ULFA(I) Finance Secretary Surrenders:
আলফা (স্বাধীন)ত পৰেশ বৰুৱাৰ সোঁহাত স্বৰূপ বুলি পৰিচিত সংগঠনটোৰ বিত্ত সচিব অৰুণোদয় দহোতীয়া ওৰফে অৰুণোদয় অসমে দেওবাৰে দেহৰক্ষীসহ আত্মসমর্পণ কৰা বিষয়টোবে তুমুল চর্চা লাভ কৰিছে। দেওবাৰে পুৱাতেই অৰুণাচল-ম্যানমাৰ সীমান্তবর্তী পাংচাও পাছত অসম আৰক্ষী আৰু অসম ৰাইফলছৰ এটা দলৰ ওচৰত দহোতীয়াই আত্মসমর্পণ কৰে। একে পথ লোৱা দহোতীয়াৰ দেহৰক্ষীজন হ’ল ফ্রান্সিচ অসম। অৰুণোদয় দহোতীয়াৰ প্রকৃত নাম বিজিত গগৈ।
বিগত ১৯৯৭ত আলফাত যোগদান কৰা সংগঠনটোৰ এইজন জ্যেষ্ঠ নেতাই কি পৰিস্থিতিত আত্মসমর্পণ কৰিবলৈ বাধ্য হ’ল, সেয়া অদ্যাপি কোনো পক্ষই স্পষ্ট কৰা নাই। অৱশ্যে ম্যানমাৰ প্ৰশাসনৰ সহায়ত ভাৰত চৰকাৰে অৰুণোদয় অসমক মূলসুঁতিলৈ উভতি আহিবলৈ দীর্ঘদিনৰ পৰা বিভিন্ন ধৰণে চাপ সৃষ্টি কৰি আহিছিল। আলফা (স্বাঃ)ৰ মেজৰ জেনেৰেল পদত কার্যনির্বাহ কৰা অৰুণোদয় অসমে সংগঠন পৰিচালনাৰ প্রতিটো দিশৰ লগত ওতঃপ্রোতভাবে জড়িত আছিল।
সেই অনুযায়ী সংগঠন শক্তিশালীকৰণৰ পৰা আৰম্ভ কৰি সামৰিক অভিযানলৈকে প্রতিটো দিশত চকু ৰাখিছিল। সেয়েহে পৰেশ বৰুৱাৰ বিকল্প হিচাপে অৰুণোদয় অসমৰ নাম দীর্ঘদিনৰ পৰা চৰ্চাত আছিল। পৰেশ বৰুৱাৰো অতি বিশ্বস্তৰূপে বিবেচিত হোৱা বাবেই অৰুণোদয় অসমৰ প্ৰভাৱ সংগঠনটোত মজবুত আছিল। সেইজন নেতাই আজি আত্মসমর্পণ কৰাটো অত্যন্ত গুৰুত্বপূৰ্ণ বুলি বিবেচিত হৈছে। অৰুণোদয় অসম অবিহনে পৰেশ বৰুৱাৰ বিশ্বস্ত সহযোগী নতুনকৈ কোন হ’ব, সেয়াও এতিয়া চর্চালৈ আহিছে।
নিৰাপত্তা বাহিনীৰ শীর্ষ সূত্ৰই সদৰী কৰা অনুসৰি, পৰেশ বৰুৱাৰ ঘনিষ্ঠ নেতাক মূলসুঁতিলৈ অনাৰ দীঘলীয়া প্রচেষ্টা চলি আহিছিল। অৰুণোদয় অসমকে ধৰি আৰু দুই-তিনিজন নেতাৰ ওপৰত বিশেষ দৃষ্টি আছিল। অৰুণোদয় অসমৰ জৰিয়তেই যে সেই সফলতা আহিব, কেইদিনমান আগলৈ সেই নিশ্চয়তা স্পষ্ট হোৱা নাছিল। অবশেষত অৰুণোদয় অসমেই মূলসুঁতিলৈ উভতি আহে।
