজেই হিতাধিকাৰী হৈছে জুলী ডেকা বৰুৱা।
গো-পালকসকলৰ বাবে চৰকাৰে প্ৰদান কৰা ৫০ লাখ টকাৰ ৰাজসাহায্য আদায় কৰিছে মন্ত্রী পত্নীয়ে। অভিযোগ অনুসৰি, নিজকে দুগ্ধ ব্যৱসায়ী বুলি প্রতিপন্ন কৰি জয়ন্ত মল্ল বৰুৱাৰ পত্নীয়ে প্রকৃত গো-পালকসকলক ৰাজসাহায্য লাভৰ পৰা বঞ্চিত কৰিছে। প্রাক্তন বিধায়ক শর্মাই কয় যে পূর্বতে এই ধৰণৰ ৰাজসাহায্য ৰাজনৈতিক ব্যক্তিয়ে লাভ কৰাৰ ব্যৱস্থা নাছিল। সেয়েহে ৰাজসাহায্য নিয়মাৱলীৰ দুই আৰু তিনি নম্বৰ নিয়ম প্রত্যাহাৰ কৰি নিজ সুবিধা মতে মন্ত্ৰী বৰুৱাই পত্নীৰ ৰাজসাহায্য লাভৰ বাট মুকলি কৰিছে।
জুলী ডেকা বৰুৱাক ৰাজসাহায্য প্ৰদানৰ বাবে চৰকাৰী নীতিও সলনি কৰা হৈছে। এই সন্দর্ভত মুখ্যমন্ত্রী ড° হিমন্ত বিশ্ব শর্মাই কালি প্রতিক্রিয়া প্রকাশ কৰি কৈছিল যে আজি মন্ত্রী আছে কাইলৈ নাই, পৰিয়াল কিদৰে চলিব, কিবা এটা কৰি খাব লাগিব। মুখ্যমন্ত্ৰীৰ ভাষ্যক লৈ তীব্র প্রতিক্রিয়াৰো সৃষ্টি হৈছে।
এই সন্দৰ্ভত প্রতিক্রিয়া প্রকাশ কৰে অসম প্রদেশ কংগ্ৰেছ কমিটীৰ সভাপতি তথা লোকসভাৰ বিৰোধী উপ-দলপতি গৌৰৱ গগৈয়ে। তেওঁ কয় যে কৰদাতাৰ পুঁজিৰ পৰা এজন মন্ত্ৰীৰ ব্যক্তিগত দুগ্ধ পামৰ বাবে ৫০ লাখ টকা দিয়া হৈছে।
গৌৰৱে কয়, ‘এই কাণ্ডটোক সুৰক্ষা প্ৰদান কৰি মুখ্যমন্ত্ৰীয়ে নির্লজ্জভাৱে উত্তৰ দি কৈছে- ক্ষমতা হেৰুওৱাৰ পাছত তেওঁলোকে কি কৰিব।’ গৌৰৱে পুনৰ কয়, ‘এইখন চৰকাৰৰ ঘনিষ্ঠ লোকে অতিৰিক্ত সুবিধা লাভৰ এইটোৱেই প্রথম কাণ্ড নহয়। আনহাতে, যিসকলক প্ৰকৃততে চৰকাৰী সাহায্যৰ প্ৰয়োজন, যেনে প্রথম প্ৰজন্মৰ উদ্যোগী, ক্ষুদ্র কৃষক, দৰিদ্ৰ আৰু প্রান্তীয় লোকে ন্যায্যপ্রাপ্তিৰ বাবে সংগ্রাম কৰি থাকিবলগীয়া হৈছে। তেওঁলোকক উন্নীত কৰাৰ আঁচনিৰ পৰা বাদ দিয়া হৈছে। এয়া শাসন নহয়, পদবীক কৰা এক বিশ্বাসঘাতকতা। ব্যক্তিগত ভৱিষ্যৎ নিৰ্মাণৰ বাবে ৰাজহুৱা ধনৰ অপব্যৱহাৰ কৰা হৈছে আৰু ক্ষমতাক দায়বদ্ধতা হিচাপে গ্রহণ নকৰি অধিকাৰ হিচাপে গণ্য কৰা হৈছে।’
