Amit Shah:✒️কেন্দ্রীয় গৃহ মন্ত্রী অমিত শ্বাহে উত্থাপন কৰা মাওবাদীৰ সমৰ্থকৰ অভিযোগৰ প্ৰত্যুত্তৰ দিলে বিৰোধী ‘ইণ্ডিয়া’ৰ উপ-ৰাষ্ট্ৰপতি পদৰ প্রার্থী উচ্চতম ন্যায়ালয়ৰ প্ৰাক্তন উচ্চতম ন্যায়ালয়ৰ ন্যায়াধীশ বি সুদর্শন ৰেড্ডীয়ে। উল্লেখ্য যে মাওবাদীৰ বিৰুদ্ধে যুঁজত পূর্বে চৰকাৰে জনজাতি যুৱকক বিশেষ আৰক্ষী বিষয়াৰূপে নিয়োজিত কৰা কাৰ্য ২০১১ৰ জুলাইত নিষিদ্ধ কৰে উচ্চতম ন্যায়ালয়ৰ এখন দুজনীয়া বিচাৰপীঠে।
এই দুজনীয়া বিচাৰপীঠৰ অন্যতম বিচাৰপতি আছিল ন্যায়াধীশ ৰেড্ডী। পীঠখনৰ আনগৰাকী বিচাৰপতি আছিল ন্যায়াধীশ এছ এছ নিজ্জাৰ। চৰকাৰে জনজাতি যুৱকসকলক ‘ছালৱা জুডুম’ নামৰ বাহিনীৰ অধীনত বিশেষ আৰক্ষী বিষয়াৰূপে নিয়োগ কৰি মাওবাদী বিৰোধী যুঁজত নিয়োজিত কৰে।
এই বাহিনীক অবৈধ আৰু অসাংবিধানিক আখ্যা দি উক্ত বিচাৰপীঠে নিষিদ্ধ কৰে। এই ৰায়ৰ কথা উল্লেখ কৰি গৃহমন্ত্রী শ্বাহে ‘ইণ্ডিয়া’ৰ উপ-ৰাষ্ট্ৰপতি প্রার্থীজনক মাওবাদীৰ সমৰ্থক আখ্যা দি সমালোচনা কৰে। শ্বাহৰ এই আক্ৰমণৰ প্ৰত্যুত্তৰ দিয়ে প্রাক্তন ন্যায়াধীশ ৰেড্ডীয়ে। ৰেড্ডীয়ে কয়, ‘তেওঁ সম্পূর্ণ বায়টো পড়া হ’লে এই মন্তব্য নকৰিলেহেঁতেন।’
উক্ত ৰায় তেওঁ নহয়, উচ্চতম ন্যায়ালয়ৰ আছিল বুলিও অৱসৰপ্ৰাপ্ত বিচাৰপতিজনে মন্তব্য কৰে। লগতে তেওঁ কয়, ‘ভাৰতৰ গৃহমন্ত্ৰীৰ স’তে, (যাৰ দায়িত্ব আৰু বাধ্যবাধকতা হৈছে আদৰ্শৰ পার্থক্য নির্বিশেষে প্রতিজন নাগৰিকৰ জীৱন, স্বাধীনতা আৰু সম্পত্তি ৰক্ষা কৰা) পোনপটীয়াভাবে এটা বিষয়ত লিপ্ত নহওঁ। ৰায়টো মোৰ নহয়, উচ্চতম ন্যায়ালয়ৰহে।’
ৰেড্ডীয়ে লগতে কয় যে তেওঁ সমসাময়িকসকলৰ পৰা শিকিছে যে নিজৰ ৰায়ৰ গুণক লৈ নিজে মন্তব্য কৰিব নালাগে। ইয়াৰ বাছ-বিচাৰৰ দায়িত্ব জনতাক দিব লাগে। কোনো ৰায় তেওঁৰ ব্যক্তিগত নথি নহয় বুলিও ৰেড্ডীয়ে মন্তব্য কৰে। লগতে তেওঁ কয় যে আনৰ পৰা ব্যাখ্যা শুনাতকৈ গৃহ মন্ত্রীয়ে নিজে সম্পূৰ্ণ ৰায়টো পঢ়িব পাৰিলেহেঁতেন।
‘প্রায় ৪০ পৃষ্ঠাৰ এই ৰায় পঢ়াৰ বাবে তেওঁ সম্ভবতঃ সময় নাপালে। যদি তেওঁ ৰায়টো পঢ়িলেহেঁতেন, সম্ভৱতঃ তেওঁ এনে মন্তব্য নকৰিলেহেঁতেন। এই ক্ষেত্রত ইয়াতকৈ মোৰ ক’বলৈ একো নাই। বিষয়টো মই ইয়াতে এৰিলো।’
ৰেড্ডীয়ে এইদৰে কয়। উল্লেখ্য যে গৃহমন্ত্রী শ্বাহে অভিযোগ কৰে যে প্ৰাক্তন ন্যায়াধীশ ৰেড্ডীয়ে ছালৱা জুড়ুম নিষিদ্ধ কৰি মাওবাদীক সমর্থন নকৰাহেঁতেন ২০২০ৰ ভিতৰতে দেশত মাও সন্ত্রাসবাদ নিঃশেষ হ’লহেঁতেন।
