Aaranyak Awards Announced:আৰণ্যকৰ “তৃণমূল সংৰক্ষণ বঁটা ২০২৫” বিজয়ীসকলৰ নাম ঘোষণা

দেশৰ অগ্ৰণী, গৱেষণা চালিত জৈৱ বৈচিত্ৰ্য সংৰক্ষণ সংস্থা আৰণ্যকে ইয়াৰ ৩৫ তম বাৰ্ষিকীৰ বছৰজোৰা উদযাপনৰ অংশহিচাপে আগবঢ়োৱা “তৃণমূল সংৰক্ষণ বঁটা ২০২৫” প্ৰাপকসকলৰ নাম ঘোষণা কৰিছে ।

গাইগুটীয়া আৰু গোট ৷ এই দুটা শিতানত প্ৰদান কৰিবলগা বঁটাৰ বাবে বাছনি কৰাসকলৰ নাম বিভিন্ন ক্ষেত্ৰৰ বিশিষ্ট ব্যক্তিৰে গঠিত এখন পাঁচজনীয়া জুৰীয়ে চূড়ান্ত কৰিছে বুলি আৰণ্যকৰ “তৃণমূল সংৰক্ষণ বঁটা” উপ- সমিটিৰ আহ্বায়ক, জ্যেষ্ঠ সংৰক্ষণ জীৱবিজ্ঞানী তথা সংস্থাটোৰ সহকাৰী সঞ্চালক ড: দীপাংকৰ লহকৰে জনাইছে ।

দুয়োটা শিতানৰ বিজয়ীসকলক নগদ ধন আৰু প্ৰশস্তি পত্ৰৰে সন্মানিত কৰা হ’ব আৰু জুৰীয়ে “বিশেষ উল্লেখ” হিচাপে বাছনি কৰাসকলক অহা ৯ ছেপ্টেম্বৰত হ’বলগীয়া বঁটা প্ৰদান অনুষ্ঠানত সম্বৰ্ধনা জ্ঞাপন কৰা হ’ব ।

গাইগুটীয়া শিতানৰ বঁটা ৷ কামৰূপ (মহনগৰ) জিলাৰ লখন টেৰণলৈ প্ৰয়াত মেহেৰুণ নেছা সোঁৱৰণী তৃণমূল সংৰক্ষণ বঁটা আগবঢ়োৱা হৈছে । নলবাৰী জিলাৰ ধ্ৰুৱজ্যোতি কলিতাক এই বঁটাৰ অধীনত জুৰীৰ “বিশেষ উল্লেখ” হিচাপে সম্বৰ্ধনাৰ বাবে বাছনি কৰা হৈছে । কামৰূপ (মহনগৰ) জিলাৰ অৰূপ শাণ্ডিল্যলৈ প্ৰয়াত অনন্ত বৰা সোঁৱৰণী তৃণমূল সংৰক্ষণ বঁটা আগবঢ়োৱা হৈছে ।

তিনিচুকীয়া জিলাৰ মৃদুপৱন ফুকন আৰু কামৰূপ (মহানগৰ)জিলাৰ প্ৰমোদ কলিতাক এই বঁটাৰ অধীনত জুৰীৰ “বিশেষ উল্লেখ” হিচাপে সম্বৰ্ধনাৰ বাবে বাছনি কৰা হৈছে । বাকসা জিলাৰ প্ৰাঞ্জল তালুকদাৰ আৰু কোকৰাঝাৰ জিলাৰ টুনু বসুমতাৰীলৈ যুটীয়াভাৱে প্ৰয়াত ছেলিনা চুলতানা সোঁৱৰণী তৃণমূল সংৰক্ষণ বঁটা আগবঢ়োৱা হৈছে ।

নলবাৰী জিলাৰ ৰাজেশ দত্ত বৰুৱা আৰু কামৰূপ (মহানগৰ)জিলাৰ পৰিনীতা সিঙক এই বঁটাৰ অধীনত জুৰীৰ “বিশেষ উল্লেখ” হিচাপে সম্বৰ্ধনাৰ বাবে বাছনি কৰা হৈছে ।

গোট শিতানৰ বঁটা ৷ নগালেণ্ডৰ খনমা প্ৰকৃতি সংৰক্ষণ আৰু ট্ৰাগোপন অভয়াৰণ্য (KNCTS)লৈ প্ৰয়াত বিপুল দাস সোঁৱৰণী তৃণমূল সংৰক্ষণ বঁটা আগবঢ়োৱা হৈছে । ওদালগুৰি জিলাৰ ধনশিৰি চিকাৰীডাঙা যুটীয়া বন ব্যৱস্থাপনা সমিতি (জে এফ এম চি) আৰু কামৰূপ (মহানগৰ) জিলাৰ “কুম্ভী কাগজ”ক এই বঁটাৰ অধীনত জুৰীৰ “বিশেষ উল্লেখ” হিচাপে সম্বৰ্ধনাৰ বাবে বাছনি কৰা হৈছে ।

এই বঁটাৰ জুৰী সদস্যসকল আছিল ক্ৰমে ‌ অসম বিজ্ঞান প্ৰযুক্তিবিদ্যা আৰু পৰিৱেশ পৰিষদৰ সঞ্চালক ড: জয়দীপ বৰুৱা; অসম চৰকাৰৰ প্ৰাক্তন বন সংৰক্ষক নাৰায়ণ মহন্ত; প্ৰখ্যাত সাংবাদিক প্ৰণয় বৰদলৈ; প্ৰখ্যাত সংৰক্ষণ বিজ্ঞানী আৰু আৰণ্যকৰ কাৰ্যবাহী সঞ্চালক ড: বিভৱ কুমাৰ তালুকদাৰ আৰু আন এগৰাকী যশস্বী সংৰক্ষণ বিজ্ঞানী আৰু আৰণ্যকৰ অন্যতম সঞ্চালক ড: এম ফিৰোজ আহমেদ ।