Dr. Tara prasad Das:
ব্যক্তিগত লাভালাভৰ অংকৰে ৰাজ্যৰ একাংশ লোকে জালিয়াতিৰে জাতিগত প্রমাণপত্র সংগ্রহ প্রমাণিত হৈছে। তদুপৰি কে’বাজনো অধ্যাপক, চিকিৎসক, চৰকাৰী শীর্ষ বিষয়া আদিব বিৰুদ্ধে তদন্তও অব্যাহত আছে। শেহতীয়াকৈ অভিযোগৰ তালিকাত নাম সাঙোৰ খাইছে প্রাক্তন বিধায়ক তথা অসম লোকসেৱা আয়োগৰ বিতর্কিত প্রাক্তন অধ্যক্ষ ডাঃ তাৰাপ্রসাদ দাসৰ।
যোৱা ২৬ মে’ত ডাঃ দাসে জাতিগত প্রমাণপত্র লাভ কৰিবলৈ সক্ষম হয়। এই সন্দৰ্ভত অনুসূচিত জাতি, সংগ্ৰামী যুৱ পৰিষদৰ নেতৃবৃন্দই অভিযোগ কৰে যে অসম চৰকাৰে নতুনকৈ প্ৰৱৰ্তন কৰা জাতিগত প্রমাণপত্র মিছন ভূমিপুত্ৰ এপছৰ জৰিয়তে জালিয়াতিৰে এই প্ৰমাণপত্ৰ লাভ কৰিবলৈ সক্ষম হয়। সংগঠনটোৰ সভাপতি সঞ্জীৱ দাসে কয় যে ডাঃ দাসৰ পূৰ্বৰ ঘৰ হ’ল বৰপেটা চহৰৰ ৰংপুৰহাটীত। চৰকাৰী তথ্য মতে, ৰংপুৰহাটীত নমূঃশূদ্র উপ-জাতিৰ কোনো লোক পূর্বেও নাছিল আৰু এতিয়াও নাই।
অথচ ১৯৭৯ৰ ছয় আগষ্টত সংৰক্ষণৰ সুবিধা ল’বলৈ ডাঃ দাসে জাতিগত প্ৰমাণপত্ৰ সংগ্ৰহ কৰিছিল। অৰ্থাৎ ইয়াৰ পাছত যোৱা ২৬ মে’ত ৰহস্যজনকভাৱে দ্বিতীয়বাৰলৈ ডাঃ দাসে জাতিগত প্রমাণপত্র সংগ্ৰহ কৰে। অথচ তাৰ পূৰ্বে ১৯৭২ত তেওঁ সাধাৰণ শ্ৰেণীৰ লোক হিচাপে গুৱাহাটী চিকিৎসা মহাবিদ্যালয়ৰ পৰা এমবিবিএছ ডিগ্রী লৈছিল। ২০০১, ২০০৬ আৰু ২০১১ত তেওঁ সৰুক্ষেত্ৰী সমষ্টিৰ পৰা বিধানসভা নিৰ্বাচনত প্ৰতিদ্বন্দ্বিতাৰ সময়তো মনোনয়নৰ স’তে গাঁঠি দিয়া নথিত অনুসূচিত জাতিৰ লোক বুলি উল্লেখ কৰা নাছিল।
সভাপতি সঞ্জীৱ দাসে কয়, ‘বিধায়ক হোৱাৰ স্বাৰ্থতে আৰু চাকৰিৰ সুবিধা আদায়ৰ বাবে ডাঃ দাসে দুবাৰ জাতিগত প্রমাণপত্র উলিয়াবলৈ সক্ষম হোৱাটো ৰহস্যজনক। তেওঁ যে জালিয়াতিৰেই সকলো কৰি আহিছে, সেয়া আধাৰকাৰ্ডৰ তথ্যয়ো প্ৰমাণ কৰে। আধাৰকাৰ্ডৰ তথ্য মতে, ডাঃ দাসৰ জন্ম ,তাৰিখ হ’ল ১৯৫৮ৰ পহিলা ছেপ্টেম্বৰ। নির্বাচন আয়োগত জমা দিয়া তথ্য মতে তথা এডিআৰৰ প্ৰতিবেদনতো উল্লেখ আছে যে তেওঁ ১৯৬৪ত বৰপেটা উচ্চতৰ মাধ্যমিক বিদ্যালয়ৰ পৰা উচ্চতৰ মাধ্যমিক পৰীক্ষা আৰু ১৯৭২ত এমবিবিএছ উত্তীর্ণ হৈছিল।
ইয়াৰ পৰা দেখা যায় যে তেওঁ ছবছৰ বয়সতে উচ্চতৰ মাধ্যমিক আৰু ১৪ বছৰত এমবিবিএছ ডিগ্রী আহৰণ কৰিছিল। এনে ভয়ংকৰ জালিয়াতিৰ আশ্রয় লোৱা ডাঃ দাসে জাতিগত প্রমাণপত্রতো একে জালিয়াতি সংঘটিত কৰিছে। আমি তেওঁক অনুসূচিত জাতিৰ লোক বুলি প্ৰমাণ ৰাজহুৱা কৰিবলৈ প্ৰত্যাহ্বান জনাইছো। নিজকে হঠাৎ অনুসূচিত জাতিৰ লোক বুলি এজন লোকে প্রমাণপত্র উলিয়াবলৈ সক্ষম হৈছে
মানে, কাইলৈ বাংলাদেশী অনুপ্ৰৱেশকাৰী এজনেও একে পন্থাৰে এনে প্ৰমাণপত্ৰ উলিয়াব পৰাটো নিশ্চিত। অসম লোকসেৱা আয়োগৰ কেলেংকাৰিৰ নায়ক ডাঃ দাসৰ জাতিগত প্ৰমাণপত্ৰ তদন্তৰ আমি দাবী জনাইছো।’ উচ্চতম ন্যায়ালয়ৰ নিৰ্দেশনা অনুসৰি, অসম চৰকাৰৰ দ্বাৰা গঠিত ৰাজ্যিক পৰ্যায়ৰ জাতিগত প্ৰমাণপত্ৰ পুনৰীক্ষণ সমিতিৰ দ্বাৰা ইয়াৰ তদন্ত কৰি আইনী ব্যৱস্থা গ্রহণ কৰিবলৈ দাবী জনায়।
প্রসংগক্রমে সভাপতি দাসে উল্লেখ কৰে যে অসমৰ শশ অনা-অনুসূচিত জাতিৰ লোকে জাতিগত প্ৰমাণপত্ৰৰ জৰিয়তে বিভিন্ন ধৰণৰ সংৰক্ষণৰ সুবিধা গ্ৰহণ কৰি আহিছে। তেনে কে’বাজনৰো বিৰুদ্ধে সম্প্রতি তদন্ত অব্যাহত আছে। ইয়াৰ উদাহৰণ হিচাপে গুৱাহাটী বিশ্ববিদ্যালয়ৰ অধ্যাপিকা দীপামণি বৰুৱা দাস, টংলা চিভিল হাস্পতালৰ চিকিৎসক বিশ্বজিৎ ওজা, সহকাৰী অভিযন্তা গোপাল দাস, মাজবাট মহাবিদ্যালয়ৰ প্রবক্তা ৰিংকুমণি দাসৰ বিৰুদ্ধে তদন্ত আৰম্ভ হৈছে বুলি সভাপতি দাসে সদৰী কৰে।