Bangladesh:
ড:মহম্মদ ইউনুছ অন্তৱৰ্তী চৰকাৰৰ নৰম স্থিতিৰ সুযোগ লৈ মৌলবাদীয়ে বাংলাদেশত সৃষ্টি কৰা প্ৰচণ্ড অৰাজক পৰিস্থিতিৰ প্ৰতি ভাৰতে তীক্ষ্ণ দৃষ্টি ৰাখিছে। দুর্বৃত্তৰ গুলিত মৌলবাদী নেতা শ্বৰীফ ওচমান হাদিয়ে প্রাণ হেৰুওৱাৰ দিনা সৃষ্টি হোৱা অৰাজক পৰিস্থিতিৰ সময়ত উন্মত্ত লোকে মৈমনচিঙত বৰ্বৰতাৰে হত্যা কৰা দীপু চন্দ্ৰ দাসৰ হত্যাকাণ্ডৰ বিচাৰ নতুন দিল্লীয়ে দাবী কৰিছে। উল্লেখ্য যে হিন্দু যুৱকজনক হত্যাক কেন্দ্ৰ কৰি ভাৰতত প্রবল প্রতিক্ৰিয়াৰ সৃষ্টি হয়। বিষয়টোক লৈ প্রতিক্রিয়া প্রকাশ কৰি দেশৰ বৈদেশিক মন্ত্রণালয়ৰ মুখপাত্র ৰণধীৰ জয়ছোৱালে এক বিবৃতিত কয়, ‘বাংলাদেশৰ পৰিস্থিতিক লৈ ভাৰতে সূক্ষ্ম দৃষ্টি ৰাখিছে। দেশখনৰ কৰ্তৃপক্ষৰ স’তে আমি যোগাযোগ ৰাখিছো। সংখ্যালঘুসকলৰ ওপৰত চলা নির্যাতনক লৈ আমি উদ্বিগ্ন। এই কথা আমি বাংলাদেশক জনাইছো। দীপুৰ নৃশংস হত্যাকাণ্ডৰ অপৰাধীসকলক বিচাৰৰ আওতালৈ আনিব লাগিব। ভাৰতে ইয়াকে বিচাৰিছে।’
আনহাতে, কালি একাংশ যুৱকে নতুন দিল্লীস্থিত বাংলাদেশী উচ্চায়ুক্তালয়ৰ ওচৰত সাব্যস্ত কৰা প্ৰতিবাদক লৈ একাংশ বাংলাদেশী সংবাদ মাধ্যমে ভুৱা আৰু অতিৰঞ্জিত বাতৰি পৰিবেশন কৰে। এই সম্পর্কত বৈদেশিক মন্ত্রণালয়ৰ মুখপাত্র জয়ছোৱালক আজি ভাৰতীয় সংবাদিকে প্রশ্ন কৰে। এই প্রশ্নৰ উত্তৰত তেওঁ কয়, ‘বাংলাদেশৰ একাংশ সংবাদ মাধ্যমত আমাৰ ভিত্তিহীন প্ৰচাৰ কৰাটো আমি দেখিবলৈ পাইছো। সত্যটো হ’ল কালি বাংলাদেশী দূতাৱাসৰ ওচৰত ২০-২৫ জন যুৱকে প্রতিবাদ সাব্যস্ত কৰে। তেওঁলোকে দীপু চন্দ্ৰ দাসৰ হত্যাৰ বিৰুদ্ধে প্রতিবাদ জনাই ধ্বনি দিয়ে। বাংলাদেশত সংখ্যালঘুসকলৰ সুৰক্ষাৰ দাবী জনায়।’ বাংলাদেশৰ একাংশ সংবাদ মাধ্যমত প্রকাশ পোৱাৰ লেখীয়াকৈ কোনেও দূতাৱাসত বলপূর্বক প্ৰৱেশৰ চেষ্ট চলোৱা নাছিল বুলি জয়ছোৱালে সদৰী কৰে। তেওঁ কয় যে প্রতিবাদস্থলীত আৰক্ষী উপস্থিত হোৱাৰ পাছতে প্ৰতিবাদকাৰীসকল আঁতৰি যায়। ইয়াৰ ফুটেজ ইতিমধ্যে প্রকাশ পাইছে বুলিও জয়ছোৱালে জনায়। তেওঁ লগতে স্পষ্ট কৰি দিয়ে যে দেশৰ মাটিত অৱস্থিত যিকোনো বিদেশী প্রতিষ্ঠানৰ নিৰাপত্তা সুনিশ্চিত কৰাত নতুন দিল্লী বদ্ধপৰিকৰ।
