Cid ADGP Pressmeet:
অসমীয়াৰ হিয়াৰ আমঠু ৰহস্যজনক মৃত্যু ঘটনাই আজি ২২ দিন অতিক্ৰম কৰিলে যদিও সমস্ত ঘটনাৰ তদন্তত নিয়োজিত চিআইডিৰ এছআইটিয়ে এই পৰ্যন্ত ছিংগাৰপুৰৰ প্ৰবাসী অসমীয়া সকলক অসমলৈ আনিব নোৱাৰা বিষয়টোক লৈ অসমবাসী আশ্বস্ত হ’ব পৰা নাই বুলি শেহতীয়াকৈ বিভিন্ন মহলক চৰ্চা লাভ কৰাত শনিবাৰে চিআইডিৰ এডিজিপি তথা এছআইটিৰ মুৰব্বী মুন্না প্ৰসাদ গুপ্তাই এক সংবাদমেল সম্বোধন কৰে ৷
সংবাদমেলত চিআইডিৰ মুৰব্বী গৰাকীয়ে জুবিনৰ মৃত্যুৰ ঘটনাৰ তদন্তৰ অগ্ৰগতি সম্পৰ্কত কয়, এছ আইটিয়ে তদন্ত ক্ষীপ্ৰতাৰে চলাই আছে আৰু এছআইটিৰ দল ছিংগাপুৰলৈ যোৱাৰ কথা উল্লেখ কৰি কয়,ছিংগাপুৰলৈ যোৱা এটা বিশেষ ব্যৱস্থা আছে৷ বিদেশী ৰাষ্ট্ৰত অন্য দেশৰ পুলিচে নিজাববীয়াকৈ তদন্ত কৰিব নোৱাৰে৷আমি মিউচুৱেল লিগেল ৰিকুৱেষ্ট যোগে তদন্তৰ প্ৰস্তাৱ ইতিমধ্যে প্ৰেৰণ কৰিছো৷আমাৰ তদন্ত আৰম্ভ হোৱাৰ লগে লগে ভাৰত চৰকাৰৰ গৃহ মন্ত্ৰালয়ৰ জৰিয়তে প্ৰস্তাৱ পঠিয়াইছো ৷ আনহাতে ছিংগাপুৰৰ এট’ৰ্নি জেনেৰেলৰ কাৰ্যালয়ত ইতিমধ্যে আমি পঠিওৱা প্ৰস্তাৱ গৈ পাইছে ৷শীৰ্ষ আৰক্ষী বিষয়া গৰাকীয়ে আৰু কয় যে, ছিংগাপুৰে আমাক তালৈ যাবলৈ অনুমতি নিদিব | আমি ছিংগাপুৰত গৈ তদন্ত কৰিব নোৱাৰো ৷ অৱশ্যে আমি ছিংগাপুৰস্থ ভাৰতীয় দূতাবাসৰ জৰিয়তে ছিংগাৰপুৰৰ চৰকাৰৰ লগত যোগাযোগত আছো ৷
আমি জাৰি কৰা চমন অনুসৰি এজন প্ৰবাসী অসমীয়া গুৱাহাটী উপস্থিত হ’ল যদিও ছয় অক্টোবৰৰ নিৰ্ধাৰণ কৰি দিয়া অনুসৰি অন্য প্ৰবাসী অসমীয়া সকল উপস্থিত নথকা বিষয়টো এছ আই টিয়ে কঠোৰস্থিতি গ্ৰহণ কৰি পুনৰ প্ৰবাসী অসমীয়া সকলক আনিবৰ বাবে বিশেষ পদক্ষেপ লৈছে ৷
প্ৰবাসী অসমীয়া সকলৰ উপস্থিতিৰ বাবে বান্ধি দিয়া সময়সীমা ইতিমধ্যে উকলি গৈছে ৷ পুনৰ নিৰ্দিষ্ট সময় দিয়া হৈছে ৷ তেওঁলোকে তদন্তত আহিবই লাগিব৷ কেছ ৰেজিষ্টাৰ হোৱাৰ লগে লগে ছিংগাপুৰ চৰকাৰলৈ তদন্তৰ বাবে প্ৰস্তাৱ প্ৰেৰণ কৰিছো ৷ প্ৰবাসী অসমীয়া সকলক অতি শীঘ্ৰে আহিবলৈ নিৰ্দেশ দিয়া হৈছে ৷ হয়তু ছিংগাপুৰতো তেওঁলোকৰ বিৰুদ্ধে তদন্ত চলি আছে ৷ যাৰবাবে তেওঁলোক অহাতো পলম হৈছে ৷
আনহাতে চিআইডিৰ মুৰব্বী গৰাকীয়ে আৰু কয় যে,আমি যাও বুলিয়েই ছিংগাপুৰলৈ গৈ ক্ৰাইম ছিন ভিজিট কৰিব নোৱাৰো ৷ ছিংগাপুৰৰ চৰকাৰৰ সেউজ সংকেত পালেই এছআইটিয়ে ক্ৰাইম ছিন ভিজিট কৰিব ৷
আনহাতে ,কিছু কিছু মহলত চলি থকা চৰ্চা অনুসৰি তেওঁলোকে গুৱাহাটীত উপস্থিত নোহোৱাকৈ ভিডিঅ কনফাৰেন্স যোগে ভাষ্য প্ৰদানৰ বিষয়টো পোনচাতেই নাকচ কৰি এডিজিপি গৰাকীয়ে স্পষ্ট কৰি দিয়ে যে,ভিডিঅ কনফাৰেন্সত নহয় তেওঁলোকে সোঁশৰীৰে আহি তদন্তৰ সন্মুখীন হ’ব লাগিব ৷ আনহাতে ছিংগাপুৰৰ য়টত থকা ১১ জন লোকৰ নাম ইতিমধ্যে আমি পাইছো ৷
ইপিনে,ভিছেৰা ৰিপৰ্ট সম্পৰ্কত গুপ্তাই কয়, ইতিমধ্যে জুবিনৰ ভিছেৰা ৰিপৰ্ট দিল্লীৰ পৰা আমাৰ হাতত পৰিছে আৰু গুৱাহাটী মেডিকেল কলেজলৈ প্ৰেৰণ কৰা হৈছে ৷ গুৱাহাটী মেডিকেল কলেজে এখন তদন্ত কমিটি গঠন কৰিছে ৷ তদন্ত কমিটিয়ে পৰীক্ষা কৰিব ভিছেৰা ৰিপৰ্ট I
তদন্ত কমিটিয়েহে ফাইনেল পোষ্টমৰ্টেম ৰিপ’ৰ্ট দিব ৷
শ্যামকানু মহন্ত,সিদ্ধাৰ্থ শৰ্মা সহ আন অভিযুক্ত সকলকএছআইটিয়ে যিমানদিন জিম্মাত ল’ব লাগে সিমান দিন লৈছেই ৷ আইনমতে ১৪ দিনতকৈ অধিক দিন আমি তেওঁলোকক জিম্মাত ল’ব নোৱাৰো ৷ আমি বহু লোকৰ সাক্ষী ইতিমধ্যে গ্ৰহণ কৰিছো ৷ জুবিনৰ মৃত্যুৰ ঘটনা সন্দৰ্ভত আওতাত পৰা কোনোৱে সাৰি যাব নোৱাৰে বুলি স্পষ্ট কৰি দিয়ে মুন্না প্ৰসাদ গুপ্তাই ৷
ADVERTISEMENT