অসম আৰক্ষীৰ অভিযান শাখাৰ মহাপৰিদৰ্শক জিৎমল দলেই ‘দৈনিক অগ্রদূত’ৰ আগত সদৰী কৰা অনুসৰি, ডিব্ৰুগড় জিলাৰ জ্যেষ্ঠ আৰক্ষী অধীক্ষক অভিজিৎ গৌৰৱৰ নেতৃত্বত পাংচাও পাছলৈ যোৱা আৰক্ষীৰ এটা দলৰ ওচৰত আলফা (স্বাঃ) ব শীর্ষ নেতাজনে একমাত্র দেহৰক্ষীক লগত লৈ আজি আত্মসমর্পণ কৰে।
উল্লেখ্য যে ১৯৯৭ত ডিব্ৰুগড়ৰ চাবুৱাৰ নাদুৱা গাঁৱৰ যুৱক বিজিত গগৈয়ে ডিব্রুগড়ত পঢ়িবলৈ গৈ আলফাত যোগদান কৰিছিল। মেধাবী ছাত্র বিজিতে সংগঠনত নাম লৈছিল অৰুণোদয় দহোতীয়া। অতি কম দিনৰ ভিতৰত আলফাৰ এজন সৈনিকৰূপে নিজক প্রতিষ্ঠা কৰিবলৈ সক্ষম হোৱা অৰুণোদয় দহোতীয়াই ম্যানমাৰৰ কাছিনৰ উপৰি পাকিস্তানতো প্রশিক্ষণ গ্রহণ কৰিছিল। গেৰিলা যুদ্ধৰ দুর্ধর্ষ যোদ্ধাৰূপে সংগঠনত আন এক পৰিচয় থকা দহোতীয়াই তেওঁৰ সাংগঠনিক পাৰদৰ্শিতাও প্ৰদৰ্শন কৰিবলৈ সক্ষম হৈছিল।
বিশেষকৈ আলফাৰ ইজনৰ পাছত সিজন শীর্ষ নেতাই আত্মসমর্পণ কৰাৰ পাছত দহোতীয়াই সংগঠনটোক শক্তিশালী ৰূপত ধৰি ৰাখিবলৈ আপ্রাণ চেষ্টা কৰিছিল। সেইবাবে সংগঠনৰ সামৰিক কাম-কাজ, সংগঠন শক্তিশালীকৰণ, পুঁজি সংগ্রহ, বিভিন্ন ৰাষ্ট্ৰৰ লগত যোগসূত্র স্থাপন কৰা, উত্তৰ-পূৰ্বাঞ্চলৰ আন আন উগ্রপন্থী সংগঠনৰ লগত আলফা (স্বাঃ)ৰ গভীৰ সম্পর্ক গঢ়ি তোলা আদি সকলো দায়িত্ব পালন কৰিছিল।
এনে দক্ষতাৰ বাবেই সংগঠনটোৰ মেজৰ জেনেৰেল পদত তেওঁক অধিষ্ঠিত কৰা হৈছিল। আলফা (স্বাঃ)ৰ ৭৭৯ শিবিৰ পৰিচালনা কৰা দহোতীয়াৰ ওপৰতে সংগঠনটোৰ বিত্তীয় দিশটোও নিৰ্ভৰ আছিল। সেইজন শীর্ষ নেতাই আত্মসমর্পণ কৰাৰ পাছত আলফা (স্বাঃ)ত অভাবনীয় মোক্ষম আঘাত পৰিল বুলি চর্চিত হৈছে। অপহৰণ, বিভিন্ন কূটাঘাতমূলক কার্য আদিত জড়িত দহোতীয়া দীর্ঘদিন আৰক্ষী-নিৰাপত্তা বাহিনীৰ মূৰৰ কামোৰণিও হৈ আহিছিল। তেওঁৰ পৰিচালনাতে কে’বাটাও দুর্ধর্ষ আক্ৰমণৰ ঘটনা অসমত সংঘটিত হৈছিল।