উল্লেখ্য যে যোৱা বৃহস্পতিবাৰে নিশা ২৭ বছৰীয়া দীপু চন্দ্ৰ দাসক তেওঁৰ কর্মস্থলী তথা এটা কাপোৰৰ কাৰখানাত উন্মত্ত লোকে অকলশৰীয়া অৱস্থাত হত্যা কৰি জ্বলাই দিয়ে। যুৱকজনক উন্মত্ত লোকসকলে মৰিয়াই হত্যা কৰাৰ পাছত এজোপা গছত বান্ধি জুলাই দিয়ে। ইতিমধ্যে ঘটনা সংক্রান্তত বাংলাদেশ আৰক্ষীয়ে সাতজন লোকক গ্ৰেপ্তাৰ কৰিছে বুলি অন্তৱতী চৰকাৰৰ মুখ্য উপদেষ্টা ইউনুছে সদৰী কৰিছে।
#দীপুৱে ইছলাম ধৰ্মক অপমান কৰাৰ প্ৰমাণ দিব পৰা নাই
উন্মত্ত লোকে মৰিয়াই হত্যা কৰা দীপু চন্দ্ৰ দাসে ঘটনাৰ সময়ত ইছলাম ধর্ম আৰু হজৰত মহম্মদক অপমান কৰা বুলি একাংশই অভিযোগ উত্থাপন কৰিছিল। লক্ষ্যণীয় যে অসহায় হিন্দু যুৱকজনে এনে আপত্তিজনক আচৰণ কৰাৰ কোনো তথ্য-প্রমাণ বাংলাদেশ আৰক্ষীয়ে সংগ্ৰহ কৰিব পৰা নাই। তদন্তকাৰী সংস্থা ৰেপিড একছন বেটেলিয়নৰ ১৪ কোম্পানীৰ কমাণ্ডাৰ মহম্মদ চামছুজ জামানৰ ভাষ্যৰ উদ্ধৃতি দি বাংলাদেশী সংবাদপত্র ‘দ্য ডেইলী ষ্টাৰ’-এ প্রকাশ কৰা বাতৰি অনুসৰি, দীপুৱে ঘটনাৰ পূৰ্বে সামাজিক মাধ্যম বা আন ধৰণৰে ইছলাম বিৰোধী বা উচটনিমূলক মন্তব্য কৰাৰ কোনো প্রমাণ উদ্ধাৰ হোৱা নাই। ঘটনাৰ সময়ত কাৰখানাটোত উপস্থিত থকা লোক আৰু প্রত্যক্ষদর্শীসকলেও দীপুৱে কৰা উচটনিমূলক মন্তব্য নিজ কাণেৰে শুনা নাই। এইসকলৰ অধিকাংশই দাবী কৰে যে তেওঁলোকে বিষয়টো আনৰ পৰাহে শুনিবলৈ পাইছে।
অনির্দিষ্ট কাললৈ বন্ধ চট্টগ্রামৰ ভাৰতীয় ভিছা কেন্দ্র I মৌলবাদীয়ে গ্ৰাস কৰি অনা বাংলাদেশৰ সাম্প্ৰতিক অৰাজক পৰিস্থিতিলৈ লক্ষ্য কৰি নতুন দিল্লীয়ে চট্টগ্রামস্থিত ভাৰতীয় ভিছা কেন্দ্র অনির্দিষ্ট কাললৈ বন্ধ কৰিছে। ইতিমধ্যে এই ভিছা কেন্দ্ৰকে ধৰি ঢাকা আৰু খুলনাত থকা ভাৰতীয় ভিছা কেন্দ্র নতুন দিল্লীয়ে বন্ধ কৰে। নতুন দিল্লীয়ে নির্দেশ জাৰি কৰে যে নিৰাপত্তাজনিত কাৰণত পৰা অনির্দিষ্ট কালৰ বাবে চট্টগ্রামৰ ভাৰতীয় ভিছা কেন্দ্ৰ বন্ধ কৰা হৈছে। ফলত এই কেন্দ্ৰৰ জৰিয়তে অনির্দিষ্ট কালৰ বাবে বাংলাদেশী লোকক ভাৰতীয় ভিছা প্ৰদানৰ ব্যৱস্থা বন্ধ হৈছে। গতিকে চুবুৰীয়া দেশখনৰ স’তে ভাৰতৰ সম্পৰ্কৰ অধিক অৱনতি ঘটিছে। এই ভিছা কেন্দ্রত নিৰাপত্তা ব্যৱস্থাও কঠোৰ কৰা হৈছে। একেদৰে চট্টগ্রামস্থিত ভাৰতীয় উপ-উচ্চায়ুক্তালয়ৰো নিৰাপত্তা ব্যৱস্থা অধিক কটকটীয়া কৰা হৈছে।
