Child death:✒️অৰাজকতাই চৌদিশ গ্ৰাস কৰা অসমত সম্প্ৰতি মূল্যহীন হৈ পৰিছে চৰকাৰী নির্দেশনা। বহু সময়ত ৰাইজৰ ক্ষোভপ্রশমিত কৰিবলৈ তাৎক্ষণিকভাবে এনে কেতবোৰ নিৰ্দেশনা চৰকাৰীভাৱে দিয়া হয়, যিবোৰ ফুটুকাৰ ফেনত পৰিণত হয়।
এই ধৰণৰ ব্যৱস্থাৰ পৰিণতিতে অতি দুর্ভাগ্যজনকভাবে খেলি থকা অৱস্থাতে ঘৰৰ সম্মুখৰ নির্মীয়মাণ পদপথৰ উন্মুক্ত অংশৰে নলাত সৰি পৰি এটি নিষ্পাপ শিশুৱে মহানগৰীত কালি প্রাণ হেৰুৱায়।
উল্লেখ্য যে এই ধৰণৰ কে’বাটাও ঘটনা ইতিপূর্বে মহানগৰীত সংঘটিত হৈছে। ২০২৩ত গণেশগুৰিত সুৰক্ষা ব্যৱস্থা গ্রহণ নকৰাকৈ নলা নিৰ্মাণৰ বাবে খন্দা গাঁতত এখন দুচকীয়া বাহন বাগৰি পৰিছিল আৰু সেই বাহনখনত উঠি যোৱা এগৰাকী ছাত্রী উফৰি গৈ ৰাজপথত পৰিছিল। তেতিয়াই ছাত্ৰীগৰাকীৰ মূৰৰ ওপৰৰে এখন স্কুল বাছৰ চকা পাৰ হৈ গৈছিল। ২০২৪তো পদপথৰ নলাৰ উন্মুক্ত অংশৰে অবিনাশ সৰকাৰ নামৰ এটি আঠ বছৰীয়া শিশু নলাত সৰি পৰিছিল।
তিনি দিনৰ মূৰত শিশুটিৰ মৃতদেহ ঘটনাস্থলীৰ পৰা কে’বা কিলোমিটাৰ নিলগত উদ্ধাৰ হৈছিল। এয়া মাত্র দুটাহে উদাহৰণ। এই দুটা ঘটনাৰ পাছত নলা নিৰ্মাণৰ সময়ত সম্পূর্ণ সুৰক্ষা ব্যৱস্থা গ্রহণ কৰিবলৈ স্বয়ং মুখ্যমন্ত্রীয়ে নির্দেশ দিছিল। সেই নির্দেশ তেনেই এটা সাময়িক কৌশলহে আছিল।
সেই কথাই প্রমাণিত কৰি মহানগৰীৰ আৰ্যনগৰত সুনিত কুমাৰ শ্বাহ নামৰ শিশুটিয়ে কালি করুণ মৃত্যুক সাবটি লয়। কালাপাহাৰ অঞ্চলত উৰণ সেতু আৰু নলা নিৰ্মাণ কৰি থকা ঠিকাদাৰী প্রতিষ্ঠানে যি মইমতালিবে অব্যাহত ৰাখিছে, তাৰেই পৰিণামত এই ঘটনা সংঘটিত হয়।
এই ঘটনাটোক লৈ আজিও মুখ্যমন্ত্রী ড° হিমন্ত বিশ্ব শর্মাৰ এক ঘোষণাই কৌতূহলৰ সৃষ্টি কৰে। মুখ্যমন্ত্রী ড° শর্মাই কয়, ‘মই আজি মুখ্য সচিবক নির্দেশ দিছো। নলা-নর্দমাসমূহ ক’ত ক’ত উন্মুক্ত হৈ আছে, ছেটেলাইটৰে চাবলৈ দিছো। নলা উন্মুক্ত হৈ থাকিলে আমি ব্যৱস্থা গ্রহণ কৰিম।’
মুখ্যমন্ত্রীয়ে লগতে কয় যে একাংশ স্থানত নলাত সংস্থাপন কৰা শ্লেব চুৰিও হৈছে। গতিকে ইয়াত সামাজিক সমস্যাও জড়িত আছে। চুৰিৰ দৰে আইন-শৃংখলাৰ স’তে জড়িত বিষয়ক কেবল ৰাইজক বিপথে পৰিচালিত কৰিবলৈকে সামাজিক সমস্যা আখ্যা দিয়াৰ অপচেষ্টা চলোৱা হৈছে বুলি চর্চিত হৈছে।
সম্প্ৰতিৰ ঘটনাটো এক হত্যাকাণ্ড বুলিও স্থানীয় ৰাইজে অভিযোগ কৰে। কাৰণ সেতুৰ লগতে নলা নির্মাণ কার্য অতি বিপজ্জনকভারে চলাই থকা হৈছে। নিশাৰ কথা বাদেই, দিনতেই মানুহ নির্মীয়মাণ পদপথৰে খোজ কাঢ়ি যোৱাটো অতি বিপজ্জনক হৈ পৰিছে। কোনো ধৰণৰ সুৰক্ষা ব্যৱস্থা গ্রহণ নকৰাকৈ এই কাম কৰি অহা হৈছে। প্রশাসনো অস্তিত্বহীন।