# মন্ত্ৰী-বিধায়কৰ পত্নীৰ ৰাজসাহায্য লাভ দুর্ভাগ্যজনক বিষয়
ৰাজ্যৰ ভয়াৱহ সমস্যাক আওকাণ কৰি বিজেপিৰ মন্ত্রী-বিধায়কৰ পত্নীক ৰাজসাহায্য প্ৰদান কৰা বুলি ক্ষোভ প্রকাশ কৰে জাতীয়-জনজাতীয় ঐক্যমঞ্চই। সোমবাৰে এক সংবাদমেলত ঐক্যমঞ্চৰ সভাপতি ৰাণাৰঞ্জন গগৈয়ে দুগ্ধপাম উৎপাদনৰ নামত মন্ত্রী জয়ন্ত মল্ল বৰুৱা আৰু বিধায়ক সিদ্ধার্থ ভট্টাচার্যৰ পত্নীয়ে ৫০ লাখ টকা ৰাজসাহায্য লাভ কৰাৰ বিষয়টোত তীব্র প্রতিক্রিয়া প্রকাশ কৰি কয়, ‘নিবনুৱা জড়িত অসমৰ মন্ত্ৰী-বিধায়কৰ পত্নীয়ে পাইছে চৰকাৰী ৰাজসাহায্য। ইফালে, মাহৰ পাছৰ মাহ ধৰি টে’ট শিক্ষকসকল দৰমহাৰ পৰা বঞ্চিত হ’বলগীয়া হৈছে।
ইপিনে, থলুৱা ঠিকাদাৰৰ বিল মোকলাই দিব পৰা নাই। এনে পৰিস্থিতিত মন্ত্রী-বিধায়ক পত্নীয়ে ৰাজসাহায্য লাভ কৰাটো দুর্ভাগ্যজনক। বিজেপিৰ কৰ্মী নোেহাৱা বাবে হেজাৰ হেজাৰ যোগ্য হিতাধিকাৰীৰ নাম অৰুণোদয় আঁচনিৰ তালিকাৰ পৰা কৰ্তন কৰা হৈছে। অযোগ্য লোকেও অৰুণোদয় আঁচনিৰ সুবিধা লাভ কৰিছে।’ ঐক্যমঞ্চৰ সাধাৰণ সম্পাদক বিতুপন দুৱৰাই কয়, ‘সাম্প্রতিক সময়ত মন্ত্ৰীৰ ঘৰ চলিবলৈ ৫০ লাখ টকা আৰু সাধাৰণ মানুহৰ বাবে দিয়া হয় ১২৫০ টকা। নিবনুৱাক সংস্থাপন দিয়াৰ কথা কোৱা চৰকাৰে মন্ত্ৰীৰ ঘৰৰ সংস্থাপনতহে গুৰুত্ব দিছে। সাধাৰণ মানুহৰ ওপৰত কৰৰ বোজা জাঁপি দি মন্ত্রী-বিধায়কৰ অঙহী-বঙহীক ৰাজসাহায্য প্রদান কৰিছে।
ইফালে, ডিব্ৰুগড়ত উৰণীয়া সেতু নিৰ্মাণৰ নামত ক্ষতিগ্রস্ত পৰিয়ালক ক্ষতিপূৰণ আদায় দিব পৰা নাই। অথচ মন্ত্রী-বিধায়কৰ পত্নীয়ে লাখ লাখ টকাৰ ৰাজসাহায্য পাইছে।’ এই সকলোবোৰৰ তদন্ত কৰিবলৈ কেন্দ্ৰীয় চৰকাৰক দাবী জনায় ঐক্যমঞ্চই।