উদাহৰণ স্বৰূপে যোৱা বছৰ যোৰহাটৰ সেনাৰ শিবিৰত গ্ৰেণেড বিস্ফোৰণ সংঘটিত কৰা ঘটনাটো পৰিচালনা কৰিছিল অৰুণোদয় দহোতীয়াই। নিৰাপত্তা বাহিনীৰ সূত্রই সদৰী কৰা অনুসৰি, দহোতীয়াই আছিল পাকিস্তানত উচ্চ প্রশিক্ষণ গ্রহণ কৰা আলফা (স্বাঃ)ৰ অন্তিমজন সদস্য।
প্রসংগক্রমে উল্লেখ্য যে অৰুণোদয় অসমক জালত পেলাবলৈ বিভিন্ন চোৰাংচোৱা সংস্থাসমূহে দীর্ঘদিন বিভিন্ন কৌশল অৱলম্বন কৰি আহিছিল। আনকি অৰুণাচল প্রদেশত যোৱা বছৰ তেওঁক জালত পেলাবলৈ অসম ৰাইফলছ আৰু কে’বাটাও নিৰাপত্তা সংস্থাই বেহু ৰচিছিল। অৰুণাচলৰ এক গোপন স্থানত আত্মগোপন কৰি থকা দহোতীয়াই অত্যন্ত চতুৰালিৰে বেহু ফালি ম্যানমাৰলৈ পলাই যাবলৈ সক্ষম হৈছিল। তেনে এজন দুর্ধর্ষ নেতাইআত্মসমর্পণ কৰা বিষয়টো সর্বদিশেৰে গুৰুত্বপূর্ণ বুলি বিবেচিত হৈছে।
শেহতীয়াকৈ ম্যানমাৰত আলফা (স্বাঃ)ৰ শিবিৰৰ ওপৰত ড্র’ণ আক্ৰমণ সংঘটিত হোৱাৰ পাছতো অৰুণোদয় অসমক মানসিক চাপ সৃষ্টিৰে জালত পেলোৱাৰ কৌশল ৰচনা কৰা হৈছিল। সেই প্রক্রিয়াৰে আগবাঢ়ি অৱশেষত আলফা (স্বাঃ)ব শীর্ষ নেতাজনে আত্মসমর্পণ কৰিবলৈ যেন বাধ্য হয়।
আৰক্ষী মহাপবিদর্শক দলেই সদৰী কৰে যে আত্মসমর্পণ কৰা ভাৰত-ম্যানমাৰ সীমান্তৰ পৰা আলফা (স্বাঃ) ব নেতাজনক পোনে পোনে গুৱাহাটীলৈ লৈ যোৱা হৈছে। অসম আৰক্ষীৰ বিশেষ শাখাত ৰখা দহোতীয়াক আগন্তুক দিনকেইটাত বিভিন্ন নিৰাপত্তা আৰু চোৰাংচোৱা সংস্থাই জেৰা কৰিব। জেৰাৰ অন্ততহে দহোতীয়াৰ ওপৰত আইন অনুসৰি ব্যৱস্থা লোৱা হ’ব বুলি দলেই জানিবলৈ দিয়ে।
অৰুণোদয় দহোতীয়াৰ দৰে নেতাৰ আত্মসমর্পণৰ অন্তৰালত আলফা (স্বাঃ)ত আভ্যন্তৰীণ সংঘাতো তীব্রতৰ হোৱা বুলি চর্চা চলিছে; কিন্তু কাৰণ যিয়েই নহওক কিয়, পৰেশ বৰুৱাৰ বিকল্প হিচাপে নাম চর্চাত থকা নেতাজনৰ আত্মসমর্পণে আলফা (স্বাঃ)ৰ কঁকালত যে প্রচণ্ড কোব এটা শোধালে, সেয়া স্পষ্ট হৈ পৰিছে।
শান্তি আলোচনাৰ বিষয়টোও আজি পুনৰ চর্চালৈ আহিছে। অৱশ্যে মুখ্যমন্ত্রী ড° হিমন্ত বিশ্ব শর্মাই কয় যে আলফা (স্বাঃ)ৰ স’তে শান্তি আলোচনা পৰেশ বৰুৱাৰ লগতহে হ’ব।