উল্লেখ্য যে শনিবাৰে ইনকিলাব মঞ্চৰ নেতা ওচমান হাদীৰ জানাজাৰ সময়তো ঢাকাত বৃহৎ সংখ্যক মৌলবাদীয়ে ভাৰতৰ বিৰুদ্ধেও ধ্বনি দিয়ে। গতিকে দেশখনৰ সাম্প্ৰতিক পৰিস্থিতিয়ে ভাৰততো উদ্বিগ্নতাৰ সৃষ্টি কৰি আছে। এনে অৱস্থাতে দেশখনত থকা ভাৰতীয় ভিছা কেন্দ্ৰ আৰু চট্টগ্রামস্থিত উপ-উচ্চাযুক্তালয়ত নিৰাপত্তা ব্যৱস্থা কটকটীয়া কৰি তোলা হৈছে। আনহাতে, এই সম্পৰ্কত চিলেটৰ মহানগৰ আৰক্ষীৰ অতিৰিক্ত উপ-আযুক্ত ছাইফুল ইছলামে সংবাদ মাধ্যমক কয়, ‘কোনো তৃতীয় পক্ষই যাতে পৰিস্থিতিৰ সুযোগ লৈ অশান্তি বিয়পাব নোৱাৰে, সেয়া নিশ্চিত কৰাৰ উদ্দেশ্যে এই অঞ্চলত নিৰাপত্তা ব্যৱস্থা কটকটীয়া কৰা হৈছে।’
আৰক্ষী সূত্ৰই জনোৱা মতে, শুকুৰবাৰে পুৱাৰ পৰা ভাৰতীয় উপ-উচ্চায়ুক্তালয় আৰু ভাৰতীয় ভিছা কেন্দ্ৰত নিৰাপত্তা ব্যৱস্থা কটকটীয়া কৰি তোলা হৈছে। উল্লেখ্য যে যোৱা বৃহস্পতিবাৰে নিশা বাংলাদেশৰ বিভিন্ন স্থানত থকা ভাৰতীয় উপ-উচ্চায়ুক্তালয়সমূহ ঘেৰাও কাৰ্যসূচী ঘোষণা কৰে ভাৰতবিৰোধী সংগঠন গণ অধিকাৰ পৰিষদে। আনকি চট্টগ্রামস্থিত ভাৰতীয় সহকাৰী উচ্চায়ুক্তৰ বাসভৱনলৈ দুর্বৃত্তই শিলাবর্ষণো কৰে। ফলত সমগ্র চিলেট জিলাত উত্তেজনা বৃদ্ধি পায়। এনে অৱস্থাতে মৌলবাদী সংগঠন ইনকিলাব মঞ্চই ভাৰতীয় সহকাৰী উচ্চায়ুক্তৰ বাসভৱনৰ ওচৰত অৱস্থান কৰে। এই প্রতিবাদস্থলীৰ পৰা মৌলবাদীসকলে বিভিন্ন ভাৰত বিৰোধী ধ্বনি দিয়ে।
ইয়াৰ প্ৰতি লক্ষ্য ৰাখি ভাৰতীয় উপ-উচ্চায়ুক্তালয় আৰু ভিছা কেন্দ্ৰত নিৰাপত্তা ব্যৱস্থা কটকটীয়া কৰা হৈছে বুলি আৰক্ষী সূত্রই জানিবলৈ দিয়ে। নিয়োগ কৰা হৈছে অতিৰিক্ত নিৰাপত্তা বাহিনী। কোনো ব্যক্তি বা সংগঠনে যাতে অৰাজক পৰিস্থিতিৰ সুযোগ লৈ প্ৰৰোচনামূলক কাম-কাজ বা মন্তব্য কৰিব নোৱাৰে, তাৰ প্রতি লক্ষ্য ৰাখি আগতীয়াকৈ এনে সাৱধানতামূলক ব্যৱস্থা গ্রহণ কৰা হৈছে বুলি সূত্রই জনাইছে। আনহাতে, ২৪ ঘণ্টাৰ ভিতৰত হাদি হত্যাকাৰীক গ্ৰেপ্তাৰৰ সন্দৰ্ভত স্থিতি স্পষ্ট কৰিবলৈ ড: ইউনুছ চৰকাৰৰ ওচৰত দাবী উত্থাপন কৰিছে ইনকিলাব মঞ্চই। অন্যথা অন্তৱর্তী চৰকাৰক পদত্যাগৰ দাবী জনাইছে সংগঠনটোৱে। কালি হাদীৰ জানাজাৰ সময়ত এই দাবী উত্থাপন কৰি ধ্বনি দিয়ে মৌলবাদী সংগঠনটোৱে। গতিকে মৌলবাদীৰ প্ৰতি নৰম ড: ইউনুছো শ’লঠেকত পৰাৰ আভাস স্পষ্ট হৈছে।
