Cassino :
বিশ্বৰ বিখ্যাত ৰাজসিক জুৱা তথা অসমত নিষিদ্ধ ‘কেচিন‘ এই গুৱাহাটী মহানগৰীতে চলিছে অবাধে। মহানগৰীৰ সোণাপুৰ আৰক্ষীয়ে মঙলবাৰে অঞ্চলটোৰ এখন বিলাসী ৰিজ’ৰ্টত অতর্কিতে তালাটী চলাই সততে হলিউদ-বলিউডৰ ছবিত দেখিবলৈ পোৱা কেচিন’ জুৱাৰ এটা ঘাটি উৎখাত কৰে। সোণাপুৰৰ কমাৰকুছিস্থিত বিলাসী ৰিজ’ৰ্ট ‘ক্লাব নির্ভানা’ত গোপন খবৰৰ ভিত্তিত চলা এই-তালাচীত আৰক্ষীয়ে বহিঃৰাজ্যৰ চাৰিজন জুৱাৰীক গ্ৰেপ্তাৰ কৰাৰ লগতে ৰিজ’ৰ্টখনৰ সঞ্চালক দম্পতীসহ তিনিজনক আটক কৰি অধিক তথ্যৰ সন্ধানত জেৰা অব্যাহত ৰাখিছে।
ধৃত জুৱাৰীকেইজন ক্রমে মিজোৰামৰ আইজলৰ লালচানহিমা চাইল’ (৩৫), লালফকাৱামা বাল’টে (২৮), লালবিং হেটা (৩৫) আৰু যোছেফ লালপাৰমাবিআ (২৮) বুলি সোণাপুৰ আৰক্ষী থানাৰ ভাৰপ্রাপ্ত বিষয়া মনোজ বৰুৱাই সদৰী কৰিছে। একেদৰে আটকাধীন কেইজন হৈছে ৰিজটখনৰ স্বত্বাধিকাৰী পৱন শৰ্মাৰ জীয়ৰী তথা সঞ্চালক জ্যোতি শৰ্মা (৩১), তেওঁৰ স্বামী অভিষেক শর্মা (৩১) আৰু দীপক শর্মা (৫০)।
উল্লেখ্য যে এই অভিযানত আৰক্ষীয়ে ধৃতসকলৰ জিম্মাৰ পৰা জুৱাত ব্যৱহৃত ২১০টা কেচিন’, নগদ ধন, প’কাৰ মুদ্রা, কেলকুলেটৰ, বিভিন্ন ব্ৰেণ্ডৰ বিলাসী সুৰাৰ বটল, তিনিটা ম’বাইল ফোন, মানিবেগৰ লগতে বহু আপত্তিজনক সামগ্রী জব্দ কৰিছে।
ইফালে, এই জুৱাত কোটি কোটি টকাৰ লেনদেন হোৱাৰ তথ্য লাভ কৰিছে আৰক্ষীয়ে আৰু এই সন্দর্ভত তদন্ত আগবঢ়াই নিছে। উল্লেখ্য যে যোবা ন জুলাইত ধৃত জুৱাৰীকেইজনে ‘ক্লাব নির্ভানা’ ৰিজ’ৰ্টৰ পাঁচটাকৈ বিলাসী কোঠা বুকিং কৰাৰ তথ্য লাভ কৰিছে আৰক্ষীয়ে। বিশেষকৈ নিশাৰ ভাগত এই কোঠাসমূহত চলে সুৰা আৰু জুৱাৰ ৰঙীন আড্ডা। এই আড্ডাত গুৱাহাটীৰ বহুকেইজন প্রতিষ্ঠিত ব্যৱসায়ীৰ লগতে ৰাজ্যৰ বিভিন্ন স্থানৰ আঢ্যৱস্তু লোকে অংশগ্রহণ কৰি আহিছে।
কিছুদিন ধৰি বৃহৎ জুৱাৰ আড্ডা চলিছিল আৰু অসমৰ লগতে পূব গুৱাহাটী আৰক্ষী জিলাৰ উপ-আয়ুক্ত মৃণাল ডেকাই সংবাদ মাধ্যমৰ আগত সদৰী কৰা অনুসৰি, ৰিজ’টখনত বহিঃৰাজ্যৰ বহু অভিজাত তথা নামী-দামী লোকে ৰিজ’টখনত বাহৰ পাতি এই জুৱাত অংশগ্ৰহণ কৰিছিল, য’ত কোটি কোটি টকাৰ লেনদেন হৈছিল। অৱশ্যে অভিযানত এই জুৱাত অংশগ্রহণ কৰা প্রতিষ্ঠিত লোকসকল জালত নপৰিল আৰু সম্প্রতি আৰক্ষীয়ে ৰিজ’টখনৰ চিচিটিভি পৰীক্ষা কৰি অংশগ্ৰহণকাৰী জুৱাৰীৰ এখন দীঘলীয়া তালিকা প্রস্তুত কৰিছে।
কিন্তু ধনৱন্ত এইসকল জুৱাৰীক আৰক্ষীয়ে জালত পেলাবলৈ সক্ষম হ’ব নে নাই, সেয়া অনাগত দিনতহে স্পষ্ট হ’ব। উল্লেখ্য যে নির্ভানা ৰিজ’ৰ্টৰ বিৰুদ্ধে বিভিন্ন সময়ত এনে অভিযোগ উত্থাপিত হৈ আহিছে। এনে অভিযোগত নাম সাঙোৰ খালেও অদৃশ্য শক্তিৰ বলত প্রতিবাৰে ৰিজ’ৰ্টখন সাৰি যায়। পৱন শর্মা মালিকানাধীন ৰিজ’ৰ্টখনে বিভিন্ন পক্ষক মেনেজ কৰি অহাৰো অভিযোগ আছে।
উল্লেখ্য যে এই ঘটনাত যদি আৰক্ষীয়ে হেঁচা লাভ নকৰে তথা নিৰপেক্ষ আৰু বাধাহীনভাৱে আৰক্ষীৰ তদন্ত আগবাঢ়ি যায়, জুৱাৰ লগত জড়িত বহু প্রখ্যাত লোক পোহৰলৈ অহাৰ সম্ভাৱনা প্রকট হৈ পৰিছে। আনহাতে, জেৰাত ধৃত জুৱাৰী কেইজনে বহু নামী-দামী লোকৰ নাম প্রকাশ কৰিছে। আনহাতে আৰক্ষীয়ে প্রাথমিক তদন্তত লাভ কৰা তথ্য’ অনুসৰি, ৰিজ’ট ক্লাব নির্ভানাৰ কেচিন’ জুৱাৰ নেতৃত্বত আছিল শিলিগুৰিৰ যুগল শেঠী নামৰ লোকজন।
এই জুৱাত অসম, মেঘালয়, অৰুণাচল আৰু মিজোৰামৰ অর্ধশতাধিক লোকে অংশ লয়, য’ত গুৱাহাটীৰ ১৫জনৰো অধিক অসমীয়া আৰু মাৰোৱাৰী সম্প্রদায়ৰ প্রতিষ্ঠিত ব্যৱসায়ী আছে। একেদৰে যোৰাবাটৰ এখন বিলাসী হোটেলতো মনোজ শেঠী নামৰ লোকজনৰ নেতৃত্বত কেচিন’ জুৱা চলাব তথ্য পোহৰলৈ আহিছে। সম্প্রতি আৰক্ষীয়ে তদন্ত অব্যাহত ৰাখিছে।
