Inaugration For Swadeshi 4G Network :গুৱাহাটীত স্বদেশী বি এছ এন এল ৪জি ষ্টেক আৰু ৯৭,৫০০ ৪জি ডি বি এন টাৱাৰ উদ্বোধন

দেশৰ প্ৰধানমন্ত্ৰী নৰেন্দ্ৰ মোদীয়ে শনিবাৰে স্বদেশী বি এছ এন এল ৪জি ষ্টেক আৰু ৯৭,৫০০ ৪জি ডি বি এন টাৱাৰ দেশজুৰি ভাছুয়েলী উদ্বোধন কৰে ৷ এই উপলক্ষে গুৱাহাটীত অনুষ্ঠিত বিশেষ উদ্বোধনী অনুষ্ঠানত অংশগ্ৰহণ কৰে কেন্দ্ৰীয় যোগাযোগ আৰু সঞ্চাৰ মন্ত্ৰী জ্যোতিৰাদিত্য সিন্ধিয়াই ৷ অনুষ্ঠানত অংশগ্ৰহণ কৰে মুখ্যমন্ত্ৰী ড:হিমন্ত বিশ্ব শৰ্মা আৰু টাটা গোষ্ঠীৰ মুৰব্বী নটৰাজন চন্দ্ৰশেখৰণ ,অসমৰ জ্যেষ্ঠ মন্ত্ৰী কেশৱ মহন্ত ৷ ভাৰতৰ প্ৰযুক্তিগত যাত্ৰাৰ এক ডাঙৰ মাইলৰ খুঁটি হিচাপে অভিহিত বিবেচিত হয় আজিৰ দিনটো ৷

অনুষ্ঠানত মুখ্য অতিথি ৰূপে উপস্থিত থাকি মুখ্যমন্ত্ৰী ড:শৰ্মাই তেওঁৰ ভাষণত কয়,ভাৰত সঞ্চাৰ নিগম লিমিটেডৰ ৰূপালী জয়ন্তীৰ সৈতে সংগতি ৰাখি এই স্বদেশীকৰণে ভাৰতৰ মোবাইল নেটৱৰ্কৰ সকলো ম’বাইল টাৱাৰ, অপ্টিকেল ফাইবাৰ আৰু অন্যান্য সম্পৰ্কিত উপাদান ভাৰতত আৰু ভাৰতীয়ৰ দ্বাৰা নিৰ্মিত হোৱাৰ এই সাফল্যই ভাৰতৰ আত্মনিৰ্ভৰশীল অভিযানত এক টাৰ্নিং পইণ্ট হিচাপে পৰিগণিত হৈছে। এই বিকাশৰ লগে লগে দেশৰ মোবাইল নেটৱৰ্কৰ সকলো মোবাইল টাৱাৰ, অপটিকেল ফাইবাৰ আন্তঃগাঁথনি, আৰু অন্যান্য মূল উপাদানসমূহ এতিয়া ভাৰতত ভাৰতীয় প্ৰতিভাৰ দ্বাৰা নিৰ্মাণ কৰা হ’ব। এই পদক্ষেপে স্বদেশী মোবাইল নেটৱৰ্কৰ সপোনক শক্তিশালী কৰাই নহয় ভৱিষ্যতে বৃহৎ সুযোগৰ দুৱাৰ মুকলি কৰে।

মুখ্যমন্ত্ৰীয়ে আলোকপাত কৰে যে এয়া ভাৰতৰ প্ৰযুক্তিৰ বৃহত্তৰ দৃষ্টিভংগীৰ আৰম্ভণিহে। তেওঁ প্ৰকাশ কৰে যে অসমেও চিপচ নিৰ্মাণৰ ক্ষেত্ৰত আগভাগ ল’বলৈ সাজু হৈছে, মেড ইন আছাম অৰ্ধপৰিবাহী চিপচ শীঘ্ৰে বজাৰত প্ৰৱেশ কৰাৰ সম্ভাৱনা আছে। ইয়াৰ দ্বাৰা ভাৰতৰ স্বাধীন টেক আন্দোলনক আৰু অধিক ঠেলি দিয়া হ’ব, যিয়ে এনে ভৱিষ্যতৰ সংকেত দিব য’ত দেশখনে কেৱল ব্যৱহাৰ কৰাই নহয়, বিশ্বমানৰ প্ৰযুক্তিও উৎপাদন কৰিব।

আজি মুকলি কৰা থলুৱা 4G ষ্টেক 5G লৈ স্কেলেবল, অৰ্থাৎ ভাৰতে ইতিমধ্যে পৰৱৰ্তী প্ৰজন্মৰ ম’বাইল সংযোগৰ বাবে নিজকে প্ৰস্তুত কৰি তুলিছে। চৰকাৰৰ অনুমোদনেৰে অসমত নতুন ডাটা চেণ্টাৰ স্থাপনে ডিজিটেল বিপ্লৱত অঞ্চলটোৰ ভূমিকা আৰু অধিক শক্তিশালী কৰিব।

ড:হিমন্ত বিশ্ব শৰ্মাই প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় মন্ত্ৰী জ্যোতিৰাদিত্য সিন্ধিয়াক এই কাম সম্ভৱ কৰি তোলাৰ বাবে তেওঁলোকৰ দৃষ্টিভংগী আৰু সমৰ্থনৰ বাবে কৃতজ্ঞতা জ্ঞাপন কৰে। তেওঁ ইয়াক ভাৰতৰ বাবে আৰু বিশেষকৈ অসমৰ বাবে এক গৌৰৱৰ মুহূৰ্ত বুলি অভিহিত কৰে, যিখন অসমে এতিয়া দেশৰ ডিজিটেল ভৱিষ্যত গঢ় দিয়াত বৃহত্তৰ ভূমিকা গ্ৰহণ কৰিবলৈ সাজু হৈছে।

উল্লেখ্য যে,অনুষ্ঠান আৰম্ভ হোৱাৰ পূৰ্বে অসমৰ হিয়াৰ আমঠু জুবিনলৈ জনোৱা হয় শ্ৰদ্ধাঞ্জলী ৷ অসম কণ্ঠ গৰাকীৰ প্ৰতিচ্ছবিত মাল্যাৰ্পণ কৰে কেন্দ্ৰীয় মন্ত্ৰী জ্যোতিৰাদিত্য সিন্ধিয়া,টাটা গোষ্ঠীৰ মুৰব্বী নটৰাজন চন্দ্ৰশেখৰণ আৰু মুখ্যমন্ত্ৰী ড:হিমন্ত বিশ্ব শৰ্মা সহ বিভিন্নজনে ৷