পৌৰ নিগমৰ স্থানীয় পাৰিষদৰ পৰা আৰম্ভ কৰি আৰক্ষী, জিলা প্রশাসনৰ প্ৰতিনিধি কোনেও এই ধৰণৰ বিপজ্জনক পৰিৱেশক ন্যূনতমো গুৰুত্ব দিয়া নাই। স্থানীয় ৰাইজে ইয়াৰ বিৰুদ্ধে বিভিন্ন সময়ত অভিযোগ উত্থাপন কৰি আহিছে। তেনে অভিযোগ অৰণ্যৰোদনত পৰিণত হৈছে।
গতিকে নিজৰ ঘৰৰ সন্মুখত খেলি থকা অবস্থাত কালি যিদবে শিশুটিয়ে প্রাণ হেৰুৱালে, সেয়া প্ৰকাৰান্তৰে এক হত্যা বুলি ৰাইজে অভিযোগ উত্থাপন কৰে। কালিৰ ঘটনাটোক লৈ স্থানীয় বহু লোকে আজি প্রতিবাদ সাব্যস্ত কৰে। ইয়াৰ ফলত আজি পুৱা দীর্ঘ সময় ব্যস্ত এ কে আজাদ ৰোড সম্পূর্ণরূপে বন্ধ হৈ পৰে।
ৰাইজে কৰা পথ অৱৰোধত আৰক্ষীও দৌৰি আহে। নানান কূট কৌশলৰে আৰক্ষীয়ে পথ অৱৰোধ প্রত্যাহাৰ কৰিবলৈ ৰাইজক বাধ্য কৰায়। পথ অৱৰোধক লৈ আৰক্ষী ঘটনাস্থলীত উপস্থিত হোৱাৰ বিপৰীতে কালিৰে পৰা দুৰ্ভগীয়া পৰিয়ালটোৰ ওচৰত কোনো থিয় হোৱা নাই।
প্রশাসনৰ লোক, স্থানীয় জনপ্রতিনিধি, ঠিকাদাৰী প্রতিষ্ঠানটোৰ প্ৰতিনিধি, কাৰো ওচৰত শিশুটি হেৰাই যোৱা ঘটনাটোৰ মূল্য নাই। আৰ্যনগৰৰ বাসিন্দা ব্যৱসায়ী অজয় দাসে কয়, ‘উৰণ সেতু আৰু পদপথ নিৰ্মাণৰ নামত আমাৰ গোটেই অঞ্চলটোত এক ভয়ংকৰ পৰিৱেশৰ সৃষ্টি কৰা হৈছে।
কোনো ধৰণৰ সুৰক্ষা ব্যৱস্থা গ্রহণ নকৰাকৈ নির্মাণকার্য চলাই থকা হৈছে। সাধাৰণ ৰাইজৰ প্রতি কাৰো দায়িত্ব নাই। তেওঁলোকৰ বেপৰোৱা কাৰ্যৰ পৰিণাম কি হ’ব পাৰে, তাৰ প্ৰতি ন্যূনতমো গুৰুত্ব নাই। পদপথত যেনি-তেনি লোহা ওলাই আছে। সেইবোৰত লাগি বহু লোক আঘাতপ্রাপ্ত হৈছে। আমাৰ ৰাইজে নির্মাণৰ দায়িত্বত থকাসকলক এই বিষয়ে বহুবাৰ অভিযোগ দিছে; অথচ অভিযোগৰ প্ৰতি কোনো গুৰুত্ব নাই। শেষত কালি এটা জীবনেই শেষ হৈ গ’ল। তাৰ পাছতো যেন কাৰোৰেই দায়িত্ব নাই। মুঠতে এক অৰাজক পৰিস্থিতি হৈছে। সেইবাবে কালি ৰাইজে পথ অৱৰোধ কৰি প্ৰতিবাদ সাব্যস্ত কৰিবলৈ বাধ্য হয়।’
বুধবাৰে ঘটনা সংঘটিত হোৱা অংশটোকে ধৰি পদপথটোত ২০টা স্থান উন্মুক্ত হৈ আছে আৰু সেইবোৰত কোনো ধৰণৰ সুৰক্ষা ব্যৱস্থা নাই।
ইপিনে, কালি শিশুটিৰ গুৱাহাটী চিকিৎসা মহাবিদ্যালয় হাস্পতালত মৰণোত্তৰ পৰীক্ষা সম্পন্ন কৰা হয়। খেলি থকা অৱস্থাতে নলাত সৰি পৰা শিশুটি বহু সময় ধৰি ঘৰৰ মানুহে দেখা পোৱা নাছিল। তেতিয়াহে বিচাৰ-খোচাৰত নামিছিল। এটা চিচি কেমেৰাত শিশুটি নলাত পৰাৰ দৃশ্য আৱদ্ধ হৈছিল।
তেনেদৰেহে শিশুটিৰ সন্ধান ওলাইছিল। নলাটো প্রায় সাত ফুট দ। তাত চাৰি ফুট পানী আছিল। সেই পানীত ওপঙি আছিল শিশুটিৰ নিথৰ দেহ। এনেদৰে হঠাৎ সন্তানক হেৰুওৱা ঘৰখনত বিৰাজ কৰিছে অবর্ণনীয় পৰিৱেশ। পিতৃ-মাতৃ, ককাক-আইতাক, আনকি চুবুৰীয়াও আজি শোকত দগ্ধ। পিতৃ-মাতৃক সান্ত্বনা দিবলৈ কাৰো ভাষা নাই। তাৰ মাজতে যন্ত্রবৎ পিতৃয়ে আজি মৰণোত্তৰ পৰীক্ষাৰ সময়ত জিএমচিএইছত উপস্থিত থাকে। শোকত দগ্ধ মাতৃ মুহূর্তে মুহূর্তে মূছকছ যায় ।